អំណានព្រះគម្ពីរប្រចាំថ្ងៃ៖ របាក្សត្រ​ទី១ ជំពូក១៧

ខព្រះគម្ពីរប្រចាំថ្ងៃ៖ ព្រះយេហូវ៉ា​ទ្រង់​ជា​ចំណែក​នៃ​មរដក ហើយ​ជា​ចំណែក​ក្នុង​ពែង​របស់​ទូលបង្គំ គឺ​ទ្រង់​ហើយ ដែល​ត្រួត​មើល​ចំណែក​ទូលបង្គំ ។ ទំនុកតម្កើង ១៦:៥

ប៉ុន្តែ អ្វីៗទាំងអស់នេះបានផ្លាស់ប្រែ នៅពេលលោកផ្លាស់ប្តូរជំនឿ ។ ព្រះយេស៊ូវពីស្រុកណាសារ៉ែតដែលលោកកំពុងបៀតបៀន នៅក្នុងភាពជាមនុស្សនៃពួកបរិសុទ្ធរបស់ទ្រង់ បានបង្ហាញអង្គទ្រង់នៅជំពោះមុខ​លោក​ជា​ព្រះមែស្ស៊ីនៃសេចក្តីសន្យា។ លោកប៉ុលជាអ្នកបៀតបៀនបានមើលឃើញទ្រង់ជាព្រះរាជបុត្រារបស់ព្រះ ជាព្រះដែលបានយាងមកកាន់​ផែនដីដើម្បី​សម្រេចតាមបទទំនាយ និងជាតួអង្គ​ដែលសម្រេចទៅតាមសំណេរ​នៃព្រះគម្ពីរដ៏ពិសិដ្ឋឥតមានខុសត្រង់ណាសោះ។

លោកប៉ុលបានប្រកាសដំណឹងល្អក្នុងសាលាប្រជុំនៅទីក្រុងថែស្សាឡូនីច ​ដោយសេចក្តីក្លាហានដ៏បរិសុទ្ធ ជំនន់នៃពន្លឺបានជះទៅលើអត្ថន័យពិតប្រាកដនៃពិធីខាងសាសនានិងពិធីបុណ្យផ្សេងៗ ទាក់ទងទៅនឹងពិធីថ្វាយ​តង្វាយនៅក្នុងរោងឧបោសថ ។ លោកបាននាំគំនិតអ្នកស្តាប់របស់លោកទៅហួសពីព្រះរាជកិច្ចរបស់ព្រះគ្រិស្តនៅផែនដី ដោយបានសម្រេចកិច្ចការជាអ្នកសម្របសម្រួលរបស់ទ្រង់ នៅគ្រាដែលព្រះគ្រិស្តនឹងយាងមកវិញម្តងទៀត ដោយព្រះចេស្តានិងសិរីល្អដ៏អស្ចារ្យ ហើយបង្កើតនគរ​របស់ទ្រង់​នៅ​លើផែនដី ។ លោកប៉ុលគឺជាអ្នកជឿទៅលើការយាងមកវិញជាលើកទីពីររបស់ព្រះគ្រិស្ត ដូច្នេះ លោកបានបង្ហាញពីព្រឹត្តិការណ៍នេះយ៉ាងច្បាស់និងមានទម្ងន់ ដែលអ្នកបានឮរឿងនេះនឹងដក់ជាប់នៅក្នុងចិត្តមិនងាយនឹងរលុបបានឡើយ។

លោកប៉ុលបានអធិប្បាយទៅកាន់ពួកជំនុំនៅក្រុងថែស្សាឡូនីច បីសប្បាតហ៏ដ៏មានជោគជ័យជាប់ៗគ្នា ដោយរៀបរាប់ប្រាប់ដល់ពួកគេ ចេញពីព្រះគម្ពីរ ទាក់ទងទៅនឹង ព្រះជន្ម ការសុគត ការមានព្រះជន្មរស់​ឡើងវិញ កន្លែងដែលទ្រង់បំពេញកិច្ចការ និងអនាគតសិរីល្អរបស់ព្រះគ្រិស្ត ដែលជា «កូនចៀមដែលត្រូវគេសម្លាប់ តាំងពីកំណើតលោកិយមក» (វិវរណៈ ១៣:៨) ។ លោកបានលើកតម្កើងព្រះគ្រិស្តឲ្យមនុស្ស​អាចយល់​បាន ថាកិច្ចការរបស់ទ្រង់គឺជាកូនសោសម្រាប់បើកគម្ពីរសញ្ញាចាស់ ដើម្បីចូលទៅកាន់ទ្រព្យសម្បត្តិដ៏បរិបូររបស់ពួកគេ។

ដូច្នេះ ដំណឹងល្អត្រូវបានប្រកាសផ្សាយនៅទីក្រុងថែស្សាឡូនីច ដោយ​អំណាចដ៏អស្ចារ្យ ហើយបានទាក់ទាញចំណាប់អារម្មណ៍ក្រុមជំនុំជាច្រើននាក់។ «ពួកអ្នកនោះខ្លះក៏យល់ព្រម ហើយបានចូលខាងប៉ុល និងស៊ីឡាស ព្រម​ទាំង​​ពួកសាសន៍ក្រិកសន្ធឹក ដែលតែងតែថ្វាយបង្គំព្រះ និងពួកស្រីអ្នកមុខ​ជា​ក្រែល​ដែរ»។

ចំណែកនៅកន្លែងដែលពួកលោកបានចូលទៅដល់កាលពីមុន ពួកសាវ័កបានជួបជាមួយនឹងការប្រឆាំងយ៉ាងខ្លាំងក្លា។ «ពួកសាសន៍យូដា​ដែលមិន​ព្រមជឿ» គេ «មានចិត្តឈ្នានីស» ។ កាលណោះពួកយូដា​ទាំងនេះ​មិន​ពេញ​ចិត្តនឹងរដ្ឋអំណាចរ៉ូមទេ ព្រោះកន្លងមកថ្មីៗនេះពួកគេបានបង្កើតការបះបោរនៅទីក្រុងរ៉ូម។ ពួករដ្ឋអំណាចរ៉ូមបានឃ្លាំមើលពួកគេដោយការសង្ស័យ ហើយសេរីភាពរបស់ពួកគេក៏ត្រូវបានរឹតបន្តឹង។ ឥឡូវនេះ បានមើលឃើញឱកាសមួយក្នុងការកេងយកចំណេញពីកាលៈទេសៈ ដើម្បីបង្កើតការពេញចិត្តសម្រាប់ពួកគេ ហើយនៅពេលជាមួយគ្នានោះ ពួកគេបានស្តីបន្ទោស​ដល់ពួកសាវ័ក និងអ្នកដែលបានផ្លាស់ប្តូរជំនឿមកជឿសាសនាគ្រិស្ត។

ពួកគេបានធ្វើការនោះដោយរួបរួមជាមួយនឹង «មនុស្សពាល​អនាថា​ខ្លះមក» រួចប្រមូលបានមនុស្សយ៉ាងសន្ធឹក «ទៅបង្កើតវឹកវរក្នុងទីក្រុង» ដោយ​សង្ឃឹមថាអាចនឹងរកពួកសាវ័កឃើញ ពួកគេ «នាំគ្នាទៅចោមព័ទ្ធ​ផ្ទះ​យ៉ាសុន» ប៉ុន្តែ រកប៉ុលនិងស៊ីឡាសមិនឃើញឡើយ «លុះរកមិនឃើញ» ហ្វូងមនុស្សដែលគ្មានសណ្តាប់ធ្នាប់នេះ «ក៏ចាប់យ៉ាសុន និងពួកជំនុំខ្លះ កន្ត្រាក់ដឹកនាំទៅដាក់នៅមុខចៅហ្វាយទីក្រុង ដោយស្រែកថា ពួកដែល​នាំឲ្យក្រឡាប់ផែនដីនោះ បានមកទីនេះហើយ ឯយ៉ាសុននេះ ជាអ្នកបាន​ទទួលគេ ពួកនោះប្រព្រឹត្តសុទ្ធតែខុសនឹងបញ្ញត្តិរបស់សេសារ ដោយ​និយាយ​ថា មានស្តេចមួយទៀត ឈ្មោះយេស៊ូវ»។

ខណៈដែលពួកគេមិនអាចរកលោកប៉ុលនិងស៊ីឡាសឃើញ ពួកតុលាការបានឲ្យលោកយ៉ាសុនបង់ប្រាក់ធានា ដើម្បីរក្សាភាពស្ងប់ស្ងាត់។ ដោយព្រួយបារម្ភក្រែងមានអំពើហិង្សាកាន់តែខ្លាំងឡើង «ពួកជំនុំក៏ឲ្យប៉ុល និង​ស៊ីឡាស ចេញទៅឯក្រុងបេរា ទាំងយប់ភ្លាម»។

អស់អ្នកដែលបង្រៀនអំពីសេចក្តីពិតនៅសម័យសព្វថ្ងៃនេះ មិនត្រូវ​បាក់ទឹកចិត្តឡើយ នៅពេលជួបនឹងការទទួលយកដោយការមិនពេញចិត្តដែលលោកប៉ុលនិងសហការីរបស់លោកបានទទួលពីសំណាក់ពួកអ្នកដែលពួកលោកធ្វើការបម្រើនោះឡើយ។ អ្នកនាំសារនៃឈើឆ្កាងត្រូវតែប្រដាប់កាយដោយការចាំយាមនិងការអធិដ្ឋាន ហើយបោះជំហានទៅមុខ ដោយ​ជំនឿ​និងសេចក្តីក្លាហាន ព្រមទាំងបំពេញកិច្ចការនៅក្នុងព្រះនាមនៃព្រះយេស៊ូវជានិច្ច។ ពួកគេត្រូវតែលោកតម្កើងព្រះគ្រិស្តថា ជាអ្នកសម្របសម្រួលរបស់​មនុស្សនៅរោងឧបោសថនៃឋានសួគ៌ ជាព្រះដែលជាមជ្ឈមណ្ឌល​សម្រាប់ចែកចាយអំពីតង្វាយយញ្ញបូជានៃគម្ពីរសញ្ញាចាស់ទាំងអស់ ដែលពួកអ្នកបំពានទៅនឹងក្រឹត្យវិន័យរបស់ព្រះអាចនឹងរកឃើញនូវសេចក្តីសុខសាន្តនិងការអត់ឱនទោសនៅក្នុងតង្វាយធួននឹងបាបរបស់ទ្រង់។