កិច្ចការនៃពួកសាវ័ក (ជំពូកទី-១២)
អំណានព្រះគម្ពីរប្រចាំថ្ងៃ៖ ពង្សាវតាក្សត្រទី១ ជំពូក៤
ខព្រះគម្ពីរប្រចាំថ្ងៃ៖ ចូរក្រោកឈរឡើង ដ្បិតខ្ញុំបានលេចមកឲ្យអ្នកឃើញ ដើម្បីនឹងតាំងអ្នក ឲ្យធ្វើជាអ្នកបំរើ ហើយជាទីបន្ទាល់ ពីអស់ទាំងការដែលអ្នកបានឃើញហើយ ព្រមទាំងការដែលខ្ញុំនឹងលេចមក ឲ្យអ្នកឃើញទៅមុខទៀត។ កិច្ចការ ២៦:១៦
នៅពេលដែលមានការបំភ្លឺព្រោងព្រាតពីព្រះនៃឋានសួគ៌ នោះគំនិតរបស់លោកសុលបានធ្វើសកម្មភាពយ៉ាងរហ័សគួរឲ្យកត់សម្គាល់។ កំណត់ត្រានៃបទទំនាយស្តីពីការត្រាស់បង្គាប់នៃព្រះវិញ្ញាណត្រូវបានបើកចំហឲ្យលោកបានយល់។ លោកឃើញថាការបដិសេធន៍ព្រះយេស៊ូវពីសំណាក់សាសន៍យូដា ការជាប់ឆ្កាងរបស់ទ្រង់ ការមានព្រះជន្មរស់ឡើងវិញ និងការយាងឡើងទៅឋានសួគ៌របស់ទ្រង់ ត្រូវបានពួកហោរាប្រាប់ឲ្យដឹងជាមុន និងបានបញ្ជាក់ថាព្រះអង្គគឺជាព្រះមែស្ស៊ីដែលព្រះបានសន្យាពិតប្រាកដមែន ។ សេចក្តីអធិប្បាយរបស់លោកស្ទេផាន នៅពេលទុក្ករកម្មរបស់លោកបានកើតឡើងនៅក្នុងគំនិតរបស់លោកសុលដោយបង្ខំ ហើយលោកបានទទួលស្គាល់ថាទុក្ករបុគ្គលពិតជាបានឃើញ «សិរីល្អរបស់ព្រះ» ប្រាកដមែន នៅពេលដែលលោកបាននិយាយថា «មើល ខ្ញុំឃើញមេឃចំហ និងកូនមនុស្សឈរនៅខាងព្រះហស្តស្តាំនៃព្រះ» (កិច្ចការ ៧:៥៥, ៥៦)។ ពួកសង្ឃបានប្រកាសថាពាក្យទាំងនេះគឺជាការប្រមាថ ប៉ុន្តែ ឥឡូវនេះ លោកសុលបានដឹងថាពាក្យទាំងនោះគឺជាពាក្យពិត។
ការទាំងអស់នេះត្រូវបានបើកបង្ហាញយ៉ាងច្បាស់ដល់អ្នកធ្វើទុក្ខបៀតបៀនម្នាក់នេះ! ឥឡូវនេះ លោកសុលបានដឹងពីសេចក្តីពិតដែលថាព្រះមែស្ស៊ីដែលព្រះបានសន្យាថា ទ្រង់បានយាងមកកាន់ផែនដីនេះ ជាព្រះយស៊ូវនៃស្រុកណាសារ៉ែត ហើយត្រូវបានមនុស្សដែលទ្រង់បានយាងមកជួយសង្រ្គោះត្រូវបានបដិសេធទ្រង់។ លោកក៏បានដឹងផងដែរថាព្រះអង្គសង្រ្គោះបានមានព្រះជន្មរស់ចេញពីផ្នូរដោយជោគជ័យ ហើយបានយាងឡើងទៅឋានសួគ៌។ នៅក្នុងឱកាសនៃការបើកបង្ហាញរបស់ព្រះនេះ លោកសុលបាននឹកឃើញទាំងរន្ធត់ពីលោកស្ទេផានដែលបានផ្តល់ទីបន្ទាល់នៃព្រះអង្គសង្រ្គោះដែលគេបានឆ្កាង និងបានមានព្រះជន្មរស់ពីសុគតឡើងវិញ ដែលមនុស្សមានជំនឿលើទ្រង់បានលះបង់ដើម្បីព្រះអង្គ ហើយដែលក្រោយមកទៀតតាមរយៈពួកគេ ដែលជាឧបករណ៍របស់ទ្រង់ មនុស្សជាច្រើនទៀតដែលជាសិស្សដ៏មានតម្លៃរបស់ព្រះយេស៊ូវ បានជួបប្រទះនឹងសេចក្តីស្លាប់ ដោយសារការធ្វើទុក្ខបៀតបៀនយ៉ាងឃោរឃៅ។
ព្រះអង្គសង្រ្គោះបានមានបន្ទូលទៅកាន់លោកសុលតាមរយៈលោកស្ទេផាន ដែលគ្មានអ្នកណាអាចប្រឆាំងនឹងការគិតគូរពិចារណារបស់លោកបានឡើយ។ អ្នកប្រាជ្ញសាសន៍យូដានេះបានឃើញទឹកមុខរបស់ទុក្ករបុគ្គលស្ទេផានឆ្លុះបញ្ចាំងពីសិរីល្អរបស់ព្រះអង្គសង្រ្គោះ ដែលមានលក្ខណៈដូចជា «មុខទេវតា» (កិច្ចការ ៦:១៥)។ លោកធ្លាប់បានឃើញការអត់ទ្រាំរបស់លោកស្ទេផាន ជាមួយនឹងសត្រូវរបស់លោក និងការអត់ឱនទោសរបស់លោកចំពោះពួកគេ។ លោកក៏ធ្លាប់បានឃើញការអត់ធ្មត់និងការលះបង់ដ៏រីករាយរបស់មនុស្សជាច្រើន ដែលលោកធ្លាប់បានធ្វើឲ្យឈឺចាប់និងរងទុក្ខវេទនា។ លោកក៏ធ្លាប់បានឃើញពួកអ្នកខ្លះហ៊ានលះបង់រហូតដល់អាយុជីវិតរបស់ខ្លួនដោយអំណរដើម្បីជាប្រយោជន៍ដល់សេចក្តីជំនឿរបស់ពួកគេផងដែរ។
រឿងទាំងអស់នេះបានស្រែកអំពាវនាយ៉ាងឮ នៅក្នុងគំនិតរបស់លោកប៉ុល ហើយលោកបានទុកចិត្តដល់គំនិតរបស់លោកជាច្រើនដង ហើយលោកសឹងតែជឿជាក់យ៉ាងច្បាស់ថាព្រះយេស៊ូវពិតជាព្រះមែស្ស៊ីដែលព្រះបានសន្យាប្រាកដមែន។ នៅក្នុងឱកាសទាំងនោះ លោកបានតស៊ូពុះពារពេញមួយយប់ តទល់នឹងមនសិការរបស់ខ្លួនឯង ហើយលោកតែងតែបញ្ចប់បញ្ហានោះទៅដោយការទទួលស្គាល់ជាដាច់ខាតថា ព្រះយេស៊ូវមិនមែនជាព្រះមែស្ស៊ីទេ ហើយពួកសិស្សរបស់ព្រះអង្គគឺជាពួកបោកបញ្ឆោតដ៏ប៉ិនប្រសប់។
ឥឡូវនេះ ព្រះគ្រិស្តបានមានបន្ទូលមកកាន់លោកសុលដោយព្រះសូរសៀងផ្ទាល់របស់ព្រះអង្គថា «សុល នែសុល ហេតុអ្វីបានជាអ្នកបៀតបៀនដល់ខ្ញុំដូច្នេះ?» ហើយជាចម្លើយតបទៅនឹងសំណួររបស់លោកសុលថា «ឱព្រះអម្ចាស់អើយ ព្រះអង្គណានុ៎ះ?» ព្រះអង្គបានមានបន្ទូលថា «ខ្ញុំនេះជាព្រះយេស៊ូវ ដែលអ្នកបៀតបៀន»។ នៅទីនេះព្រះគ្រិស្តបានបង្ហាញអង្គទ្រង់ឲ្យរាស្រ្តរបស់ព្រះអង្គបានស្គាល់។ ដោយការធ្វើទុក្ខបៀតបៀនដល់ពួកសិស្សរបស់ព្រះយេស៊ូវ លោកសុលបានវាយប្រហារទៅលើព្រះអម្ចាស់នៃឋានសួគ៌ដោយផ្ទាល់។ ដោយការចោទប្រកាន់ខុស និងបានធ្វើទីបន្ទាល់ប្រឆាំងទៅនឹងពួកគេ ក៏ដូចជាបានចោទប្រកាន់ខុស និងបានធ្វើទីបន្ទាល់ទាស់នឹងព្រះអង្គសង្រ្គោះនៃពិភពលោកដោយផ្ទាល់ដែរ។
ខព្រះគម្ពីរប្រចាំថ្ងៃសប្តាហ៍៖ នោះគាត់ក៏ញាប់ញ័រទាំងអស្ចារ្យក្នុងចិត្ត ហើយទូលថា ព្រះអម្ចាស់អើយ តើទ្រង់សព្វព្រះហឫទ័យឲ្យទូលបង្គំធ្វើដូចម្តេច ព្រះអម្ចាស់មានព្រះបន្ទូលថា ចូរក្រោកឡើងចូលទៅក្នុងទីក្រុងទៅ នោះគេនឹងប្រាប់អ្នក ឲ្យដឹងពីការដែលអ្នកត្រូវធ្វើ។ (កិច្ចការ ៩:៦)
