កិច្ចការនៃពួកសាវ័ក (ជំពូកទី-២១)
អំណានព្រះគម្ពីរប្រចាំថ្ងៃ៖ របាក្សត្រទី១ ជំពូក១១
ខព្រះគម្ពីរប្រចាំថ្ងៃ៖ ចូរផ្ចង់ចិត្តទៅឯសេចក្តីទាំងអស់ដែលនៅខាងលើ កុំឲ្យផ្ចង់ទៅឯសេចក្តីទាំងប៉ុន្មាន ដែលនៅផែនដីឡើយ។ កូឡូស ៣:២
ឆ្មាំគុកបានទម្លាក់ដាវចុះ ហើយប្រាប់ឲ្យគេយកភ្លើងមកបំភ្លឺក្នុងគុកជ្រៅ។ គាត់អាចមើលឃើញលក្ខណៈរបស់ពួកសាវ័កដែលបានប្រព្រឹត្តសប្បុរស តបទៅនឹងអំពើឃោរឃៅដែលខ្លួនបានទទួល។ ដោយបានចូលទៅកាន់ទីកន្លែងដែលពួកសាវ័កនៅ ហើយលុតជង្គង់នៅចំពោះពួកលោក ឆ្មាំគុកបានសុំការអត់ឱនទោស ចំពោះកំហុសដែលខ្លួនបានប្រព្រឹត្តមកលើរូបលោក។ បន្ទាប់មកបាននាំលោកចេញទៅក្រៅ រួចសួរថា «លោកម្ចាស់អើយ តើត្រូវឲ្យខ្ញុំធ្វើដូចម្តេចឲ្យបានសង្គ្រោះផង?»
ឆ្មាំគុកបានញ័ររន្ធត់ នៅពេលគាត់បានឃើញសេចក្តីក្រោធរបស់ព្រះដែលបានបង្ហាញនៅក្នុងការរញ្ជួយដី កាលគាត់បានគិតថាអ្នកទោសរត់រួចអស់ហើយ គាត់បម្រុងនឹងសម្លាប់ខ្លួន ប៉ុន្តែ ឥឡូវនេះជាមួយនឹងការភ័យខ្លាចថ្មី និងចម្លែក ដែលបានធ្វើឲ្យរំជួលចិត្តរបស់គាត់ ឆ្មាំគុកនេះប្រាថ្នាចង់បានភាពស្ងប់សុខនិងភាពរីករាយដែលពួកសាវ័កបានបង្ហាញ នៅក្រោមការឈឺចាប់និងការរំលោភបំពាននោះដែរ។ គាត់បានឃើញពន្លឺនៃឋានសួគ៌នៅនឹងទឹកមុខរបស់ពួកលោក គាត់បានដឹងថាព្រះបានយាងចូលមកគង់នៅកណ្តាលលក្ខណៈដ៏អស្ចារ្យនេះ ដើម្បីជួយសង្រ្គោះជីវិតរបស់ពួកលោក ហើយពាក្យពេចន៍ដែលស្រ្តីមានអារក្សចូលបានចូលមកក្នុងគំនិតរបស់លោកថា ៖ «អ្នកទាំងនេះជាអ្នកបម្រើនៃព្រះដ៏ខ្ពស់បំផុត ដែលប្រាប់យើងពីផ្លូវសង្គ្រោះ»។
គាត់បានសួរដល់សាវ័កអំពីផ្លូវនៃជីវិតដោយបន្ទាបខ្លួនយ៉ាងទន់ទាប។ ពួកសាវ័កបានឆ្លើយតបទៅវិញថា «ចូរជឿដល់ព្រះអម្ចាស់យេស៊ូវគ្រិស្តទៅ នោះនឹងបានសង្គ្រោះហើយ ព្រមទាំងពួកគ្រួសារលោកផង»។ ហើយ «គេក៏ផ្សាយព្រះបន្ទូលនៃព្រះអម្ចាស់ដល់គាត់ និងពួកគ្រួគាត់ទាំងអស់ដែរ»។ បន្ទាប់មក ឆ្មាំគុកក៏បានលាងរបួសឲ្យពួកសាវ័ក ហើយបានបម្រើលោក ក្រោយមកទៀត ពួកសាវ័កបានធ្វើពិធីបុណ្យជ្រមុជទឹកឲ្យគាត់ ព្រមទាំងក្រុមគ្រួសាររបស់គាត់ទាំងអស់ផង។ ឥទ្ធិពលដ៏បរិសុទ្ធដែលបានសាយភាយឡើងដោយខ្លួនឯងនៅក្នុងចំណោមអ្នកជាប់គុកជាមួយគ្នា និងដល់គំនិតរបស់មនុស្សទាំងឡាយដែលបានស្តាប់សេចក្តីពិតដែលបាននិយាយដោយពួកសាវ័ក។ ពួកគេបានដឹងថាព្រះដែលបុរសទាំងនេះបម្រើបានរំដោះពួកគេដ៏អស្ចារ្យឲ្យរួចពីចំណង។
ពួកបណ្តាជននៅក្រុងភីលីព មានការរន្ធត់ជាខ្លាំងដោយការរញ្ជួយដី លុះព្រឹកឡើងនាយតម្រួតពន្ធនាគារបានជម្រាបតុលាការអំពីរឿងរ៉ាវដែលបានកើតឡើងកាលពីយប់មិញ ពួកគេមានការភ្ញាក់ផ្អើលជាខ្លាំង ហើយបានចាត់នាយតម្រួតឲ្យដោះលែងពួកសាវ័ក។ ប៉ុន្តែ លោកប៉ុលបានមានប្រសាសន៍ថា «ពួកមេនគរបាលវាយយើងនឹងរំពាត់ នៅកណ្តាលជំនុំ ឥតមានកាត់ទោស ហើយបានដាក់គុកយើងផង ដែលយើងជាជាតិរ៉ូមដូច្នេះ ឥឡូវនេះ លោកចង់គេចកែប្រែជាដេញយើងទៅដោយសម្ងាត់វិញឬ ធ្វើដូច្នេះពុំបានទេ ត្រូវឲ្យខ្លួនលោកមកនាំយើងចេញទៅវិញ»។
ពួកសាវ័កជាសាសន៍រ៉ូម ហើយគ្មានច្បាប់ដែលត្រូវវាយសាសន៍រ៉ូម ឬឃុំខ្លួនពីបទឧក្រិដ្ឋជាក់ស្តែង ឬដោះលែងដោយមិនកាត់ទោសឲ្យបានត្រឹមត្រូវនោះឡើយ ។ លោកប៉ុលនិងស៊ីឡាសត្រូវបានដោះលែងពីគុកជាសាធារណៈ ហើយឥឡូវនេះ ពួកលោកបដិសធមិនព្រមឲ្យគេដោះលែងស្ងាត់ៗ ដោយមិនបានពន្យល់ឲ្យបានត្រឹមត្រូវពីសំណាក់តុលាការឡើយ។
នៅពេលពាក្យលោកត្រូវបានគេពាំនាំទៅប្រាប់ដល់រដ្ឋអំណាច ពួកគេបានភ្ញាក់ផ្អើល ក្រែងពួកសាវ័កឡើងឩទ្ធរដល់ព្រះចៅអធិរាជ ហើយក៏បានទៅកាន់ពន្ធនាគារភ្លាម ពួកគេបានសុំទោសលោកប៉ុលនិងស៊ីឡាស ចំពោះអំពើអយុត្តិធម៌និងភាពឃោរឃៅដែលពួកគេបានប្រព្រឹត្តទៅលើពួកលោកដោយផ្ទាល់ ហើយបាននាំពួកលោកចេញពីគុក ដោយអង្វរករសុំឲ្យពួកលោកចេញពីទីក្រុងទៅ ។ ពួកតុលាការបានភ័យខ្លាចចំពោះឥទ្ធិពលរបស់ពួកសាវ័កទៅលើពួកបណ្តាជន ហើយពួកគេក៏បានភ័យខ្លាចចំពោះអំណាចរបស់ព្រះ ដែលបានធ្វើការជំនួសបុរសដែលគ្មានកំហុសទាំងនេះផងដែរ។
ខព្រះគម្ពីរប្រចាំថ្ងៃសប្តាហ៍៖ បងប្អូនអើយ ព្រះទ្រង់បានហៅអ្នករាល់គ្នាមក ឲ្យមានសេរីភាព តែកុំឲ្យប្រើសេរីនោះ ទុកជាឱកាសដល់សាច់ឈាមឡើយ គឺត្រូវបំរើគ្នាទៅវិញទៅមក ដោយសេចក្តីស្រឡាញ់វិញ។ (កាឡាទី ៥:១៣)
