អំណាន​​ព្រះគម្ពីរប្រចាំថ្ងៃ៖ ពង្សាវតាក្សត្រទី១ ជំពូក១១

ខព្រះគម្ពីរប្រចាំថ្ងៃ៖ ដ្បិត​អ្នក​ត្រូវ​ធ្វើ​ជា​ស្មរ​បន្ទាល់​ពី​ទ្រង់ ដល់​មនុស្ស​ទាំង​អស់ ពី​គ្រប់​ការ​ដែល​អ្នក​បាន​ឃើញ​បាន​ឮ។ នោះ​ទ្រង់​មាន​ព្រះបន្ទូល​មក​ខ្ញុំ​ថា ចូរ​ទៅ​ចុះ ដ្បិត​ខ្ញុំ​នឹង​ចាត់​អ្នក​ឲ្យ​ទៅ​ឯ​សាសន៍​ដទៃ​ដែល​នៅ​ឆ្ងាយ។ កិច្ចការ ២២:១៥ និង ២១

ដោយបានឮរឿងនេះ ពួកសិស្សក៏បានទទួលយកលោកជាសមាជិកម្នាក់របស់ពួកគេ។ មិនយូរប៉ុន្មាន ពួកគេក៏មានភស្តុតាងជាច្រើនដែលបានបញ្ជាក់ពីបទពិសោធន៍ជាគ្រិស្តបរិស័ទរបស់លោក។ ឥឡូវនេះ អនាគតជាសាវ័កសម្រាប់សាសន៍ដទៃកំពុងនៅក្នុងទីក្រុងដែលមានអ្នកធ្លាប់ទាក់ទងជាមួយលោកជាច្រើនរស់នៅ ហើយលោកប៉ុលចង់បង្ហាញដល់ពួកមេដឹកនាំសាសន៍យូដាទាំងនេះឲ្យបានឃើញច្បាស់អំពីបទទំនាយដែលទាក់ទងទៅនឹងព្រះមែស្ស៊ី ដែលត្រូវបានសម្រេចដោយការយាងមករបស់ព្រះអង្គសង្រ្គោះ។ លោកប៉ុលជឿជាក់ថាពួកគ្រូនៃសាសន៍អ៊ីស្រាអែលទាំងនេះ ជាពួកអ្នក​ដែលលោកធ្លាប់មានទំនាក់ទំនងយ៉ាងជិតស្និទ្ធ នឹងជឿជាក់ហើយស្មោះត្រង់ចំពោះព្រះយេស៊ូវដូចជាលោកដែរ ជាក់ជាមិនខាន។ ប៉ុន្តែ លោកបានប៉ាន់ស្មានចិត្តបងប្អូនសាសន៍យូដារបស់លោកខុសស្រឡះ ហើយនៅក្នុងសេចក្តីសង្ឃឹមថាពួកគេនឹងកែប្រែជំនឿយ៉ាងឆាប់រហ័សនោះ លោកបានទទួលរងនូវការខកចិត្តយ៉ាងជូរចត់ទៅវិញ។ ទោះបីជា «បានអធិប្បាយដោយនូវព្រះនាមនៃព្រះអម្ចាស់យេស៊ូវ ដោយក្លាហាន គាត់សម្តែងហើយ​ជជែកជា​មួយ​នឹងពួកហេលេន» ក៏ដោយ ក៏ពួកអ្នកដែលជាមេលើពួកជំនុំសាសន៍យូដាមិនព្រមជឿដែរតែ «ពួកនោះរករឿងសម្លាប់គាត់វិញ»។ លោកមានទុក្ខកង្វល់ពេញក្នុងដួងចិត្ត លោកសុខចិត្តលះបង់អាយុជីវិតរបស់លោក ប្រសិនបើការ​នោះអាចនាំឲ្យពួកគេមួយចំនួនមានចំណេះដឹងពីសេចក្តីពិត។ លោកបានគិតដោយអៀនខ្មាសអំពីផ្នែកដ៏សកម្មដែលលោកបានចូលរួមប្រព្រឹត្តទៅលើទុក្ករកម្មរបស់លោកស្ទេផាន ហើយឥឡូវនេះ លោកបានលុបបំបាត់​ស្លាក​ស្នាម ដែលដិតដាមនៅលើអ្នកដែលបានចោទប្រកាន់ខុសទាំងនេះ ដោយក្តី​ថប់បារម្ភ លោកបានស្វះស្វែងបញ្ជាក់ពីសេចក្តីពិតដែលលោកស្ទេផានសុខចិត្តលះបង់ជីវិតនោះ។

ដោយទទួលបន្ទុកជំនួសពួកអ្នកដែលបដិសេធមិនព្រមជឿ លោកប៉ុលកំពុងអធិដ្ឋាននៅក្នុងព្រះវិហារ ដូចលោក​បាន​បញ្ជាក់​នៅពេល​ក្រោយ​មក​ទៀត​ កាលលោកបានលង់ស្មារតីទៅ ខណៈនោះទេវតាដែលជាអ្នកនាំសារនៃឋានសួគ៌ បានលេចមកនៅចំពោះលោក ហើយបានមានបន្ទូលថា «ចូរប្រញាប់ចេញពីក្រុងយេរូសាឡិមទៅជាឆាប់ ពីព្រោះគេមិនទទួលពាក្យដែលអ្នកធ្វើបន្ទាល់ពីខ្ញុំទេ» (កិច្ចការ ២២:១៨)។

លោកប៉ុលនៅតែចង់នៅក្នុងទីក្រុងយេរូសាឡិម ជាកន្លែងដែល​លោកអាចប្រឈមនឹងការប្រឆាំងបន្តទៅទៀត ចំពោះលោក ការគេចខ្លួន​ហាក់ដូច​ជាសកម្មភាពដ៏កំសាកមួយ ប្រសិនបើលោកបន្តស្នាក់នៅទីនោះបន្តទៅទៀត លោកប្រហែលជាអាចបំផ្លាស់បំប្រែពួកយូដាដែលចចេសរឹងរូសមួយចំនួន អំពីសេចក្តីពិតពីសារនៃដំណឹងល្អ ទោះបីជាការបន្តស្នាក់នៅទីនោះនាំឲ្យលោកត្រូវបាត់បង់ជីវិតក៏ដោយ។ ហេតុដូច្នេះ លោកបានឆ្លើយថា «ព្រះ​អម្ចាស់​អើយ អ្នកទាំងនោះដឹងថាទូលបង្គំបានចាប់ពួកអ្នកដែលជឿដល់ទ្រង់ដាក់គុកហើយ ព្រមទាំងវាយគេនៅក្នុងគ្រប់ទាំងសាលាប្រជុំផង កាលដែល​ឈាមស្ទេផាន ជាស្មរបន្ទាល់របស់ទ្រង់ បានត្រូវខ្ចាយ នោះទូលបង្គំ​ក៏ឈរ​នៅទីនោះដែរ បានទាំងយល់ព្រមឲ្យសម្លាប់គាត់ ហើយនៅចាំអាវនៃពួកអ្នកដែលសម្លាប់គាត់ផង»។ ប៉ុន្តែ ការនេះមិនស្របទៅនឹងបំណង​ព្រះហឫទ័យ​របស់ព្រះទេ ដែលអ្នកបម្រើរបស់ទ្រង់មិនចាំបាច់យកជីវិតទៅប្តូរដូច្នេះឡើយ ហើយទេវតាដែលជាអ្នកនាំសារនៃឋានសួគ៌ក៏បានឆ្លើយតបមកវិញថា «ចូរទៅចុះ ដ្បិតខ្ញុំនឹងចាត់អ្នកឲ្យទៅឯសាសន៍ដទៃដែលនៅឆ្ងាយ» (កិច្ចការ ២២:១៩-២១)។

ដោយបានដឹងពីការបើកសម្តែងនេះ បងប្អូនលោកបានបង្ខំឲ្យលោកប៉ុលគេចខ្លួនពីទីក្រុងយេរូសាឡិម ដោយខ្លាចក្រែងគេសម្លាប់លោក។ «នោះ​គេ​ជូនគាត់ទៅត្រឹមសេសារារួចឲ្យទៅឯតើសុស»។ ការចាកចេញ​របស់លោកប៉ុលបានផ្អាកការប្រឆាំងដ៏ហិង្សារបស់សាសន៍យូដាមួយរយៈ ពួកជំនុំក៏មាន​ឱកាសបានសម្រាក ដែលមានមនុស្សជាច្រើនត្រូវបានបញ្ចូលបន្ថែមទៅក្នុងចំនួនពួកអ្នកជឿ។