អំណាន​​ព្រះគម្ពីរប្រចាំថ្ងៃ៖ ពង្សាវតាក្សត្រទី២ ជំពូក២៤

ខព្រះគម្ពីរប្រចាំថ្ងៃ៖ ប៉ុន្តែ បើ​មែក​ខ្លះ​ត្រូវ​កាច់​ចេញ ហើយ​អ្នក​ឯង​ដែល​ជា​ដើម​អូលីវ​ព្រៃ បាន​ត្រូវ​បំបៅ​កណ្តាលមែក​ទាំង​នោះ ទាំង​ត្រឡប់​ទៅ​ជា​ស្រូប​ជាតិ​ឫស​នៃ​ដើម​អូលីវ​ស្រុក ជា​មួយ​នឹង​មែក​ឯ​ទៀត។ រ៉ូម ១១:១៧​

លោកពេត្រុសបានរៀបរាប់អំពីព្រះបន្ទូលទាំងនេះយ៉ាងច្បាស់ ដែលព្រះបានប្រទានដល់លោកនូវការត្រាស់ហៅឲ្យលោកទៅផ្ទះលោកមេទ័ពភ្លាម ហើយបង្រៀនដល់គាត់អំពីជំនឿនៃព្រះគ្រិស្ត។ សារនេះបាន​បញ្ជាក់ថាព្រះមិនមែនជាអ្នកប្រកាន់បុគ្គលទេ ប៉ុន្តែ ទ្រង់បានទទួលយកនិងទទួលស្គាល់មនុស្សទាំងអស់ដែលកោតខ្លាចដល់ទ្រង់។ លោកពេត្រុសបានប្រាប់អំពីការភ្ញាក់ផ្អើលរបស់លោក នៅពេលដែលលោកបានឃើញព្រះវិញ្ញណបរិសុទ្ធកំពុងគង់សណ្ឋិតលើពួកអ្នកស្តាប់របស់លោក ទាំងសាសន៍ដទៃ និង​សាសន៍យូដា ក្នុងការនិយាយពីព្រះបន្ទូលនៃសេចក្តីពិតដល់មនុស្សដែលកំពុងតែជួបជុំគ្នា នៅឯផ្ទះរបស់លោកកូនេលាស ។ សារនេះគឺ​ជាការព្រមាន​របស់ព្រះ ប្រាប់ថាលោកពេត្រុសមិនត្រូវចាត់ទុក​អ្នកណាអន់​ជាងអ្នក​ណា​ម្នាក់ទៀតទេ ព្រោះព្រះលោហិតរបស់ព្រះគ្រិស្តអាចសម្អាតមនុស្សទាំងអស់ពីភាពមិនស្អាតហើយ។

កាលពីមុន មានពេលមួយ លោកពេត្រុសបានពិចារណាជាមួយនឹងបងប្អូនរួមជំនឿរបស់លោកទាក់ទងនឹងការសន្ទនាជាមួយនឹងលោកកូនេលាសនិងមិត្តភក្តិរបស់គាត់ និងការប្រកបគ្នាជាមួយនឹងពួកគេ ។ ក្នុងឱកាសដែលលោកកំពុងតែរៀបរាប់អំពីរបៀបដែលព្រះវិញ្ញាណបរិសុទ្ធបានយាងមកកាន់សាសន៍ដទៃ លោកបានមានប្រសាសន៍ថា «ដូច្នេះ បើសិនជាព្រះបានប្រទានអំណោយទានទៅគេ ដូចជាបានប្រទានមកយើងដែរ ដោយជឿដល់ព្រះអម្ចាស់យេស៊ូវគ្រិស្ត ចុះតើខ្ញុំជាអ្វីដែលអាចនឹងឃាត់ព្រះបាន» (កិច្ចការ ១១:១៧) ។ ឥឡូវនេះ លោកបានមានប្រសាសន៍ដោយសេចក្តីក្លៀវក្លានិងកម្លាំងព្រមគ្នាថា «នោះព្រះដ៏ជ្រាបនូវចិត្តមនុស្សទាំងឡាយ ទ្រង់បានធ្វើ​បន្ទាល់ពីគេ ដោយទ្រង់ប្រទានព្រះវិញ្ញាណបរិសុទ្ធដល់គេ ដូចជាដល់​យើង​រាល់គ្នាដែរ ទ្រង់មិនបានរាប់ពួកយើង និងពួកគេ ខុសពីគ្នាទេ គឺបានសម្អាត​ចិត្តគេ ដោយសារសេចក្តីជំនឿជឿដែរ ចុះហេតុអ្វីបានជាល្បងព្រះ ដោយ​បំពាក់​នឹមនៅកពួកសិស្សដូច្នេះ ដែលទោះទាំងពួកអយ្យកោយើង ឬយើងរាល់គ្នាក៏ពុំអាចនឹងទ្រទ្រាំបានផង»។ នឹមនេះ មិនមែនជាក្រឹត្យ​វិន័យ​ដប់ប្រការដូច​​ដែលអ្នកប្រឆាំងមួយចំនួនទាមទារការគោរពនោះទេ នៅទី​នេះ លោកពេត្រុសបានសំដៅទៅលើច្បាប់នៃពិធីបុណ្យផ្សេងៗ ដែលត្រូវ​បាន​ចាត់ទុកជា​មោឃៈដោយការជាប់ឆ្កាងរបស់ព្រះគ្រិស្តឯណោះទេ។

ប្រសាសន៍របស់លោកពេត្រុសបាននាំមកជូនពួកបណ្តាជនដែលកំពុងតែជួបជុំគ្នានូវចំណុចមួយដែលពួកគេអាចស្តាប់លោកប៉ុលនិងបាណាបាស ដោយអត់ធ្មត់ ដែលបានរៀបរាប់អំពីបទពិសោធន៍របស់ពួកលោកក្នុងការ​ធ្វើការ​ជាមួយនឹងសាសន៍ដទៃ។ «ឯពួកជំនុំទាំងអស់គ្នា ក៏នៅស្ងៀមស្តាប់​បាណាបាស និងប៉ុល ដែលគេរ៉ាយរឿងប្រាប់ពីទីសម្គាល់ និងការអស្ចារ្យ​ទាំងប៉ុន្មាន ដែលព្រះបានធ្វើក្នុងពួកសាសន៍ដទៃ ដោយសារខ្លួន»។

លោកយ៉ាកុប ក៏បានបញ្ចេញទីបន្ទាល់របស់លោកជាមួយនឹងសេចក្តីក្លាហាន ដោយប្រកាសថាគឺជាព្រះរាជគោលបំណងរបស់ព្រះ ក្នុងការប្រទានឯកសិទ្ធិនិងព្រះពរដល់សាសន៍ដទៃ ដូចជាព្រះអង្គបានប្រទានដល់សាសន៍យូដាដែរ។

ព្រះវិញ្ញាណបរិសុទ្ធបានទតឃើញថាការបង្ខំឲ្យសាសន៍ដទៃ ដែលបានផ្លាស់ប្តូរជំនឿអនុវត្តច្បាប់នៃពិធីបុណ្យនោះមិនល្អទេ ហើយគំនិតរបស់ពួកសាវ័កទាក់ទងនឹងរឿងនេះ ក៏ដូចជាព្រះតម្រិះរបស់ព្រះវិញ្ញាណបរិសុទ្ធដែរ ។ លោកយ៉ាកុបបានធ្វើជាអធិបតីនៅក្នុងក្រុមប្រឹក្សា ហើយសេចក្តីសម្រេចចិត្តចុងក្រោយរបស់លោកគឺ «ដូច្នេះ បើតាមគំនិតខ្ញុំ នោះមិនត្រូវ​ធ្វើ​ឲ្យពួក​សាសន៍ដទៃ ដែលងាកបែរមកឯព្រះវិញ មានចិត្តខ្វល់ឡើយ»។

សេចក្តីសម្រេចនេះក៏បានបញ្ចប់ការពិភាក្សានោះ ។ នៅក្នុង​ប្រយោគ​នេះ យើងមានការបដិសធន៍ទៅនឹងគោលលទ្ធិដែលប្រកាន់ដោយពួកជំនុំកាតូលិករ៉ូម ថាលោកពេត្រុសគឺជាប្រធាននៃពួកជំនុំ ។ អ្នកទាំងឡាយណាដែលមានតំណែងជាសម្តេចប៉ាបបានអះអាងថាជាអ្នកតតំណែងអំពីលោកពេត្រុស ដោយមិនមានការគាំទ្រពីព្រះគម្ពីរចំពោះការទាមទាររបស់ពួកគេនេះឡើយ ។ គ្មានអ្វីដែលផ្តល់ភាពបរិសុទ្ធនៅក្នុងជីវិតរបស់លោកពេត្រុស ដែលធ្វើឲ្យលោកអះអាងថាលោកត្រូវបានគេលើកតម្កើងឲ្យខ្ពស់ជាងបងប្អូនរួមជំនឿរបស់លោក ជាអាវផាយពណ៌សនៃព្រះដ៏ខ្ពស់បំផុតឡើយ។ ប្រសិនបើអ្នកដែលបានអះអាងថាខ្លួនជាអ្នកបន្តតំណែងពីលោកពេត្រុស អ្នកនោះត្រូវតែធ្វើតាមគំរូរបស់លោក គឺពួកគេត្រូវតែពេញចិត្តនឹងឋានៈស្មើនឹងបងប្អូនរបស់ខ្លួន។

នៅក្នុងហេតុការណ៍នេះ លោកយ៉ាកុបទំនងជាត្រូវបានគេជ្រើសរើសឲ្យថ្លែងការណ៍អំពីសេចក្តីសម្រេចរបស់ក្រុមប្រឹក្សានោះ។ គឺដោយសារប្រយោគនោះហើយដែលច្បាប់នៃពិធីបុណ្យផ្សេងៗ ជាពិសេស ពិធីកាត់ស្បែកត្រូវបានគេលែងបង្ខំឲ្យសាសន៍ដទៃគោរព ឬជាការបង្គាប់តទៅទៀត។ លោកយ៉ាកុបបានធ្វើការដើម្បីសង្កត់នៅក្នុងគំនិតនៃបងប្អូនរួមជំនឿរបស់លោកជាមួយនឹងហេតុការណ៍ដែលថា ការបែរមករកព្រះ នោះសាសន៍ដទៃបានផ្លាស់ប្តូរជាច្រើននៅក្នុងជីវិតរបស់ពួកគេណាស់ទៅហើយ ហើយពួកយូដាត្រូវតែប្រុងប្រយ័ត្នឲ្យមែនទែន កុំបង្កបញ្ហាដល់ពួកគេ ដោយភាព​អល់​អែកនិងមន្ទិលសង្ស័យឡើយ ក្រែងពួកគេបានបាក់ទឹកចិត្តក្នុងការដើរតាមព្រះគ្រិស្ត។