កិច្ចការនៃពួកសាវ័ក (ជំពូកទី-១៧)៖ ជំពូកនេះមានមូលដ្ឋាននៅក្នុងគម្ពីរកិច្ចការ ១៣:៤-៥២។
ការប្រកាសដំណឹងល្អ
អំណានព្រះគម្ពីរប្រចាំថ្ងៃ៖ ពង្សាវតាក្សត្រទី២ ជំពូក៩
ខព្រះគម្ពីរប្រចាំថ្ងៃ៖ ទាំងពាក់សេចក្តីប្រុងប្រៀបរបស់ដំណឹងល្អនៃសេចក្តីសុខសាន្ត ទុកជាស្បែកជើង។ អេភេសូរ ៦:១៥
«ដោយព្រះវិញ្ញាណបរិសុទ្ធចាត់ឲ្យទៅ» បន្ទាប់ពីពិធីបំពេញសិទ្ធិរបស់ពួកលោករួចមក លោកប៉ុលនិងបាណាបាស «ក៏ចុះទៅដល់សេលើស៊ា នៅទីនោះ គេចុះសំពៅចេញទៅឯកោះគីប្រុស»។ ដូច្នេះ សាវ័កទាំងពីរនាក់ក៏បានចាប់ផ្តើមដំណើរជាបេសកជនរបស់លោក។
កោះគីប្រុសគឺជាកន្លែងដែលពួកអ្នកជឿបានរត់គេចខ្លួន ចេញពីទីក្រុងយេរូសាឡិម ដោយសារការបៀតបៀន បន្ទាប់ពីមរណភាពរបស់លោកស្ទេផានមក។ គឺកោះគីប្រុសនេះហើយដែលមនុស្សមួយចំនួនបានធ្វើដំណើរទៅកាន់ទីក្រុងអាន់ទីយ៉ូក «ក៏ផ្សាយដំណឹងល្អពីព្រះអម្ចាស់យេស៊ូវ» (កិច្ចការ ១១:២០)។
បាណាបាសគឺជាអ្នក «ដែលកើតនៅកោះគីប្រុស» (កិច្ចការ ៤:៣៦) ហើយឥឡូវនេះ លោកនិងលោកប៉ុល អមដំណើរដោយលោកយ៉ូហានម៉ាកុស ដែលជាញាតិសន្តាននឹងលោកបាណាបាសបានមកធ្វើទស្សនកិច្ចនៅកោះនេះ។
ម្តាយរបស់លោកម៉ាកុសគឺជាអ្នកដែលបានផ្លាស់ប្តូរជំនឿមកកាន់សាសនាគ្រិស្ត ហើយផ្ទះរបស់លោកស្រីនៅទីក្រុងយេរូសាឡិមគឺជាទីស្នាក់អាស្រ័យរបស់ពួកសាវ័ក។ នៅទីនោះ ពួកគេតែងតែទទួលបាននួវការស្វាគមន៍យ៉ាងរាក់ទាក់ និងមានពេលសម្រាកយ៉ាងល្អ។ គឺនៅក្នុងអំឡុងពេលនៃការសួរសុខទុក្ខមួយរបស់ពួកសាវ័ក មកកាន់ផ្ទះម្តាយរបស់លោកនេះហើយ ដែលលោកម៉ាកុសបានស្នើសុំដល់លោកប៉ុល និងបាណាបាសឲ្យលោកបានរួមដំណើរជាមួយពួកគាត់ ក្នុងដំណើរបេសកជនរបស់ពួកលោកផង។ គាត់បានដឹងពីកិច្ចការរបស់ព្រះនៅក្នុងចិត្ត ហើយចង់លះបង់ខ្លួនឯងទាំងស្រុងដើម្បីបំពេញកិច្ចការផ្សាយដំណឹងល្អ។
កាលបានមកដល់សាឡាមីនហើយ ពួកសាវ័ក «គេក៏ផ្សាយព្រះបន្ទូល នៅក្នុងសាលាប្រជុំទាំងប៉ុន្មានរបស់ពួកសាសន៍យូដា មានទាំងយ៉ូហានជាអ្នកជំនួយដែរ កាលបានដើរកាត់កោះទៅ ត្រឹមប៉ាផុសហើយ នោះក៏ប្រទះនឹងសាសន៍យូដាម្នាក់ ដែលធ្វើជាគ្រូអាបធ្មប់ ជាហោរាក្លែងក្លាយ ឈ្មោះបារយេស៊ូវ គ្រូនោះនៅជាមួយនឹងអ្នកតំណាងជាតិរ៉ូមម្នាក់ ឈ្មោះស៊ើគាសប៉ូឡូស ជាអ្នកឆ្លៀវឆ្លាត លោកក៏ហៅបាណាបាស និងសុលមក ដើម្បីចង់ស្តាប់ព្រះបន្ទូល តែអេលីម៉ាស ជាគ្រូអាបធ្មប់នោះ (ដ្បិតឈ្មោះនោះប្រែមកដូច្នេះ) ក៏តាំងខ្លួនទាស់នឹងគេ ដើម្បីបង្វែរលោកមិនឲ្យជឿ»។
សាតាំងមិនបានបណ្តោយឲ្យពួកសាវ័កស្ថាបនានគររបស់ព្រះ នៅលើផែនដីនេះដោយមិនមានឧបសគ្គនោះទេ។ កងកម្លាំងរបស់អារក្សបានចូលរួមឥតឈប់ឈរ នៅក្នុងសង្រ្គាមប្រឆាំងនឹងភ្នាក់ងារដែលព្រះបានតែងតាំងឲ្យផ្សព្វផ្សាយដំណឹងល្អ ហើយអំណាចនៃសេចក្តីងងឹតទាំងនេះបញ្ចេញសកម្មភាពជាពិសេស នៅពេលដែលសេចក្តីពិតត្រូវបានប្រកាសនៅចំពោះមុខមនុស្សដែលមានគេរាប់អានច្រើន និងមានកេរ្តិ៍ឈ្មោះនិងលុយកាក់ច្រើន។ រឿងនេះបានកើតឡើងនៅពេលដែលស៊ើគាសប៉ូឡូស ជាតំណាងនៅកោះគីប្រុសកំពុងស្តាប់សារនៃដំណឹងល្អ។ អ្នកដែលជាតំណាងនោះបានចាត់គេឲ្យទៅហៅពួកសាវ័ក ដើម្បីមកបង្ហាត់បង្រៀនដល់លោកអំពីសារដែលពួកគេមក ដើម្បីនឹងផ្សព្វផ្សាយ ប៉ុន្តែ ឥឡូវនេះ កងកម្លាំងរបស់អារក្សកំពុងធ្វើការតាមរយៈអេលីម៉ាស ជាគ្រូអាបធ្មប់នោះ ដោយបានធ្វើការស្នើយោបល់អាក្រក់ដើម្បីបង្វែរលោកពីជំនឿ ហើយបានរំខានដល់ព្រះរាជគោលបំណងរបស់ព្រះវិញ។
ខព្រះគម្ពីរប្រចាំថ្ងៃសប្តាហ៍៖ ចូរយកសេចក្តីសង្គ្រោះទុកជាមួកសឹក និងដាវរបស់ព្រះវិញ្ញាណដែរ គឺជាព្រះបន្ទូល។ (អេភេសូរ ៦:១៧)
