ថ្ងៃព្រហស្បតិ៍ ទី០៦ ខែសីហា ឆ្នាំ២០២០
កិច្ចការនៃពួកសាវ័ក (ជំពូកទី-១២)
អំណានព្រះគម្ពីរប្រចាំថ្ងៃ៖ ពង្សាវតាក្សត្រទី១ ជំពូក៣
ខព្រះគម្ពីរប្រចាំថ្ងៃ៖ ប៉ុន្តែ កំពុងដែលគាត់ដើរតាមផ្លូវ ទៅជិតនឹងដល់ក្រុងដាម៉ាសហើយ នោះស្រាប់តែមានពន្លឺពីលើមេឃ ភ្លឺមកនៅជុំវិញខ្លួន គាត់ក៏ដួលដល់ដី រួចឮសំឡេងមានព្រះបន្ទូលមកថា សុល នែសុល ហេតុអ្វីបានជាអ្នកបៀតបៀនដល់ខ្ញុំដូច្នេះ គាត់ទូលឆ្លើយថា ឱព្រះអម្ចាស់អើយ ព្រះអង្គណានុ៎ះ រួចព្រះអម្ចាស់ទ្រង់តបថា ខ្ញុំនេះជាព្រះយេស៊ូវ ដែលអ្នកបៀតបៀន អ្នកធាក់ជល់នឹងជន្លួញដូច្នេះ នោះពិបាកដល់អ្នកណាស់។ កិច្ចការ ៩:៣-៥
ពួកសង្ឃនិងពួកមេដឹកនាំសាសនាបានសង្ឃឹមថា ដោយការខំប្រឹងប្រែងយ៉ាងប្រុងប្រយ័ត្ននិងការធ្វើទុក្ខបៀតបៀនយ៉ាងតឹងរ៉ឹង ពួកអ្នកមានជំនឿនឹងត្រូវបានបង្រ្កាប។ ឥឡូវនេះ ពួកគេបានគិតថា ពួកគេត្រូវតែពង្រីកការធ្វើទុក្ខបៀតបៀនប្រឆាំងទៅនឹងការបង្រៀនថ្មី ដែលពួកគេបានអនុវត្តនៅទីក្រុងយេរូសាឡិមនិងកន្លែងផ្សេងៗទៀត។ សម្រាប់កិច្ចការពិសេសដែលពួកគេបានសម្រេចចិត្តនឹងបង្ហើយនៅទីក្រុងដាម៉ាស លោកសុលបានស្ម័គ្រចិត្តចេញទៅបំពេញភារកិច្ចនេះ។ «ឯសុល គាត់នៅតែបញ្ចេញសេចក្តីគំរាម និងពាក្យកំហែង ព្រមទាំងការសម្លាប់ ដល់ពួកសិស្សនៃព្រះអម្ចាស់នៅឡើយ» លោក «ក៏ទៅឯសម្តេចសង្ឃ សូមសំបុត្រកាន់យកទៅឯសាលាប្រជុំទាំងប៉ុន្មាន នៅក្រុងដាម៉ាស ប្រយោជន៍ដើម្បី បើឃើញមានអ្នកណាខ្លះ ដែលប្រតិបត្តិតាមផ្លូវនោះ ទោះប្រុសឬស្រីក្តី នោះនឹងចាប់ចងគេ នាំមកឯក្រុងយេរូសាឡិម។ នោះ «ទូលបង្គំបានទទួលអំណាច និងសេចក្តីបង្គាប់មកពីពួកសង្គ្រាជ» (កិច្ចការ ២៦:១២) ដោយកម្លាំងនិងសម្បទារបស់មនុស្ស និងភ្លើងនៃចិត្តពុះកញ្រ្ជោលក្នុងការប្រព្រឹត្តខុស លោកសុលនៃស្រុកតើសុសបានចេញដំណើរដែលមិនអាចបំភ្លេចបាននោះ មានហេតុការណ៍ដ៏ចម្លែកមួយបានកើតឡើង ដែលបានផ្លាស់ប្តូរខ្សែជីវិតទាំងស្រុង។
នៅចុងក្រោយបង្អស់នៃការធ្វើដំណើរនេះ «នៅកណ្តាលថ្ងៃត្រង់» ពេលដែលអ្នកធ្វើដំណើរយ៉ាងហេវហត់បានមកជិតដល់ទីក្រុងដាម៉ាស ពួកគេបានមកដល់វាលដ៏សំបូរជីរជាតិមួយ ដែលមានសួនច្បារស្រស់បំព្រង និងផល្លានុផលជាច្រើន ស្រោចស្រពដោយទឹកជ្រោះដែលហូរមកពីជូរភ្នំដែលព័ទ្ធជុំវិញ ។ ក្រោយពីការធ្វើដំណើរកាត់វាលយ៉ាងកណ្តោចកណ្តែងអស់ពេលជាច្រើនថ្ងៃមក ទស្សនីយភាពបែបនេះ ពិតជាធ្វើឲ្យអារម្មណ៍រីករាយយ៉ាងក្រៃលែង ។ នៅពេលដែលលោកសុលនិងអ្នករួមដំណើរជាមួយលោក បានឃើញទីវាលដែលមានផ្លែឈើគ្រប់មុខ និងទីក្រុងដ៏ល្អឆើតនៅពីក្រោម រំពេចនោះស្រាប់តែ ដូចលោកបានមានប្រសាសន៍ថា «នោះស្រាប់តែមានពន្លឺពីលើមេឃ ភ្លឺមកជុំវិញទូលបង្គំ និងពួកអ្នកដើរជាមួយ ជាពន្លឺភ្លឺជាងថ្ងៃ»(កិច្ចការ ២៦:១៣) ភ្លឺចាំងចែងដែលភ្នែកមនុស្សមិនអាចទ្រាំទ្របាន។ លោកសុលបានដួលទៅនឹងដីទាំងខ្វាក់ភ្នែក និងវិលវល់គំនិត។
នៅពេលដែលពន្លឺបានបន្តចែងចាំងនៅជុំវិញពួកគេ លោកសុលបានឮសំឡេងថា «សុល នែសុល ហេតុអ្វីបានជាអ្នកបៀតបៀនដល់ខ្ញុំដូច្នេះ គាត់ទូលឆ្លើយថា ឱព្រះអម្ចាស់អើយ ព្រះអង្គណានុ៎ះ រួចព្រះអម្ចាស់ទ្រង់តបថា ខ្ញុំនេះជាព្រះយេស៊ូវ ដែលអ្នកបៀតបៀន អ្នកធាក់ជល់នឹងជន្លួញដូច្នេះ នោះពិបាកដល់អ្នកណាស់»។ ពោរពេញទៅដោយការភ័យខ្លាច និងសឹងតែងងឹតភ្នែកដោយសារពន្លឺដ៏ភ្លឺចាំងនោះ ពួកអ្នករួមដំណើរជាមួយនឹងលោកសុលបានឮសំឡេង តែមើលមិនឃើញមនុស្សឡើយ។ ប៉ុន្តែ សម្រាប់លោកសុល លោកយល់នូវព្រះបន្ទូលដែលបានមានបន្ទូលមកកាន់លោក ហើយព្រះដែលបានមានបន្ទូលនេះបានបង្ហាញអង្គទ្រង់ឲ្យលោកបានឃើញ គឺព្រះរាជបុត្រនៃព្រះ។ លោកបានឃើញព្រះដែលគេបានឆ្កាងឈរនៅចំពោះលោក។ រូបភាពនៃព្រះភក្រ្តរបស់ព្រះអង្គសង្រ្គោះបានដិតជាប់នៅក្នុងចិត្តបុរសសាសន៍យូដាដែលត្រូវវាយប្រហាររូបនេះជារៀងរហូត។ ពាក្យពេចន៍ដែលលោកបានឮ ដក់ជាប់ក្នុងចិត្តជាមួយនឹងកម្លាំងដ៏គួរឲ្យភ័យញ័ររន្ធត់។ នៅក្នុងបន្ទប់ដ៏ងងឹតខាងគំនិតមានពន្លឺធ្លាក់មកហូរហៀរដូចទឹកជំនន់ បង្ហាញពីភាពល្ងិតល្ងង់និងកំហុសនៃជីវិតអតីតកាលរបស់លោក ហើយពេលនេះលោកត្រូវការការបំភ្លឺនៃព្រះវិញ្ញាណបរិសុទ្ធ។
ឥឡូវនេះ លោកសុលបានដឹងថាការធ្វើទុក្ខបៀតបៀនដល់ពួកសិស្សរបស់ព្រះយេស៊ូវ លោកកំពុងតែធ្វើកិច្ចការរបស់សាតាំងហើយ។ លោកបានឃើញថាការយល់ត្រូវ និងភារកិច្ចរបស់លោកបានពឹងផ្អែកទាំងស្រុងទៅលើពួកសង្ឈនិងពួកដឹកនាំសាសនា។ លោកបានជឿពួកគេ នៅពេលគេបានប្រាប់លោកថារឿងការមានព្រះជន្មរស់ឡើងវិញ គឺជារឿងប្រឌិតដ៏ចំឡែករបស់ពួកសិស្ស។ ឥឡូវនេះ ខណៈដែលព្រះយេស៊ូវបានឈរនៅក្បែរលោក សុលហើយលោកសុលបានជឿនូវសេចក្តីពិតដែលពួកសិស្សបានប្រកាស។
ខព្រះគម្ពីរប្រចាំថ្ងៃសប្តាហ៍៖ នោះគាត់ក៏ញាប់ញ័រទាំងអស្ចារ្យក្នុងចិត្ត ហើយទូលថា ព្រះអម្ចាស់អើយ តើទ្រង់សព្វព្រះហឫទ័យឲ្យទូលបង្គំធ្វើដូចម្តេច ព្រះអម្ចាស់មានព្រះបន្ទូលថា ចូរក្រោកឡើងចូលទៅក្នុងទីក្រុងទៅ នោះគេនឹងប្រាប់អ្នក ឲ្យដឹងពីការដែលអ្នកត្រូវធ្វើ។ (កិច្ចការ ៩:៦)
