អំណាន​​ព្រះគម្ពីរប្រចាំថ្ងៃ៖ ពង្សាវតាក្សត្រទី១ ជំពូក៦

ខព្រះគម្ពីរប្រចាំថ្ងៃ៖ ដូច្នេះ អាន៉្នានាស​ក៏​ទៅ ហើយ​ចូល​ក្នុង​ផ្ទះ​នោះ ដាក់​ដៃ​លើ​គាត់ និយាយ​ថា អ្នក​សុល​អើយ ព្រះអម្ចាស់ គឺ​ព្រះយេស៊ូវ ដែល​លេច​មក​ឲ្យ​អ្នក​ឃើញ​តាម​ផ្លូវ ទ្រង់​បាន​ចាត់​ខ្ញុំ​មក ដើម្បី​ឲ្យ​អ្នក​បាន​ភ្លឺ​ភ្នែក ហើយ​ឲ្យ​អ្នក​បាន​ពេញ​ជា​ព្រះវិញ្ញាណ​បរិសុទ្ធ។ កិច្ចការ ៩:១៧

នៅក្នុងអំឡុងពេលដែលលោកសុលនៅដាច់ពីអ្នកដទៃយ៉ាងយូរ តែពីរ​នាក់ជាមួយនឹងព្រះនោះ លោកបានរំឭកពីបទគម្ពីរជាច្រើនដែលសម្តែងពីការយាងមកជាលើកទីមួយរបស់ព្រះគ្រិស្ត។ លោកបានតាមដានបទទំនាយយ៉ាងយកចិត្តទុកដាក់ ជាមួយនឹងការចងចាំដែលបានដុសខាត់​ដោយការភ្ញាក់រឭកដែលបានកើតឡើងនៅក្នុងគំនិតរបស់លោក។ នៅពេលដែលលោកបានឆ្លុះបញ្ចាំងពីអត្ថន័យនៃបទទំនាយទាំងនេះ លោកមានការភ្ញាក់ផ្អើលជាខ្លាំងចំពោះភាពងងឹតងងល់នៃការមិនបានយល់កន្លងមករបស់លោក និងភាពងងឹតងងល់របស់សានស៍យូដាជាទូទៅ ដែលបានដឹកនាំឲ្យមានការបដិសេធន៍ព្រះយេស៊ូវថាជាព្រះមែស្ស៊ីតាមបទទំនាយ។

ខណៈដែលលោកសុលបានទោរទន់ទៅតាមការណែនាំរបស់ព្រះវិញ្ញាណបរិសុទ្ធទាំងស្រុង នោះលោកបានឃើញទោសកំហុសនៃជីវិតរបស់លោក ហើយបានទទួលស្គាល់ការទាមទារយ៉ាងទូលំទូលាយនៃក្រឹត្យវិន័យរបស់ព្រះ។ លោកសុលដែលធ្លាប់ជាអ្នកផារិស៊ីដ៏អំនួត ឥឡូវនេះបានឱនក្រាបនៅចំពោះព្រះដោយការបន្ទាបខ្លួននិងភាពសាមញ្ញដូចជាកូនក្មេង ដោយ​លន់តួភាពគ្មានតម្លៃរបស់លោក ហើយទូលអង្វរករសុំសេចក្តីមេត្តាករុណានៃព្រះអង្គសង្រ្គោះដែលគេបានឆ្កាងនិងបានមានព្រះជន្មរស់ឡើងវិញ។ លោកសុលអន្ទះសាចង់រួបរួមជាមួយនឹងព្រះវរបិតានិងព្រះរាជបុត្រា ហើយនៅក្នុងកម្លាំងនៃសេចក្តីប្រាថ្នាចង់បានការអត់ឱនទោសនិងការទទួលយករបស់លោក លោកបានទូលថ្វាយដោយអង្វរករដល់បល្ល័ង្កនៃព្រះគុណ។

ការអធិដ្ឋានរបស់អ្នកផារិស៊ីដែលមានវិប្បដិសារីរូបនេះមិនឥតប្រយោជន៍ទេ។ ព្រះគុណនៃព្រះបានបំផ្លាស់បំប្រែចិត្តនិងអារម្មណ៍ពីខាងក្នុងរបស់លោក ហើយព្រះអង្គក៏បាននាំឲ្យញាណសតិរបស់លោកឲ្យបានស្រុះស្រួលគ្នា ជាមួយនឹងព្រះរាជគោលបំណងដ៏អស់កល្បរបស់ព្រះ ។ ព្រះគ្រិស្តនិងសេចក្តីសុចរិតរបស់ទ្រង់មានតម្លៃចំពោះលោកសុលជាងពិភពលោកទាំងមូលទៅទៀត។

ការផ្លាស់ប្តូរជំនឿរបស់លោកសុលគឺជាភស្តុតាងជាក់ស្តែងមួយនៃព្រះចេស្តាដ៏អស្ចារ្យនៃព្រះវិញ្ញាណបរិសុទ្ធដើម្បីបង្ហាញមនុស្សឲ្យស្គាល់បាប។ លោកបានជឿជាក់ថាព្រះយេស៊ូវពីស្រុកណសារ៉ែតបានប្រមាថដល់ក្រឹត្យវិន័យរបស់ព្រះ ហើយបានបង្រៀនដល់ពួកសិស្សរបស់ទ្រង់ថាក្រឹត្យវិន័យនោះលែងមានប្រសិទ្ធិភាពតទៅទៀតហើយ ។ ប៉ុន្តែ បន្ទាប់ពីការផ្លាស់ប្តូរជំនឿរបស់លោកមក លោកសុលបានទទួលស្គាល់ថាព្រះយេស៊ូវគឺជាព្រះដែលបានយាងមកកាន់ពិភពលោកនេះ ដើម្បីបង្ហាញប្រាប់ពីព្រះរាជគោលបំណងនៃការបង្ហាញឲ្យឃើញថាក្រឹត្យវិន័យរបស់ព្រះវរបិតាគឺជាច្បាប់ដ៏ត្រឹមត្រូវ។ ព្រះបានធ្វើឲ្យលោកបានយល់ថាព្រះយេស៊ូវគឺជាប្រភពនៃប្រព័ន្ធថ្វាយតង្វាយយញ្ញបូជារបស់សាសន៍យូដាទាំងស្រុង ។ លោកបានឃើញថាការឆ្កាងដែលជានិមិត្តរូប បានជួបជាមួយនឹងការឆ្កាងពិតប្រាកដ ដែលព្រះយេស៊ូវបានសម្រេចតាមបទទំនាយនៃគម្ពីរសញ្ញាចាស់ ទាក់ទងទៅនឹង​ព្រះដ៏ប្រោសលោះនៃសាសន៍អ៊ីស្រាអែល។

នៅក្នុងកំណត់ត្រានៃការកែប្រែចិត្តរបស់លោកសុល ព្រះបានប្រទានគោលការណ៍ដ៏សំខាន់ដល់យើងគ្រប់គ្នា ដែលយើងត្រូវតែចងចាំនៅក្នុងគំនិតជារៀងរហូត។ ព្រះវិញ្ញាណបាននាំលោកសុលទៅឯព្រះវត្តមានរបស់ព្រះគ្រិស្តដោយផ្ទាល់។ លោកគឺជាមនុស្សដែលព្រះគ្រិស្តបានបម្រុងទុកសម្រាប់កិច្ចការដ៏សំខាន់បំផុត ជាអ្នកដែលនឹងក្លាយជា «ប្រដាប់រើសតាំង»សម្រាប់ទ្រង់ ប៉ុន្តែ ព្រះជាម្ចាស់មិនបានប្រាប់លោកអំពីកិច្ចការដែលទ្រង់នឹងចាត់ឲ្យលោកធ្វើនោះនៅឡើយទេ។ ព្រះអង្គបានចាប់លោកទុកនៅតាមផ្លូវរបស់លោក ហើយបានបង្ហាញឲ្យលោកបានស្គាល់បាប ប៉ុន្តែ នៅពេលលោកសុល​បាន​សួរថា «ព្រះអម្ចាស់អើយ តើទ្រង់សព្វព្រះហឫទ័យឲ្យទូលបង្គំធ្វើដូចម្តេច?» ព្រះអង្គសង្រ្គោះបានដាក់ជនជាតិយូដាដែលមានសំណួរនេះភ្ជាប់ទៅនឹងពួកជំនុំរបស់ទ្រង់ នៅទីនោះលោកនឹងទទួលបាននូវចំណេះដឹងពីព្រះរាជគោលបំណងរបស់ទ្រង់ ទាក់ទងទៅនឹងរូបលោក។