អំណានព្រះគម្ពីរប្រចាំថ្ងៃ៖ នាងអេសធើរ ជំពួក​៨

ខព្រះគម្ពីរប្រចាំថ្ងៃ៖ ចូរ​សំអាត​ដំបែរ​ចាស់​ចេញ ដើម្បី​ឲ្យ​អ្នក​រាល់​គ្នា​បាន​ត្រឡប់​ជា​ដុំ​ម្សៅ​ថ្មី​វិញ ដ្បិត​អ្នក​រាល់​គ្នា​បាន​ឥត​ដំបែ​ហើយ ព្រោះ​ព្រះគ្រីស្ទ​ដ៏​ជា​យញ្ញបូជា​នៃ​បុណ្យ​រំលង នោះ​បាន​ត្រូវ​ថ្វាយ​ជំនួស​យើង​រាល់​គ្នា​ហើយ។ កូរិនថូសទី១ ៥:៧

នេះជាឱកាសដ៏មានតម្លៃសម្រាប់បងប្អូនជាអ្នកដឹកនាំទាំងអស់ឲ្យ​ទទួល​​ស្គាល់ដោយស្មោះត្រង់ថា ព្រះបានធ្វើការតាមរយៈលោកប៉ុល និងថាពួកគេ​បានធ្វើខុសជាញឹកញាប់ក្នុងការអនុញ្ញាតឲ្យរបាយការណ៍របស់សត្រូវបំផុស​ឲ្យមានការច្រណែននិងការរើសអើងរបស់ពួកគេ។ ប៉ុន្តែ ជំនួសឲ្យការបង្រួប​បង្រួមក្នុងកិច្ចខិតខំប្រឹងប្រែង ដើម្បីរកយុត្តិធម៌ជូនជនដែលបានរងរបួស ពួកគេបែរជាបានផ្ដល់ដំបូន្មានជូនលោក ដែលបង្ហាញថាពួកគេនៅតែរីករាយជាមួយនឹងគំនិតថាលោកប៉ុលជាអ្នកទទួលខុសត្រូវដ៏សំខាន់ ចំពោះការរើសអើងដែលបានកើតឡើងនេះទៅវិញ ។ ពួកគេមិនបានឈរដោយក្លាហាន នៅចំពោះការការពារខ្លួនរបស់លោក ដោយខំព្យាយាមបង្ហាញពួកអ្នកដែលរវាតចិត្ត ដែលបានប្រព្រឹត្តខុសនោះទេ ប៉ុន្តែ ពួកគេបានស្វែងរកការសម្របសម្រួលដោយផ្តល់ដំបូន្មានដល់លោក ឲ្យធ្វើតាមវិធីដែលមានក្នុងគំនិតរបស់ពួកគេ ដែលបានលុបបំបាត់ចោលនូវមូលហេតុទាំងអស់ដែលនាំឲ្យមានការយល់ខុសទៅវិញ។

ពួកគេបាននិយាយ ជាការឆ្លើយតបទៅនឹងទីបន្ទាល់របស់លោកថា «បងអើយ បងដឹងថា មានសាសន៍យូដាប៉ុន្មានម៉ឺនបានជឿហើយ គេសុទ្ធតែមានសេចក្តីឧស្សាហ៍ខ្មីឃ្មាតកាន់តាមក្រឹត្យវិន័យទាំងអស់គ្នាក៏បានឮ​និយាយ​ពីបងថា បងបង្រៀនដល់សាសន៍យូដាទាំងអស់ ដែលនៅជាមួយ​នឹង​សាសន៍ដទៃ ឲ្យគេលះចោលលោកម៉ូសេចេញ ព្រមទាំងហាមប្រាមគេ កុំឲ្យកាត់ស្បែកកូន ឬប្រតិបត្តិតាមទម្លាប់ពីបុរាណផង ដូច្នេះ តើដូចម្តេច មុខជានឹងមានគេប្រជុំគ្នាទាំងហ្វូងជាមិនខាន ដ្បិតគេនឹងឮថា បងមក​ដល់​ហើយ ដូច្នេះ ចូរបងធ្វើតាមពាក្យយើងវិញ ដ្បិតមានមនុស្សបួននាក់ក្នុងពួកយើង នៅជាប់ក្នុងបំណន់នៅឡើយ ចូរបងនាំយកគេទៅលាបំណន់​ជាមួយ​គ្នា ហើយចេញសោហ៊ុយឲ្យគេផង ដើម្បីឲ្យគេបានកោរសក់ចេញ នោះ​មនុស្សទាំងអស់នឹងដឹងថា សេចក្តីដែលគេឮនិយាយពីបងនោះមិនពិតទេ គឺខ្លួនបងតែងប្រព្រឹត្តទៀងត្រង់ ហើយកាន់តាមក្រឹត្យវិន័យដែរ ឯពួក​សាសន៍​ដទៃដែលជឿ នោះយើងបានផ្ញើសំបុត្រទៅហើយ ដោយសម្រេចថា មិនចាំបាច់ឲ្យគេកាន់តាមសេចក្តីទាំងនោះទេ ត្រូវប្រយ័ត្នតែនឹងរបស់អ្វីដែលថ្វាយទៅរូបព្រះ ហើយឈាម និងសត្វសម្លាប់ដោយច្របាច់ក ហើយនិងសេចក្តី​កំផិតប៉ុណ្ណោះ»។

បងប្អូនទាំងនោះបានសង្ឃឹមថាលោកប៉ុល ប្រហែលជាអាចផ្ដល់ការប្រឆាំងដាច់ខាតទៅនឹងរបាយការណ៍មិនពិតទាក់ទងនឹងរូបលោក ដោយធ្វើតាមការណែនាំដែលពួកគេបានស្នើឡើងជាក់ជាមិនខាន។ ពួកគេបាន​បញ្ជាក់​ប្រាប់គាត់ថា ការសម្រេចចិត្តរបស់អតីតក្រុមប្រឹក្សា ទាក់ទងនឹង​ពួកសាសន៍ដទៃដែលបានកែប្រែចិត្ដនិងច្បាប់នៃពិធីបុណ្យផ្សេងៗ នៅតែត្រូវ​បានរក្សាបានយ៉ាងល្អដដែល ។ ប៉ុន្តែ ដំបូន្មានដែលបានផ្តល់ឲ្យនៅពេលនេះមិនស្របទៅតាមការសម្រេចចិត្តនោះទេ ។ ព្រះវិញ្ញាណនៃព្រះមិនបានណែនាំឲ្យមានការបង្រៀននេះទេ។ គំនិតនេះគឺជាផលផ្លែនៃភាពកំសាកទេ។ ពួកមេដឹកនាំពួកជំនុំនៅក្រុងយេរូសាឡិមបានដឹងថាដោយការមិនស្របតាមច្បាប់នៃពិធីបុណ្យផ្សេងៗ ពួកគ្រិស្តសាសនិកនឹងនាំមកនូវសម្អប់ដល់សាសន៍យូដា និងធ្វើឲ្យខ្លួនឯងទទួលរងនូវការធ្វើទុក្ខបៀតបៀនជាក់ជាមិនខាន ។ ក្រុមប្រឹក្សាសាន់ហេឌ្រីនបានខំប្រឹងប្រែងអស់ពីសមត្ថភាពដើម្បីរារាំងការរីកចម្រើននៃដំណឹងល្អ ។ គេបានជ្រើសរើសមនុស្សឲ្យតាមដានពួកសាវ័ក ជា​ពិសេសលោកប៉ុល ហើយពួកគេបានប្រើគ្រប់មធ្យោបាយដែលអាចធ្វើបាន ដើម្បីប្រឆាំងនឹងការងាររបស់សាវ័កប៉ុល។ ប្រសិនបើពួកអ្នកជឿលើព្រះគ្រិស្តត្រូវបានចោទប្រកាន់នៅចំពោះក្រុមប្រឹក្សាសាន់ហេឌ្រីន ថាជាអ្នក​បំពាន​នឹងក្រឹត្យវិន័យ នោះពួកគេនឹងទទួលទោសយ៉ាងឆាប់រហ័ស ដោយត្រូវតែដាក់ទណ្ឌកម្មយ៉ាងធ្ងន់ធ្ងរ ជាបទក្បត់ជំនឿនៃសាសន៍យូដា។

សាសន៍យូដាជាច្រើន ដែលបានទទួលយកដំណឹងល្អ នៅតែចូលចិត្តការគោរពចំពោះច្បាប់នៃពិធីបុណ្យផ្សេងៗដដែល ហើយពួកគេមានឆន្ទៈក្នុងការធ្វើសម្បទានមិនល្អ ដោយសង្ឃឹមថានឹងទទួលបានទំនុកចិត្តពីពួកបងប្អូនរួមជាតិរបស់ពួកគេ ដើម្បីលុបបំបាត់ចោលនូវការរើសអើងរបស់ពួកគេ ហើយមានជំនឿលើព្រះគ្រិស្តថាជាព្រះដ៏ប្រោសលោះរបស់ពិភពលោកទាំងមូល ។ លោកប៉ុលបានដឹងថា ដរាបណាសមាជិកសំខាន់ៗជាច្រើននៅក្រុងយេរូសាឡិម នៅតែបន្តរីករាយនឹងការប្រកាន់ពូជសាសន៍ ទាស់នឹង​លោកនោះ ពួកគេនឹងបន្តធ្វើការប្រឆាំងទៅនឹងឥទ្ធិពលរបស់លោកឥតឈប់ឈរដដែល ។ លោកបានដឹងថា ប្រសិនបើអាចអូសទាញពួកគេមកឯសេចក្ដីពិតបាន ដោយសម្បទានណាមួយ លោកអាចនាំពួកគេមកឯ សេចក្តីពិត នោះលោកនឹងដកយកឧបសគ្គដ៏ធំចេញពីជោគជ័យនៃដំណឹងល្អ នៅកន្លែងផ្សេងទៀត ។ ប៉ុន្ដែ ព្រះមិនបានអនុញ្ញាតឲ្យលោកចុះចាញ់តាមការស្នើសុំរបស់ពួកគេទេ។