កិច្ចការនៃពួកសាវ័ក (ជំពូកទី-២៥)
អំណានព្រះគម្ពីរប្រចាំថ្ងៃ៖ របាក្សត្រទី២ ជំពូក៤
ខព្រះគម្ពីរប្រចាំថ្ងៃ៖ កុំឲ្យអ្នករាល់គ្នាឆាប់មានគំនិតរវើរវាយ ឬថប់ព្រួយអ្វី ទោះបើដោយសារវិញ្ញាណណា ឬពាក្យសំដីណា ឬសំបុត្រណា ដូចជាមកពីយើងខ្ញុំក្តី ដែលថាថ្ងៃនៃព្រះអម្ចាស់ជិតដល់ហើយនោះឡើយ ។ ថែស្សាឡូនីចទី២ ២:២
ពួកគេមិនអាចបកស្រាយប្រសាសន៍របស់លោកប៉ុលខុសទេ។ ប្រសាសន៍នោះមិនមែនជាការបង្រៀនថាលោកបានព្រមានដល់ពួកអ្នកក្រុងថែស្សាឡូនីចអំពីការយាងមករបស់ព្រះគ្រិស្តភ្លាមៗ ដោយការបង្ហាញឲ្យឃើញជាពិសេសណាមួយនោះទេ ។ ស្ថានភាពបែបនេះនឹងបណ្តាលឲ្យមានការច្របូកច្របល់ខាងជំនឿ ដ្បិតការខកចិត្តតែងតែដឹកនាំឲ្យមានការមិនជឿ ។ ហេតុដូច្នេះហើយបានជាលោកប៉ុលបានទូន្មានដល់បងប្អូនរួមជំនឿរបស់លោក ឲ្យប្រុងប្រយ័ត្នកុំទទួលសារបែបនេះថាមកពីលោកឡើយ ហើយលោកបានចាត់ចែងបញ្ជាក់ថាអំណាចរបស់សម្តេចប៉ាប ដែលបានពណ៌នាយ៉ាងច្បាស់ដោយហោរាដានីយ៉ែលនោះនឹងកើតឡើងហើយធ្វើសង្រ្គាមច្បាំងជាមួយនឹងរាស្រ្តរបស់ព្រះ។ រហូតដល់អំណាចនេះនឹងធ្វើការប្រមាថយ៉ាងគួរឲ្យខ្លាចនោះ ពួកជំនុំនឹងសម្លឹងមើលទៅការយាងមកវិញនៃព្រះអម្ចាស់របស់ពួកគេជាការឥតប្រយោជន៍ទេ។ លោកប៉ុលបានសួរសំណួរថា «តើឯងអ្នករាល់គ្នាមិននឹកចាំទេឬអីថា ក្នុងគ្រាដែលខ្ញុំនៅជាមួយ នោះខ្ញុំបានប្រាប់អ្នករាល់គ្នាពីសេចក្តីទាំងនេះដែរ?»
ការពិបាកយ៉ាងធ្ងន់ធ្ងរនឹងកើតឡើងដល់ពួកជំនុំពិតប្រាកដ។ សូម្បីតែនៅពេលដែលសាវ័កប៉ុលកំពុងតែសរសេរនោះ «អាថ៌កំបាំងនៃអាទទឹងច្បាប់» បានចាប់ផ្តើមធ្វើការរួចទៅហើយ ។ ការជឿនលឿនដែលនឹងកើតឡើងនៅពេលអនាគត «អាទទឹងច្បាប់នោះនឹងមកទាំងធ្វើការ ដូចជាអារក្សសាតាំង ដោយនូវគ្រប់ទាំងឫទ្ធិ ទីសម្គាល់ និងការអស្ចារ្យដ៏កំភូត ហើយដោយគ្រប់ទាំងសេចក្តីឆបោករបស់សេចក្តីទុច្ចរិត ក្នុងពួកអ្នកដែលត្រូវវិនាស»។
ភាពឧឡារិកជាពិសេស គឺប្រយោគនៃដំណឹងល្អដែលទាក់ទងជាមួយនឹងអ្នកដែលមិនបាន «ស្រឡាញ់ដល់សេចក្តីពិត» ។ «ដ្បិតហេតុនោះ» លោកបានប្រកាសអំពីអស់អ្នកដែលបានបដិសេធសារនៃសេចក្តីពិតដោយមិនដឹងខ្លួនថា «ព្រះទ្រង់នឹងឲ្យសេចក្តីខុសឆ្គងមក បណ្តាលឲ្យគេជឿតាមសេចក្តីភូតភរវិញ ដើម្បីឲ្យអស់មនុស្សណាដែលមិនជឿតាមសេចក្តីពិត គឺពេញចិត្តនឹងសេចក្តីទុច្ចរិត នោះបានជាប់មានទោសវិញ» ។ មនុស្សមិនអាចបដិសេធការព្រមានដែលព្រះបានប្រទានដល់ពួកគេថាជាការគ្មានទោសនោះទេ ។ ព្រះនឹងដកយកព្រះវិញ្ញាណរបស់ទ្រង់ចេញពីអស់អ្នកដែលរឹងចចេស ងាកបែរចេញពីការព្រមានរបស់ទ្រង់ ដោយទុកពួកគេឲ្យនៅវង្វេងដែលពួកគេចូលចិត្តនោះ។
ដូច្នេះ លោកប៉ុលបានសង្ខេបពីកិច្ចការដ៏អាក្រក់ ដែលអំណាចនៃការអាក្រក់នឹងបន្តភាពងងឹតនិងការធ្វើទុក្ខបៀតបៀនយ៉ាងយូររាប់សតវត្សរ៍ ដែលកើតឡើងនៅមុនការយាងមកជាលើកទីពីររបស់ព្រះគ្រិស្ត។ ពួកអ្នកជឿនៅទីក្រុងថែស្សាឡូនីចបានសង្ឃឹមថានឹងបានរំដោះភ្លាមៗ ឥឡូវនេះ ពួកគេត្រូវបានដាស់តឿនក្រើនរំឭកឲ្យបំពេញភារកិច្ចដែលនៅចំពោះមុខពួកគេដោយការកោតខ្លាចព្រះ និងដោយក្លាហាន។ សាវ័កប៉ុលបានទូន្មានដល់ពួកគេកុំឲ្យធ្វេសប្រហែសនឹងភារកិច្ចរបស់ខ្លួន ឬដកខ្លួនមករង់ចាំដោយខ្ជិលស្រអូសឡើយ ។ បន្ទាប់ពីការប្រមើលមើលពីការរំដោះភ្លាមៗ យ៉ាងត្រេកត្រអាលនោះមក រង្វង់នៃជីវិតប្រចាំថ្ងៃនិងការប្រឆាំងដែលពួកគេត្រូវតែជួបប្រទះនោះបានកើតឡើងទ្វេមួយជាពីរ។ ហេតុនោះហើយបានជាលោកបានអង្វរដល់ពួកគេឲ្យឈររឹងមាំនៅក្នុងជំនឿ៖
«ដូច្នេះ បងប្អូនអើយ ចូរឈរឲ្យមាំមួន ហើយកាន់ខ្ជាប់តាមសេចក្តីបញ្ញត្តិ ដែលយើងខ្ញុំបានបង្រៀនដល់អ្នករាល់គ្នាចុះ ទោះបើដោយពាក្យសម្តី ឬសំបុត្រក្តី សូមឲ្យព្រះយេស៊ូវគ្រិស្ត ជាព្រះអម្ចាស់នៃយើង និងព្រះដ៏ជាព្រះវរបិតា ដែលទ្រង់បានស្រឡាញ់យើង ព្រមទាំងប្រទានឲ្យមានសេចក្តីកម្សាន្តអស់កល្បជានិច្ច និងសេចក្តីសង្ឃឹមយ៉ាងល្អ ដោយព្រះគុណទ្រង់» ។ «តែព្រះអម្ចាស់ទ្រង់ស្មោះត្រង់ ទ្រង់នឹងតាំងអ្នករាល់គ្នាឲ្យមាំមួនឡើង ហើយការពារអ្នករាល់គ្នាឲ្យរួចពីសេចក្តីអាក្រក់ផង យើងខ្ញុំក៏ទុកចិត្តនឹងព្រះអម្ចាស់ ពីដំណើរអ្នករាល់គ្នាថា អ្នករាល់គ្នាកំពុងតែប្រព្រឹត្ត ហើយនឹងប្រព្រឹត្តតទៅទៀត តាមអស់ទាំងសេចក្តីដែលយើងខ្ញុំបានផ្តាំទុកដែរ សូមឲ្យព្រះអម្ចាស់តម្រង់ចិត្តអ្នករាល់គ្នា ទៅក្នុងសេចក្តីស្រឡាញ់នៃព្រះ និងសេចក្តីខ្ជាប់ខ្ជួនរបស់ព្រះគ្រិស្តចុះ»។
ព្រះបានប្រទានកិច្ចការដល់ពួកអ្នកជឿ។ ដោយការលះបង់ខ្លួនដ៏ស្មោះត្រង់ចំពោះសេចក្តីពិត ពួកគេត្រូវតែចែកចាយដល់អ្នកដទៃនូវពន្លឺដែលពួកគេបានទទួល ។ សាវ័កប៉ុលបានអង្វរដល់ពួកគេកុំឲ្យនឿយណាយនឹងការធ្វើល្អឡើយ ហើយលោកបានចង្អុលបង្ហាញដល់ពួកគេពីគំរូរបស់លោកផ្ទាល់ ស្តីពីការឩស្សាហ៍ព្យាយាមនៅក្នុងកិច្ចការជាបណ្តោះអាសន្ន នៅពេលកំពុងធ្វើការដោយចិត្តរឹងមាំ នៅក្នុងបុព្វហេតុនៃព្រះគ្រិស្ត ។ លោកបានស្តីបន្ទោសដល់អ្នកដែលបណ្តែតបណ្តោយខ្លួនទៅក្នុងភាពខ្ជិលច្រអូស និងការរំភើបដ៏សោះកក្រោះ ហើយលោកបានផ្តាំគេថា «ឲ្យគេបរិភោគបាយរបស់ខ្លួនគេចុះ ទាំងធ្វើការដោយស្រគត់ស្រគំផង» ។ លោកក៏បានដាស់តឿនដល់ពួកជំនុំ ឲ្យបំបែកខ្លួនចេញពីការរួបរួមជាមួយនឹងពួកអ្នកដែលមានះ មិនព្រមធ្វើតាមការបង្រៀនរបស់គ្រូគង្វាលរបស់ព្រះ ។ លោកបានបន្ថែមថា «តែកុំឲ្យរាប់គេទុកដូចជាខ្មាំងសត្រូវឡើយ ចូរទូន្មានគេ ដូចជាបងប្អូនវិញ»។
នៅក្នុងសំបុត្រនេះ លោកប៉ុលបានសរុបសេចក្តីដោយការអធិដ្ឋានថានៅកណ្តាលទុក្ខវេទនានិងការពិបាកនៃជីវិត សូមឲ្យសេចក្តីសុខសាន្តរបស់ព្រះ និងព្រះគុណនៃព្រះអម្ចាស់នៃព្រះយេស៊ូវគ្រិស្តបានក្លាយជាការបង្រួបបង្រួមនិងជាការគាំទ្រដល់ពួកគេ។
ខព្រះគម្ពីរប្រចាំថ្ងៃសប្តាហ៍៖ ដោយនឹកចាំជាដរាបពីការដែលអ្នករាល់គ្នាធ្វើ ដោយសេចក្តីជំនឿ និងពីការនឿយហត់ដែលធ្វើដោយសេចក្តីស្រឡាញ់ ហើយដែលអ្នករាល់គ្នាមានសេចក្តីសង្ឃឹមយ៉ាងមាំមួនដល់ព្រះយេស៊ូវគ្រីស្ទជាព្រះអម្ចាស់នៃយើងរាល់គ្នា នៅចំពោះព្រះដ៏ជាព្រះវរបិតានៃយើង។ (ថែស្សាឡូនីចទី១ ១:៣)
