កិច្ចការនៃពួកសាវ័ក (ជំពូកទី-១៩)
អំណានព្រះគម្ពីរប្រចាំថ្ងៃ៖ របាក្សត្រទី១ ជំពូក២
ខព្រះគម្ពីរប្រចាំថ្ងៃ៖ ដែលទ្រង់កំសាន្តចិត្តយើងរាល់គ្នា ក្នុងគ្រប់ទាំងសេចក្តីវេទនា ប្រយោជន៍ឲ្យយើងអាចនឹងកំសាន្តចិត្តអ្នកឯទៀត ក្នុងអស់ទាំងសេចក្តីវេទនារបស់គេបានដែរ គឺដោយសារសេចក្តីក្សាន្តនោះឯង ដែលព្រះបានកំសាន្តចិត្តយើងស្រេចហើយ។ កូរិនថូសទី២ ១:៤
ប្រវត្តិនៃការចាកចេញពីគោលការណ៍ដ៏ត្រឹមត្រូវនេះ ឈរជាការព្រមានយ៉ាងឧឡារិកដល់បុរសទាំងឡាយដែលមានតួនាទីក្នុងការបំពេញកិច្ចការរបស់ព្រះ ថាពួកគេមិនត្រូវធ្លាក់ចុះខាងសេចក្តីសុចរិតទេ ប៉ុន្តែ ត្រូវប្រកាន់ខ្ជាប់តាមគោលការណ៍វិញ។ អ្នកដែលបានទទួលការទទួលខុសត្រូវកាន់តែធំ និងមានឱកាសបង្គាប់បញ្ជានិងគ្រប់គ្រងកាន់តែច្រើន អ្នកនោះកាន់តែមានការឈឺចាប់ ប្រសិនបើគេមិនបានធ្វើតាមវិធីរបស់ព្រះជាម្ចាស់ឲ្យបានត្រឹមត្រូវនិងធ្វើការឲ្យស្របទៅតាមសេចក្តីសម្រេចរបស់រចនាសម្ព័ន្ធទូទៅនៃពួកអ្នកជឿ នៅក្នុងក្រុមប្រឹក្សាដែលបានរួបរួមគ្នាទេនោះ។
បន្ទាប់ពីការបរាជ័យរបស់លោកពេត្រុសមក បន្ទាប់ពីការដួលចុះនិងការស្តារឡើងវិញរបស់លោក កិច្ចការដ៏យូរអង្វែងរបស់លោក ភាពស្និទ្ធស្នាលខាងផ្លូវចិត្តរបស់លោកជាមួយនឹងព្រះគ្រិស្ត ចំណេះដឹងនៃការអនុវត្តន៍តាមគោលការណ៍ដ៏ស្មោះត្រង់របស់ព្រះអង្គសង្រ្គោះរបស់លោក ជាពិសេស ការបង្រៀនដែលលោកបានទទួលអំណោយទាននិងចំណេះដឹងព្រមទាំងឥទ្ធិពលទាំងឡាយដែលលោកទទួលបាន តាមរយៈការអធិប្បាយនិងការបង្រៀនព្រះបន្ទូល តើមិនមែនជាការចម្លែកទេឬអីដែលលោកគួរក្លែងបន្លំនិងដោះសាគោលការណ៍នៃដំណឹងល្អ តាមរយៈការកោតខ្លាចមនុស្ស ឬដើម្បីទទួលបានតម្លៃផ្ទាល់ខ្លួននោះ? តើមិនចម្លែកទេឬ ដែលលោកងាករេក្នុងការប្រកាន់ខ្ជាប់តាមគោលការណ៍ត្រឹមត្រូវនោះ? សូមឲ្យព្រះបានប្រទាននូវចំណេះដឹងនៃភាពគ្មានជំនួយ ភាពគ្មានសមត្ថភាពរបស់ខ្លួន ដើម្បីកាច់ចង្កូតនាវារបស់ខ្លួនឲ្យបានត្រង់ និងមានសុវត្ថិភាពឆ្ពោះទៅកាន់កោះត្រើយ។
នៅក្នុងការបំពេញបេសកកម្មរបស់គាត់ លោកប៉ុលតែងតែត្រូវបានបង្ខំឲ្យនៅតែម្នាក់ឯង ។ ព្រះតែងតែបង្រៀនដល់លោកជាពិសេស ហើយមិនហ៊ានបន្ធូរបន្ថយអ្វីដែលទាក់ទងទៅនឹងគោលការណ៍ទេ។ លោកមានបន្ទុកធ្ងន់ជាច្រើនលើកច្រើនសារ ប៉ុន្តែ លោកប៉ុលបានឈរយ៉ាងរឹងមាំនៅខាងភាពត្រឹមត្រូវ។ លោកបានដឹងថាពួកជំនុំមិនត្រូវបានដឹកនាំឲ្យនៅក្រោមការគ្រប់គ្រងនៃអំណាចរបស់មនុស្សឡើយ ។ ប្រពៃណីនិងទ្រឹស្តីរបស់មនុស្សមិនត្រូវជំនួសសេចក្តីពិតដែលបានបង្ហាញទេ។ ការជឿនលឿនទៅមុខនៃដំណឹងល្អមិនត្រូវបានរារាំងដោយការប្រកាន់ពូជសាសន៍ និងសេចក្តីលម្អៀងរបស់មនុស្សទេ ទោះបីជាអ្នកនោះមានតួនាទីនៅក្នុងពួកជំនុំក៏ដោយ។
លោកប៉ុលបានលះបង់ខ្លួនលោកនិងអំណាចទាំងអស់ ដើម្បីបម្រើកិច្ចការរបស់ព្រះ។ លោកបានទទួលសេចក្តីពិតនៃដំណឹងល្អមកពីឋានសួគ៌ដោយផ្ទាល់ ហើយនៅពេញទាំងការបំពេញកិច្ចការរបស់គាត់ លោកនៅតែភ្ជាប់ទំនាក់ទំនងយ៉ាងជិតស្និទ្ធជាមួយនឹងភ្នាក់ងារនៃឋានសួគ៌ដដែល។ លោកធ្លាប់បានទទួលការបង្រៀនពីព្រះ ទាក់ទងនឹងការគោរពភាពមិនចាំបាច់នៃគ្រិស្តបរិស័ទដែលជាសាសន៍ដទៃ ដូច្នេះ នៅពេលដែលពួកអ្នកជឿសាសន៍យូដាបាននាំមកនូវសំណួរស្តីពីការកាត់ស្បែក ចូលមកក្នុងពួកជំនុំនៅអាន់ទីយ៉ូក លោកប៉ុលបានជ្រាបអំពីព្រះតម្រិះនៃព្រះវិញ្ញាណនៃព្រះ ទាក់ទងនឹងការបង្រៀនបែបនេះ ហើយលោកបានប្រកាន់ជំហររឹងមាំឥតងាករេ ដែលបាននាំឲ្យពួកជំនុំមានសេរីភាពពីពិធីខាងសាសនា និងពិធីបុណ្យផ្សេងៗនៃសាសន៍យូដា។
ទោះបីជាលោកប៉ុលត្រូវបានបង្រៀនដោយព្រះផ្ទាល់ក៏ដោយ ក៏លោកមិនមានចិត្តធំចង់ទទួលខុសត្រូវដោយខ្លួនឯងដែរ ។ ខណៈដែលលោកសម្លឹងមើលទៅឯព្រះ ដើម្បីការណែនាំដោយផ្ទាល់ លោកតែងតែទទួលស្គាល់អំណាចគ្រប់គ្រងដែលព្រះបានតែងតាំងនៅលើរចនាសម្ព័ន្ធដែលបានរួបរួមគ្នាជាពួកជំនុំនោះដែរ។ លោកបានដឹងពីសេចក្តីត្រូវការនូវដំបូន្មាន ហើយកាលណាមានរឿងសំខាន់ៗកើតឡើង លោករីករាយនឹងលាតត្រដាងរឿងនោះនៅចំពោះមុខពួកជំនុំ និងរួបរួមជាមួយបងប្អូនរួមជំនឿរបស់លោក ក្នុងការស្វែងរកប្រាជ្ញាពីព្រះ ដើម្បីធ្វើការសម្រចចិត្តឲ្យបានត្រឹមត្រូវ។ លោកបានមានប្រសាសន៍ថា សូម្បីតែ «វិញ្ញាណនៃពួកអ្នកដែលអធិប្បាយ នោះនៅក្រោមអំណាចអ្នកនោះឯង ដ្បិតព្រះទ្រង់មិនមែនជាព្រះនៃសេចក្តីវឹកវរទេ គឺទ្រង់ជាព្រះនៃសេចក្តីសុខសាន្តវិញ ដូចក្នុងអស់ទាំងពួកជំនុំរបស់ពួកបរិសុទ្ធដែរ» (កូរិនថូសទី១ ១៤:៣២, ៣៣) ។ ជាមួយលោកពេត្រុស លោកបានបង្រៀនថា អ្នកដែលរួបរួមគ្នានៅក្នុងចំណុះពួកជំនុំគួរតែ «មានចិត្តសុភាព ដល់គ្នាទៅវិញទៅមក» (ពេត្រុសទី១ ៥:៥)។
ខព្រះគម្ពីរប្រចាំថ្ងៃសប្តាហ៍៖ បងប្អូនអើយ ព្រះទ្រង់បានហៅអ្នករាល់គ្នាមក ឲ្យមានសេរីភាព តែកុំឲ្យប្រើសេរីនោះ ទុកជាឱកាសដល់សាច់ឈាមឡើយ គឺត្រូវបំរើគ្នាទៅវិញទៅមក ដោយសេចក្តីស្រឡាញ់វិញ។ (កាឡាទី ៥:១៣)
