អំណាន​​ព្រះគម្ពីរប្រចាំថ្ងៃ៖ របាក្សត្រទី១ ជំពូក១​

ខព្រះគម្ពីរប្រចាំថ្ងៃ៖ ខ្ញុំ​ក៏​អធិស្ឋាន​សូម​សេចក្តី​នេះ គឺ​ឲ្យ​សេចក្តី​ស្រឡាញ់​របស់​អ្នក​រាល់​គ្នា បាន​ចំរើន​កាន់​តែ​ច្រើន​ឡើង ដោយ​នូវ​សេចក្តី​ចេះ​ដឹង និង​យោបល់​គ្រប់​ជំពូក។ ភីលីព ១:៩

ក្រុងយេរូសាឡិមគឺជារាជធានីនៃសាសន៍យូដា ហើយគឺនៅទីនោះហើយដែលគេបានរកឃើញការមិនចុះសម្រុងគ្នានិងការវង្វេងសាសនា។ ពួកគ្រិស្តបរិស័ទជាសាសន៍យូដាដែលរស់នៅក្រោមក្រសែភ្នែករបស់ពួកជំនុំ​ ​​ បានបណ្តោយឲ្យគំនិតរបស់ពួកគេវិលត្រឡប់ទៅកាន់លក្ខណៈពិសេសនៃបុព្វសិទ្ធិរបស់សាសន៍យូដាទូទាំងនគរ យ៉ាងងាយទៅវិញ។ កាលពួកគេ​បានឃើញពួកជំនុំគ្រិស្តបរិស័ទបានងាកចេញពីពិធីបុណ្យផ្សេងៗ និងពីប្រពៃណី​របស់សាសន៍យូដា ហើយបានដឹងថាលក្ខណៈពិសេសដ៏ពិសិដ្ឋ ដែល​ប្រពៃណីសាសន៍យូដាបានបង្កើត នឹងត្រូវបាត់បង់ដោយសារតែពន្លឺនៃជំនឿថ្មី នៅពេលដ៏ខ្លីខាងមុខនេះ ពួកគេជាច្រើនបានតូចចិត្តនឹងលោកប៉ុលជាខ្លាំង ដែលជាអ្នកបង្កឲ្យមានការផ្លាស់ប្តូរនេះ។ សូម្បីតែពួកសាវ័កក៏មានខ្លះមិនបានរៀបចំខ្លួនទទួលយកការសម្រេចចិត្តរបស់ក្រុមប្រឹក្សានេះដែរ ។ គេមានចិត្តពុះកញ្រ្ជោល ចំពោះច្បាប់ខាងពិធីបុណ្យផ្សេងៗនេះ ហើយពួកគេក៏មិនបានគោរពដល់លោកប៉ុលដោយការពេញចិត្តដែរ ព្រោះពួកគេ​បាន​គិតថា គោលការណ៍របស់លោក ទាក់ទងទៅនឹងកាតព្វកិច្ច​នៃច្បាប់របស់សាសន៍យូដាមានភាពធូររលុង។

ការសម្រេចដ៏ធំនិងទូលំទូលាយរបស់ក្រុមប្រឹក្សាទូទៅ បាននាំមកនូវ​ទំនុកចិត្តដល់ជួរពួកអ្នកជឿសាសន៍ដទៃ ហើយកិច្ចការរបស់ព្រះក៏បានរីកចម្រើន។ ពួកជំនុំនៅអាន់ទីយ៉ូកពេញចិត្តនឹងលោកយូដាសនិងស៊ីឡាស ជាអ្នកនាំ​សារ​​​ពិសេសដែលបានត្រឡប់មកពីការប្រជុំនៅទីក្រុងយេរូសាឡិមជាមួយនឹងពួកសាវ័ក។ លោកយូដាស និងស៊ីឡាស«ដែលជាគ្រូអធិប្បាយ​ដែរ គេបានប្រដៅទូន្មានជាច្រើនដល់ពួកជំនុំ ព្រមទាំងតាំងឲ្យគេមានចិត្តខ្ជាប់ខ្ជួនឡើង» បុរសដែលមានព្រះទាំងពីរនាក់នេះបាននៅក្រុងអាន់ទីយ៉ូកជាយូរបន្តិច ។ «ឯប៉ុល និងបាណាបាស បានបង្អង់នៅឯក្រុងអាន់ទីយ៉ូក​នោះដែរ ទាំងបង្រៀន ហើយប្រកាសប្រាប់ដំណឹងល្អ គឺជាព្រះបន្ទូលនៃ​ព្រះអម្ចាស់ ជាមួយនឹងមនុស្សឯទៀតជាច្រើន»។

លុះគ្រាក្រោយមកទៀត កាលលោកពេត្រុសបានមកអាន់ទីយ៉ូក លោកបានទាក់ទាញទំនុកចិត្តរបស់មនុស្សជាច្រើនដោយសារអាកប្បកិរិយាដ៏ប្រុងប្រយ័ត្នរបស់លោក ចំពោះពួកសាសន៍ដទៃដែលបានផ្លាស់ប្តូរជំនឿ។ លោកបានប្រព្រឹត្តតាមពន្លឺដែលព្រះបានប្រទានមកពីឋានសួគ៌មួយរយៈ។ លោកមានជោគជ័យលើនិស្ស័យនៃការប្រកាន់ពូជសាសន៍ពីកំណើតរបស់លោកក្នុងការអង្គុយទទួលទានអាហារជាមួយនឹងសាសន៍ដទៃដែលបានផ្លាស់ប្តូរជំនឿ ។ ប៉ុន្តែ នៅពេលពួកយូដាខ្លះដែលប្រកាន់ច្បាប់នៃពិធីបុណ្យតឹងរ៉ឹងបានមកពីទីក្រុងយេរូសាឡិម លោកពេត្រុស បានផ្លាស់ប្តូរឥរិយាបទ​របស់​លោកយ៉ាងអយុត្តិធម៌ ទៅលើអ្នកដែលបានផ្លាស់ប្តូរជំនឿមក​ពីសាសនាដទៃ។ សាសន៍យូដាមួយចំនួន «ក៏ធ្វើជាពើជាមួយនឹងលោកដែរ ដល់ម៉្លេះបាន​ជា​បាណាបាស ត្រូវបណ្តោយតាមអំពើកំពុតរបស់គេទៀត» ។ ការបង្ហាញពីភាពកម្សោយរបស់អ្នកដែលគេគោរពនិងស្រឡាញ់ជាអ្នកដឹកនាំបានបន្សល់ទុកនូវការឈឺចាប់ជាខ្លាំងដល់គំនិតរបស់ពួកអ្នកជឿដែលជាសាសន៍ដទៃ ។ ពួកជំនុំត្រូវបានគំរាមកំហែងដោយការបែកបាក់។ ប៉ុន្តែ លោកប៉ុលដែលបានមើលឃើញឥទ្ធិពលដ៏ស្ងៀមស្ងាត់ដែលបានប្រព្រឹត្តមិនត្រឹមត្រូវទៅកាន់ពួកជំនុំ តាមរយៈសកម្មភាពទាំងពីរផ្នែករបស់លោកពេត្រុស លោកបានស្តីបន្ទោសដោយចំហ ដោយការក្លែងបន្លំមនោសញ្ចេតនាពិតប្រាកដរបស់គាត់យ៉ាងដូច្នេះ ។ លោកប៉ុលបានសួរដល់លោកពេត្រុសនៅជំពោះពួកជំនុំថា «បើលោក ដែលជាសាសន៍យូដា មិនប្រព្រឹត្តតាមទំនៀមទម្លាប់របស់សាសន៍យូដាទេ គឺប្រព្រឹត្តតាមទំនៀមទម្លាប់សាសន៍ដទៃវិញ នោះហេតុអ្វីបានជាបង្ខំឲ្យសាសន៍ដទៃ ប្រព្រឹត្តដូចជាសាសន៍យូដាដូច្នេះ?» (កាឡាទី ២:១៣, ១៤)។

លោកពេត្រុសបានមើលឃើញកំហុសដែលលោកបានធ្លាក់ចុះ ហើយលោកបានរៀបចំកែលម្អអំពើអាក្រក់ដែលខ្លួនបានធ្វើជាបន្ទាន់ តាមអំណាច​ដែលលោកអាចធ្វើបាន ។ ព្រះដែលបានជ្រាបទីបញ្ចប់តាំងពីដើមដំបូង ព្រះអង្គបានអនុញ្ញាតឲ្យលោកពេត្រុសបង្ហាញពីភាពកម្សោយខាង​អត្តចរិត​​របស់លោក ដើម្បីឲ្យសាវ័កដែលព្រះបានសាកល្បងនេះបានដឹងថាគ្មានអ្វីនៅក្នុងខ្លួនដែលលោកត្រូវអួតអាងឡើយ។ ទោះបីមនុស្ស​ដែលពូកែ​បំផុត​ក៏ដោយ បើបណ្តោយឲ្យនៅតែម្នាក់ឯង ប្រាកដជាវិនិច្ឆ័យខុស​ជាក់​ជា​មិន​ខាន។ ព្រះក៏បានជ្រាបផងដែរថា នៅពេលខាងមុខ មនុស្សខ្លះនឹងត្រូវបានបោកបញ្ឆោតឲ្យទាមទារសិទ្ធិជាលោកពេត្រុស និងជាអ្នកក្លែងធ្វើជាអ្នកបន្តតំណែងពីលោក ដែលជាបុព្វសិទ្ធិដ៏ខ្ពង់ខ្ពស់របស់ព្រះតែមួយអង្គគត់។ ហើយកំណត់ត្រានៃភាពកម្សោយរបស់សាវ័កពេត្រុសនេះ ត្រូវទុកជាភស្តុតាងបញ្ជាក់អំពីភាពភ័ន្តច្រឡំរបស់លោក និងការពិតដែលបញ្ជាក់ប្រាប់ថាមិនមានផ្លូវណាដែលលោកអាចឈរខ្ពស់ជាងសាវ័កដទៃទៀតឡើយ។