កិច្ចការនៃពួកសាវ័ក (ជំពូកទី-១៧)
អំណានព្រះគម្ពីរប្រចាំថ្ងៃ៖ ពង្សាវតាក្សត្រទី២ ជំពូក១២
ខព្រះគម្ពីរប្រចាំថ្ងៃ៖ ព្រមទាំងប្រើសេចក្តីអធិស្ឋាន និងសេចក្តីទូលអង្វរគ្រប់យ៉ាង ដើម្បីអធិស្ឋានដោយព្រះវិញ្ញាណរាល់ពេលរាល់វេលា ហើយចាំយាមក្នុងសេចក្តីនោះឯង ដោយនូវគ្រប់ទាំងសេចក្តីខ្ជាប់ខ្ជួន និងសេចក្តីទូលអង្វរឲ្យពួកបរិសុទ្ធទាំងអស់។ អេភេសូរ ៦:១៨
ដោយបានធ្វើការប្រកាសនេះ លោកប៉ុលបានមានប្រសាសន៍ថា «ឱបងប្អូន ជាកូនចៅពូជអ័ប្រាហាំ និងអស់អ្នកក្នុងពួកអ្នករាល់គ្នា ដែលកោតខ្លាចដល់ព្រះអើយ ទ្រង់បានផ្ញើព្រះបន្ទូលពីសេចក្តីសង្គ្រោះនេះ មកដល់អ្នករាល់គ្នា ដ្បិតដោយព្រោះពួកមនុស្សនៅក្រុងយេរូសាឡិម ព្រមទាំងពួកមេរបស់គេមិនបានស្គាល់ទ្រង់ទេ ក៏មិនបានយល់សេចក្តីទំនាយរបស់ពួកហោរា ដែលគេមើលរាល់តែថ្ងៃឈប់សម្រាកដែរ បានជាគេធ្វើសម្រេចតាមសេចក្តីទំនាយនោះឯង ដោយគេបានកាត់ទោសដល់ទ្រង់»។
លោកប៉ុលមិនញញើតនឹងនិយាយត្រង់ៗពីសេចក្តីពិតដែលទាក់ទងនឹងការបដិសេធន៍ព្រះអង្គសង្រ្គោះ របស់ពួកមេដឹកនាំសាសនាយូដាឡើយ។ សាវ័កប៉ុលបានមានប្រសាសន៍ថា «ហើយទោះបើគេរកហេតុអ្វីនឹងសម្លាប់ទ្រង់មិនបានក៏ដោយ គង់តែគេសូមអង្វរដល់លោកពីឡាត់ ឲ្យបានសម្លាប់ទ្រង់ដែរ ក្រោយដែលគេធ្វើសម្រេចគ្រប់សេចក្តីដែលចែងទុកពីទ្រង់រួចហើយ នោះគេក៏យកទ្រង់ចុះពីឈើឆ្កាងមកបញ្ចុះក្នុងផ្នូរ តែព្រះបានប្រោសឲ្យទ្រង់មានព្រះជន្មរស់ពីស្លាប់ឡើងវិញ ហើយទ្រង់លេចមក ឲ្យពួកអ្នកដែលបានឡើងពីស្រុកកាលីឡេ មកឯក្រុងយេរូសាឡិមជាមួយនឹងទ្រង់បានឃើញជាយូរថ្ងៃ អ្នកទាំងនោះជាស្មរបន្ទាល់ពីទ្រង់ដល់ពួកជនទាំងឡាយ»។
សាវ័កនេះបានបន្តទៀតថា «យើងខ្ញុំក៏ប្រាប់ដំណឹងល្អនេះ ដល់អ្នករាល់គ្នា គឺជាសេចក្តីសន្យា ដែលបានតាំងនឹងពួកអយ្យកោយើងថា ព្រះបានធ្វើសម្រេចតាមសេចក្តីសន្យាទ្រង់ ដល់យើងជាពូជនៃពួកអយ្យកោនោះហើយ ដោយទ្រង់បានប្រោសឲ្យព្រះយេស៊ូវមានព្រះជន្មរស់ឡើងវិញ ដូចមានសេចក្តីចែងទុកមក» ក្នុងគម្ពីរទំនុកតម្កើងជំពូកទីពីរថា «ឯងជាកូនអញ អញបានបង្កើតឯងនៅថ្ងៃនេះ» ហើយដែលព្រះបានប្រោស ឲ្យទ្រង់មានព្រះជន្មរស់ពីស្លាប់ឡើងវិញ ដើម្បីមិនឲ្យទ្រង់ត្រឡប់ទៅឯសេចក្តីពុករលួយទៀតឡើយ នោះទ្រង់មានព្រះបន្ទូលដូច្នេះថា «អញនឹងផ្តល់សេចក្តីមេត្តាករុណាស្មោះត្រង់ដែលឲ្យដល់ដាវីឌ ដល់ឯងរាល់គ្នាដែរ» ហេតុដូច្នេះបានជាទ្រង់មានព្រះបន្ទូលក្នុងបទមួយទៀតថា «ទ្រង់មិនទុកឲ្យអ្នកបរិសុទ្ធនៃទ្រង់ ឃើញសេចក្តីពុករលួយឡើយ រីឯហ្លួងដាវីឌ កាលទ្រង់បានធ្វើការងារចំពោះមនុស្សជំនាន់ទ្រង់ តាមព្រះហឫទ័យព្រះ រួចស្រេចហើយ នោះក៏ផ្ទំលក់ទៅ ហើយបានប្រមូលទៅមូលនឹងពួកអយ្យកោទ្រង់ ក៏ឃើញសេចក្តីពុករលួយដែរ»។
បន្ទាប់ពីបាននិយាយត្រង់ៗអំពីបទទំនាយដែលពួកគេធ្លាប់បានដឹង ទាក់ទងនឹងព្រះមែស្ស៊ីរួចមក ឥឡូវនេះ លោកប៉ុលបានអធិប្បាយប្រាប់ពួកគេអំពីការកែប្រែចិត្តនិងការអត់ឱនទោសបាប តាមរយៈសេចក្តីសុចរិតរបស់ព្រះយេស៊ូវដែលជាព្រះអង្គសង្រ្គោះ។ លោកបានមានប្រសាសន៍ថា «ដូច្នេះ អ្នករាល់គ្នា ជាបងប្អូនអើយ សូមជ្រាបថា ដែលមានសេចក្តីប្រោសឲ្យរួចពីបាប បានប្រកាសប្រាប់ដល់អ្នករាល់គ្នា នោះគឺដោយសារព្រះអង្គនោះឯង មួយទៀត ដោយសារទ្រង់ អស់អ្នកណាដែលជឿ បានរាប់ជាសុចរិត រួចពីគ្រប់ការទាំងអស់ ដែលពុំអាចនឹងបានរាប់ជាសុចរិត ដោយសារក្រឹត្យវិន័យលោកម៉ូសេបានឡើយ»។
ព្រះវិញ្ញាណបានគង់ជាមួយនឹងសម្តីដែលលោកប៉ុលបាននិយាយ ហើយបានចាក់ចុចចិត្តមនុស្សជាច្រើន។ ការអំពាវនាវរបស់សាវ័កប៉ុលអំពីបទទំនាយនៃគម្ពីរសញ្ញាចាស់ និងការប្រកាសរបស់លោកថាបទទំនាយទាំងនេះត្រូវបានសម្រេចនៅក្នុងព្រះរាជកិច្ចរបស់ព្រះយេស៊ូវពីស្រុកណាសារ៉ែត បាននាំឲ្យមនុស្សជាច្រើនដែលកំពុងរង់ចាំព្រះមែស្ស៊ីដែលព្រះបានសន្យា ផ្លាស់ប្តូរជំនឿ ។ ហើយប្រសាសន៍នៃការធានាអះអាងរបស់លោកប៉ុល ដែលថា «ដំណឹល្អ» នៃសេចក្តីសង្រ្គោះគឺសម្រាប់សាសន៍យូដានិងសាសន៍ដទៃដូចៗគ្នា បាននាំមកនូវអំណរនិងសេចក្តីសង្ឃឹមដល់អ្នកដែលមិនបានរាប់បញ្ចូលទៅក្នុងពូជរបស់លោកអ័ប្រាហាំតាមសាច់ឈាម។
ខព្រះគម្ពីរប្រចាំថ្ងៃសប្តាហ៍៖ អ្នករាល់គ្នាអើយ ហេតុអ្វីបានជាធ្វើដូច្នេះ យើងខ្ញុំជាមនុស្សវិស័យដូចជាអ្នករាល់គ្នាដែរ មួយទៀតយើងក៏ប្រកាសប្រាប់ដំណឹងល្អដល់អ្នករាល់គ្នាឲ្យបានបែរចេញពីអស់ទាំងការដែលឥតប្រយោជន៍យ៉ាងនេះទៅឯព្រះដ៏មានព្រះជន្មរស់វិញដែលទ្រង់បង្កើតផ្ទៃមេឃ ផែនដី សមុទ្រ និងរបស់ទាំងអស់ដែលនៅស្ថានទាំងនោះផង។ (កិច្ចការ ១៤:១៥)
