កិច្ចការនៃពួកសាវ័ក (ជំពូកទី-១៤)
អំណានព្រះគម្ពីរប្រចាំថ្ងៃ៖ ពង្សាវតាក្សត្រទី១ ជំពូក១៤
ខព្រះគម្ពីរប្រចាំថ្ងៃ៖ រួចគាត់និយាយទៅគេថា អ្នករាល់គ្នាដឹងថា មនុស្សសាសន៍យូដាគ្មានច្បាប់នឹងសេពគប់នឹងសាសន៍ដទៃ ឬនឹងចូលទៅជិតគេឡើយ តែព្រះទ្រង់បានសំដែងឲ្យខ្ញុំដឹងថា មិនត្រូវរាប់អ្នកណាថាមិនស្អាត ឬមិនបរិសុទ្ធឡើយ ។ កិច្ចការ ១០:២៨
បន្ទាប់ពីធ្វើបទសម្ភាសជាមួយនឹងលោកកូនេលាសរួចមក ទេវតានោះក៏បានយាងទៅឯលោកពេត្រុសនៅយ៉ុបប៉េ។ នៅពេលនោះលោកពេត្រុសកំពុងតែអធិដ្ឋាននៅលើដំបូលផ្ទះដែលលោកស្នាក់អាស្រ័យនៅ ហើយយើងបានអានដឹងថាលោក «គាត់នឹកឃ្លានជាខ្លាំង ចង់បរិភោគតែកំពុងដែលគេចាត់ចែងឲ្យ នោះគាត់លង់ស្មារតីទៅ»។ លោកពេត្រុសមិនមែនឃ្លានត្រឹមតែអាហារខាងរាងកាយប៉ុណ្ណោះទេ។ នៅពេលលោកបានសម្លឹងមើលពីលើដំបូលផ្ទះទៅ លោកបានឃើញទីក្រុងយ៉ុបប៉េនិងតំបន់ជនបទទាំងឡាយដែលនៅជុំវិញនោះ លោកបានស្រេកឃ្លានចង់បានសេចក្តីសង្រ្គោះសម្រាប់បងប្អូនរួមជាតិរបស់លោកជាខ្លាំង។ លោកមានបំណងពុះពោរចង់ចង្អុលបង្ហាញប្រាប់ដល់ពួកគេអំពីបទទំនាយដែលទាក់ទងទៅនឹងការឈឺចាប់ និងការសុគតរបស់ព្រះគ្រិស្ត។
នៅក្នុងការបើកសម្តែងនោះលោកពេត្រុស «គាត់ឃើញមេឃចំហហើយមានប្រដាប់ ដូចជាសំពត់កម្រាលយ៉ាងធំ បានចុះមកចងទាំងបួនជ្រុង សម្រូតមកដល់ដី នៅក្នុងសំពត់នោះ មានសត្វជើងបួន សត្វព្រៃ សត្វលូនវារគ្រប់មុខ ដែលនៅលើដី និងសត្វហើរលើអាកាសដែរ ក៏ឮសំឡេងមានព្រះបន្ទូលមកថា ពេត្រុសអើយ ចូរក្រោកឡើងសម្លាប់ ហើយបរិភោគទៅ តែពេត្រុសប្រកែកថា ទេព្រះអម្ចាស់ ដ្បិតទូលបង្គំមិនដែលទទួលទានអ្វី ដែលមិនស្អាតមិនបរិសុទ្ធនោះសោះ រួចឮសំឡេងនោះមកម្តងទៀតថា របស់អ្វីដែលព្រះបានសម្អាតហើយ នោះកុំឲ្យអ្នករាប់ថាជាមិនស្អាតឡើយ ការនោះមានមកគ្រប់បីដង រួចបានលើកប្រដាប់នោះ ឡើងទៅលើមេឃវិញ»។
ការបើកសម្តែងនេះបាននាំមកឲ្យលោកពេត្រុសទាំងការស្តីបន្ទោស និងការបង្ហាត់បង្រៀន។ ការបើកសម្តែងនោះបានបង្ហាញពីព្រះរាជគោលបំនងរបស់ព្រះដល់លោក ដែលមានសេចក្តីថា ដោយការសុគតរបស់ព្រះគ្រិស្ត បានធ្វើឲ្យសាសន៍ដទៃបានទទួលមរតកជាមួយនឹងសាសន៍យូដា ជាអ្នកទទួលព្រះពរនៃសេចក្តីសង្រ្គោះដូចគ្នាដែរ។ ខណៈនោះពួកសិស្សមិនទាន់បានផ្សព្វផ្សាយដំណឹងល្អដល់សាសន៍ដទៃនៅឡើយទេ។ ជញ្ជាំងបែងចែកនៅកណ្តាលពួកគេ ដែលបានបំបែកដោយសារការសុគតរបស់ព្រះគ្រិស្តទៅហើយនោះ នៅមានក្នុងគំនិតរបស់ពួកគេនៅឡើយ ហើយការងាររបស់ពួកគេត្រូវបានកំណត់ព្រំដែនជាមួយនឹងសាសន៍យូដា ព្រោះពួកគេនៅតែសម្លឹងមើលទៅពួកសាសន៍ដទៃថាជាអ្នកដែលត្រូវកាត់ផ្តាច់ចេញពីដំណឹងល្អនៅឡើយ។ ឥឡូវនេះ ព្រះជាម្ចាស់បានស្វះស្វែងបង្រៀនដល់លោកពេត្រុសអំពីផែនការរបស់ព្រះដែលត្រូវលាតសន្ធឹងពាសពេញសកលលោក។
ពួកសាសន៍ដទៃជាច្រើនធ្លាប់ជាអ្នកស្តាប់ការអធិប្បាយរបស់លោកពេត្រុស និងសាវ័កដទៃទៀត យ៉ាងយកចិត្តទុកដាក់ ហើយពួកសាសន៍យូដាដែលនិយាយភាសាក្រិកជាច្រើននាក់បានទទួលជឿព្រះគ្រិស្ត ប៉ុន្តែ ការបើកសម្តែងដល់លោកកូនេលាសគឺជារឿងដ៏សំខាន់ដំបូងបង្អស់មួយនៅក្នុងចំណោមសាសន៍ដទៃ។
ពេលវេលាបានមកដល់ ដែលតំណាក់ការនៃកិច្ចការថ្មីទាំងស្រុងត្រូវបានធ្លាក់មកលើពួកជំនុំរបស់ព្រះគ្រិស្ត។ ទ្វារដែលពួកអ្នកជឿសាសន៍យូដាជាច្រើនបានបិទ ប្រឆាំងនឹងសាសន៍ដទៃនោះ ឥឡូវនេះត្រូវបានព្រះទាញបើកវិញហើយ។ ហើយពួកសាសន៍ដទៃដែលបានទទួលដំណឹងល្អត្រូវបានគេគោរពឲ្យមានភាពស្មើគ្នាជាមួយនឹងពួកសិស្សដែលជាសាសន៍យូដា ដោយមិនចាំបាច់ធ្វើពិធីផ្សេងៗ ឬកាត់ស្បែកឡើយ។
ព្រះបានធ្វើការប្រុងប្រយ័ត្នយ៉ាងអស្ចារ្យ ដើម្បីយកជ័យជម្នះលើការប្រកាន់ពូជសាសន៍ទាស់នឹងសាសន៍ដទៃ ដែលបានដក់ជាប់នៅក្នុងគំនិតរបស់លោកពេត្រុស ដោយសារការអប់រំជាសាសន៍យូដារបស់លោកនេះ! ដោយការបើកសម្តែងអំពីផ្ទាំងសំពត់និងសត្វដែលនៅក្នុងនោះ ព្រះបានស្វះស្វែងបង្វែរគំនិតនៃការប្រកាន់ពូជសាសន៍ របស់ពួកសាវ័ក និងដើម្បីបង្រៀនពីសេចក្តីពិតដ៏សំខាន់ថា នៅនគរឋានសួគ៌នឹងមិនមានការឲ្យតម្លៃចំពោះមនុស្សមិនស្មើគ្នាឡើយ គឺសាសន៍យូដានិងសាសន៍ដទៃសុទ្ធតែមានតម្លៃដូចៗគ្នា នៅចំពោះព្រះនេត្ររបស់ព្រះ និងថាសាសន៍ដទៃត្រូវបានបង្កើតជាអ្នកទទួលព្រះពរនិងកិត្តិយសនៃដំណឹងល្អ តាមរយៈព្រះគ្រិស្ត។
ខព្រះគម្ពីរប្រចាំថ្ងៃសប្តាហ៍៖ ព្រះយេហូវ៉ាទ្រង់ជាថ្មដា ជាបន្ទាយហើយជាអ្នកជួយសង្គ្រោះរបស់ទូលបង្គំ គឺជាព្រះនៃទូលបង្គំ ជាថ្មដាដែលទូលបង្គំយកជាទីពឹង ក៏ជាខែល ជាស្នែងនៃសេចក្តីសង្គ្រោះរបស់ទូលបង្គំ ហើយជាប៉មយ៉ាងខ្ពស់ផង។ (ទំនុកតម្កើង ១៨:២)
