អំណានព្រះគម្ពីរប្រចាំថ្ងៃ៖ របាក្សត្រ​ទី២ ជំពូក៣០

ខព្រះគម្ពីរប្រចាំថ្ងៃ៖ ឯ​ព្រះ​ដែល​បាន​ហៅ​អ្នក​រាល់​គ្នា​មក ឲ្យ​មាន​សេចក្តី​ប្រកប​នឹង​ព្រះរាជបុត្រា​ទ្រង់ គឺ​ព្រះយេស៊ូវគ្រីស្ទ ជា​ព្រះអម្ចាស់​នៃ​យើង នោះ​ទ្រង់​ស្មោះត្រង់។ កូរិនថូសទី១ ១:៩

ពីទីក្រុងអេភេសូរ លោកប៉ុលបានចេញដំណើរបំពេញបេសកកម្មនៅកន្លែងផ្សេងមួយទៀត នៅក្នុងអំឡុងពេលដែលលោកសង្ឃឹមថានឹងទៅមើលទិដ្ឋភាពកិច្ចការរបស់លោកដែលបំពេញកន្លងមក នៅទ្វីបអឺរ៉ុបម្ដងទៀត ។ ក្នុងការរង់ចាំនៅទីក្រុងត្រូអាសមួយរយៈ «ដើម្បីនឹងផ្សាយដំណឹងល្អពីព្រះគ្រិស្ត» លោកបានរកឃើញបងប្អូនខ្លះដែលត្រៀមខ្លួនស្ដាប់តាមសាររបស់លោក។ «ហើយមានទ្វារបើកឲ្យខ្ញុំ ដោយនូវព្រះអម្ចាស់» ក្រោយមកលោកបានប្រកាសពីការងាររបស់គាត់នៅកន្លែងនេះ។ ប៉ុន្ដែ ដោយសារជោគជ័យរបស់លោកនៅក្រុងត្រូអាស លោកមិនអាចនៅទីនោះបានយូរទេ។ «មានសេចក្តីកង្វល់ខាងឯពួកជំនុំទាំងប៉ុន្មាន» ហើយជាពិសេសពួកជំនុំនៅក្រុងកូរិនថូសបានដិតដាមយ៉ាងធ្ងន់នៅក្នុងចិត្តរបស់លោក ។ លោកសង្ឃឹមថានឹងបានជួបលោកទីតុសនៅក្រុងត្រូអាស និងបានដឹងថាតើពាក្យនៃការទូន្មាននិងការស្តីបន្ទោស ដែលលោកបានផ្ញើទៅកាន់ពួកជំនុំនៅទីក្រុងកូរិនថូសនោះត្រូវបានគេទទួលយកយ៉ាងណាដែរ ប៉ុន្តែ នៅក្នុងរឿងនេះ លោកមាន ការខកចិត្តជាខ្លាំង ។ លោកបានសរសេរទាក់ទងនឹងបទពិសោធន៍នេះយ៉ាងដូច្នេះថា «នោះខ្ញុំឥតបានធូរក្នុងចិត្តសោះ ដោយហេតុរកទីតុស ជាបងប្អូន​ខ្ញុំមិនឃើញ» ។ ហេតុដូច្នេះហើយ លោកក៏បានចាកចេញពីទីក្រុងត្រូអាស ហើយឆ្លងទៅទីក្រុងម៉ាសេដូន ទីនោះហើយដែលលោកបានជួបលោកធីម៉ូថេនៅក្រុងភីលីព។

ក្នុងអំឡុងពេលនៃការព្រួយបារម្ភចំពោះពួកជំនុំនៅទីក្រុងកូរិនថូសនេះ លោកប៉ុលបានសង្ឃឹមពីការល្អបំផុត ប៉ុន្តែ នៅពេលខ្លះអារម្មណ៍សោកសៅយ៉ាងខ្លាំងបានបោកបក់មកលើគំនិតរបស់លោកទៅវិញ ដោយបារម្ភក្រែងពួកគេយល់ច្រឡំអំពីការទូន្មាននិងការស្តីបន្ទោសរបស់លោក ។ ក្រោយមក លោកបានសរសេរថា «នោះយើងខ្ញុំឥតមានសេចក្តីស្រាកស្រាន្ត ខាងសាច់​ឈាមសោះ មានសុទ្ធតែសេចក្តីលំបាកវិញ គឺនៅខាងក្រៅមាន​សេចក្តី​តតាំង ហើយខាងក្នុងមានសេចក្តីភ័យខ្លាច តែព្រះអង្គដែលកម្សាន្តចិត្តពួកអ្នកដែលត្រូវបន្ទាប ទ្រង់ក៏បានកម្សាន្តចិត្តយើងខ្ញុំ ដោយអ្នកទីតុសមកដល់»។

អ្នកនាំសារដ៏ស្មោះត្រង់នេះបាននាំមកនូវដំណឹងដ៏រីករាយ ថាការផ្លាស់​ប្តូរ​ដ៏អស្ចារ្យមួយបានកើតឡើងក្នុងចំណោមពួកអ្នកជឿនៅទីក្រុងកូរិនថូសហើយ ។ មនុស្សជាច្រើនបានទទួលយកការណែនាំដែលមាននៅក្នុងសំបុត្ររបស់លោកប៉ុល ហើយបានកែប្រែចិត្ដពីអំពើបាបរបស់គេ។ ជីវិតរបស់ពួកគេលែងជាការតិះដៀលដល់គ្រិស្តសាសនាតទៅទៀតហើយ ក៏ប៉ុន្តែបានក្លាយជាឥទ្ធិពលដ៏ខ្លាំងក្លាដើម្បីគាំទ្រដល់ការគោរពព្រះវិញ។

សាវ័កប៉ុលបានផ្ញើសំបុត្រមួយច្បាប់ទៀត ទៅកាន់បងប្អូននៅក្រុងកូរិនថូសដោយក្តីអំណរ ដើម្បីបង្ហាញភាពរីករាយនៅក្នុងចិត្តររបស់លោក ដោយព្រោះតែកិច្ចការដ៏ល្អដែលបានកើតឡើងនៅក្នុងចំណោមពួកគេ «ដ្បិតបើសិនជាខ្ញុំបានធ្វើឲ្យអ្នករាល់គ្នាព្រួយចិត្ត ដោយសំបុត្រនោះ ខ្ញុំក៏មិនស្តាយ​ដែរ ទោះបើបានស្តាយពីមុនក៏មែន»។ នៅពេលមានកង្វល់ដោយការភ័យខ្លាចថាពាក្យសម្ដីរបស់លោកត្រូវគេមើលងាយ ជួនកាលលោកសោកស្តាយដោយបានសរសេរពាក្យខ្លាំងៗនិងចំៗ នោះដែរ។ លោកបានបន្តថា «គង់​តែ​ខ្ញុំអរក្នុងពេលឥឡូវនេះវិញ មិនមែនដោយព្រោះអ្នករាល់គ្នាកើតទុក្ខព្រួយទេ គឺដោយព្រោះអ្នករាល់គ្នាព្រួយ រហូតដល់បានប្រែចិត្តវិញទេតើ ដ្បិតអ្នករាល់គ្នាបានកើតទុក្ខព្រួយ បែបដែលគាប់ព្រះហឫទ័យដល់ព្រះ ដើម្បីកុំឲ្យអ្នករាល់គ្នាខូចខាតអ្វី ដោយព្រោះយើងខ្ញុំឡើយ» ។ ការកែប្រែចិត្តនោះដែល​ត្រូវបានបង្កើតឡើងដោយឥទ្ធិពលនៃព្រះគុណរបស់ព្រះ ទៅលើចិត្ត​របស់​មនុស្ស នឹងនាំឲ្យមានការលន់តួនិងការលះបង់អំពើបាប។ នោះហើយគឺជាផលផ្លែដែលសាវ័កប៉ុលបានប្រកាស ត្រូវបានគេមើលឃើញនៅក្នុងជីវិតអ្នកជឿនៅទីក្រុងកូរិនថូស។ «នោះបានបង្កើតឲ្យអ្នករាល់គ្នាមានសេចក្តីសង្វាត សេចក្តីដោះសា សេចក្តីគ្នាន់ក្នាញ់ សេចក្តីភ័យខ្លាច សេចក្តីនឹករឭកសេចក្តី​ឧស្សាហ៍»។