អំណានព្រះគម្ពីរប្រចាំថ្ងៃ៖ របាក្សត្រ​ទី២ ជំពូក៣

ខព្រះគម្ពីរប្រចាំថ្ងៃ៖ ចូរ​ប្រយ័ត្ន កុំ​ឲ្យ​អ្នក​ណា​ធ្វើ​អំពើ​អាក្រក់ ស្នង​នឹង​អំពើ​អាក្រក់​ឡើយ ចូរ​ដេញ​តាម​ការ​ល្អ​ជា​ដរាប ដល់​គ្នា​ទៅ​វិញ​ទៅ​មក ហើយ​ដល់​មនុស្ស​ផង​ទាំងឡាយ​ដែរ។​ ថែស្សាឡូនីចទី១ ៥:១៥

សាវ័កប៉ុលបានដាស់តឿនដល់ពួកអ្នកក្រុងថែស្សាឡូនីច កុំឲ្យមើលងាយអំណោយទាននៃសេចក្តីទំនាយឡើយ លោកមានប្រសាសន៍ថា «កុំឲ្យ​ពន្លត់​ព្រះវិញ្ញាណ កុំឲ្យមើលងាយការអធិប្បាយឡើយ ចូរលមើលគ្រប់ទាំងអស់ ហើយកាន់ខ្ជាប់តាមសេចក្តីដែលត្រឹមត្រូវ» លោកបានបង្គាប់ឲ្យមានការប្រុងប្រយ័ត្នចំពោះការរើសអើង ក្នុងការបែងចែកភាពក្លែងក្លាយចេញពីការពិត ។ លោកបានទទូចអង្វរពួកគេឲ្យ «ចៀសចេញពីសេចក្តីអាក្រក់គ្រប់យ៉ាង» ហើយលោកបានបញ្ចប់សំបុត្ររបស់លោក ដោយអធិដ្ឋានសុំឲ្យព្រះសម្អាតពួកគេទាំងស្រុង ដែលនៅក្នុង «ព្រលឹងនិងវិញ្ញាណហើយរូបកាយ​ទាំង​មូល» ពួកគេ «បានបម្រុងទុកឥតសៅហ្មង ដរាបដល់ព្រះយេស៊ូវគ្រិស្ត ជាព្រះ​អម្ចាស់​នៃយើង ទ្រង់យាងមក ព្រះដែលបានហៅអ្នករាល់គ្នា» លោកបានបន្ថែមថា «ទ្រង់នឹងធ្វើសម្រេចការនោះ»។

ការបង្រៀនដែលលោកប៉ុលបានផ្ញើទៅជូនពួកអ្នកក្រុងថែស្សាឡូនីច នៅក្នុងសំបុត្រទីមួយរបស់លោក ទាក់ទងនឹងការយាងមក​ជាលើកទីពីរ​របស់​ព្រះគ្រិស្ត ក៏ស្របគ្នាយ៉ាងត្រឹមត្រូវទៅនឹងការបង្រៀនលើកមុនរបស់លោកដែរ ។ ប៉ុន្តែ ពួកបងប្អូនរួមជំនឿនៅទីក្រុងថែស្សាឡូនីចខ្លះបានយល់ខុសនូវប្រសាសន៍របស់លោក ។ ពួកគេបានយល់ថាលោកបានបញ្ជាក់ពីសេចក្តី​សង្ឃឹមថាលោកនឹងរស់នៅ បានឃើញព្រឹត្តិការណ៍នៃការយាង​មករបស់​ព្រះអង្គសង្រ្គោះដោយផ្ទាល់។ ជំនឿនេះបានបង្កើនភាពរីករាយនិងការរំភើបរបស់ពួកគេឡើង។ អស់អ្នកដែលបានបដិសេធការទទួលខុសត្រូវនិងតួនាទីរបស់ខ្លួន ឥឡូវនេះ បានជម្នះក្នុងការជំរុញគំនិតខុសរបស់ពួកគេ​កាន់តែ​ខ្លាំងឡើង។

នៅក្នុងសំបុត្រទីពីររបស់គាត់ លោកប៉ុលបានស្វះស្វែងកែតម្រូវការយល់ខុសរបស់ពួកគេ ស្តីពីការបង្រៀនរបស់លោក និងដើម្បីដាក់បង្ហាញនៅចំពោះពួកគេនូវតួនាទីពិតប្រាកដរបស់លោក។ លោកបានបញ្ជាក់អំពីទំនុកចិត្តរបស់លោក នៅក្នុងសេចក្តីសុចរិតរបស់ពួកគេ ម្តងទៀត និងការកោតសរសើររបស់លោកដែលជំនឿរបស់ពួកគេនៅរឹងមាំ និងចំពោះសេចក្តីស្រឡាញ់ជាច្រើនបរិបូរ ដែលពួកគេមានដល់គ្នាទៅវិញទៅមក និងចំពោះព្រះដែលជាលោកម្ចាស់របស់ពួកគេ។ លោកបានប្រាប់ដល់ពួកគេថា លោកបានបង្ហាញពួកគេដល់ពួកជំនុំដទៃទៀត ទុកជាគំរូនៃការអត់ធ្មត់ ជំនឿ​ស្វិត​ស្វាញ​ដែលឈរយ៉ាងរឹងមាំ ទប់ទល់នឹងការធ្វើទុក្ខបៀតបៀននិងទុក្ខលំបាក ហើយលោកបានដឹកនាំគំនិតពួកគេឆ្ពោះទៅកាន់ពេលវេលានៃការយាងមកជាលើកទីពីររបស់ព្រះគ្រិស្ត នៅពេលដែលរាស្រ្តរបស់ព្រះនឹងត្រូវសម្រាកពីកង្វល់និងភាពអល់អែកទាំងឡាយរបស់ពួកគេ។

លោកបានសរសេរថា «ដល់ម៉្លេះបានជាយើងខ្ញុំអួតពីអ្នករាល់គ្នា នៅ​ក្នុង​អស់ទាំងពួកជំនុំនៃព្រះ ពីដំណើរសេចក្តីខ្ជាប់ខ្ជួន និងសេចក្តីជំនឿរបស់​អ្នករាល់គ្នា ដែលមានក្នុងសេចក្តីបៀតបៀន និងសេចក្តីទុក្ខលំបាកទាំងប៉ុន្មាន ដែលអ្នករាល់គ្នារងទ្រាំ … នោះជាភស្តុតាងពីសេចក្តីជំនុំជម្រះដ៏សុចរិតរបស់ព្រះ ប្រយោជន៍ឲ្យអ្នករាល់គ្នាបានរាប់ជាគួរនឹងនគរព្រះ ដែល​អ្នក​រាល់​គ្នា​កំពុងតែរងទុក្ខ ដោយព្រោះនគរនោះឯង ដ្បិតនេះជាសេចក្តីសុចរិតនៅចំពោះព្រះ គឺនឹងសងសេចក្តីទុក្ខលំបាក ដល់ពួកអ្នកដែលធ្វើទុក្ខដល់អ្នករាល់គ្នា ហើយឲ្យអ្នករាល់គ្នា ដែលត្រូវគេធ្វើទុក្ខនោះ បានសម្រាកជាមួយ​នឹង​យើងខ្ញុំវិញ ក្នុងកាលដែលព្រះអម្ចាស់យេស៊ូវ ទ្រង់លេចមកពីឋានសួគ៌ ជាមួយនឹងពួកទេវតានៃព្រះចេស្តាទ្រង់ នៅក្នុងអណ្តាតភ្លើង ទាំងសងសឹកនឹង​ពួកអ្នកដែលមិនស្គាល់ព្រះ ហើយនិងពួកអ្នកដែលមិនស្តាប់តាមដំណឹងល្អ ពីព្រះយេស៊ូវគ្រិស្តជាព្រះអម្ចាស់នៃយើង គេនឹងរងទុក្ខទោស ជាសេចក្តី​ហិនវិនាសអស់កល្បជានិច្ច ឃ្លាតពីព្រះភក្ត្រនៃព្រះអម្ចាស់ ហើយពីសិរីល្អ​នៃព្រះចេស្តាទ្រង់ … ដូច្នេះ យើងខ្ញុំអធិដ្ឋានឲ្យអ្នករាល់គ្នាជានិច្ច ដើម្បីឲ្យព្រះនៃយើងខ្ញុំបានរាប់អ្នករាល់គ្នាជាគួរនឹងការដែលទ្រង់ហៅមកធ្វើ ហើយឲ្យទ្រង់បានបំពេញគ្រប់អស់ទាំងសេចក្តីបំណងខាងឯការល្អ និងការដែល​ធ្វើដោយជំនឿ ដោយព្រះចេស្តា ដើម្បីឲ្យព្រះនាមនៃព្រះយេស៊ូវគ្រិស្ត ជា​ព្រះអម្ចាស់នៃយើង បានតម្កើងឡើងក្នុងអ្នករាល់គ្នា ហើយអ្នករាល់គ្នា​ក្នុង​ទ្រង់ផង តាមព្រះគុណរបស់ព្រះនៃយើង និងព្រះអម្ចាស់យេស៊ូវគ្រិស្ត»។

ប៉ុន្តែ មុននឹងការយាងមករបស់ព្រះគ្រិស្ត ការជឿនលឿនខាង​ពិភព​សាសនា​ដ៏សំខាន់ ដូចមានចែងនៅក្នុងបទទំនាយនឹងកើតឡើង។ សាវ័ក​ប៉ុលបានប្រកាសថា «កុំឲ្យអ្នករាល់គ្នាឆាប់មានគំនិតរវើរវាយ ឬថប់ព្រួយអ្វី ទោះបើដោយសារវិញ្ញាណណា ឬពាក្យសម្តីណា ឬសំបុត្រណា ដូចជាមក​ពីយើងខ្ញុំក្តី ដែលថាថ្ងៃនៃព្រះអម្ចាស់ជិតដល់ហើយនោះឡើយ កុំឲ្យអ្នកណាបញ្ឆោតអ្នករាល់គ្នាជាយ៉ាងណាដែរ ដ្បិតថ្ងៃនោះមិនមកឡើយ ទាល់តែមានសេចក្តីក្បត់សាសនាមកជាមុន ហើយមនុស្ស​ដែល​ជាតួបាបនោះបាន​លេចមក គឺជាមនុស្សដែលត្រូវហិនវិនាស ដែលទាស់ទទឹង ហើយលើក​ខ្លួនឡើង ខ្ពស់លើសជាងអស់ទាំងអ្វី ដែលហៅថាព្រះ ឬរបស់អ្វី​ដែលគេ​គោរព​ប្រតិបត្តិផង ដល់ម៉្លេះបានជាវានឹងអង្គុយនៅ ដូចជាព្រះក្នុង​វិហារ​នៃ​ព្រះ ទាំងសម្តែងខ្លួនថាជាព្រះផង»។