កិច្ចការនៃពួកសាវ័ក (ជំពូកទី-១៧)
អំណានព្រះគម្ពីរប្រចាំថ្ងៃ៖ ពង្សាវតាក្សត្រទី២ ជំពូក១៣
ខព្រះគម្ពីរប្រចាំថ្ងៃ៖ ដ្បិតឯខ្ញុំ ដែលខ្ញុំរស់នៅ នោះគឺសំរាប់ព្រះគ្រីស្ទទេ ហើយដែលស្លាប់ទៅ នោះជាកំរៃវិញ។ ភីលីព ១:២១
«កាលពួកសាសន៍យូដា បានចេញពីសាលាប្រជុំទៅហើយ នោះពួកសាសន៍ដទៃ ក៏សូមឲ្យប៉ុលអធិប្បាយ តាមសេចក្តីទាំងនោះ នៅថ្ងៃឈប់សម្រាកមួយក្រោយទៀត»។ ទីចុងបំផុត ពួកអ្នកប្រជុំនោះបានបែកចេញពីគ្នាទៅ «នោះមានពួកសាសន៍យូដា និងពួកចូលសាសន៍ជាច្រើន ដែលមកថ្វាយបង្គំ គេដើរតាមប៉ុល និងបាណាបាស ដែលទូន្មានឲ្យគេកាន់ខ្ជាប់ក្នុងព្រះគុណនៃព្រះ»។
អ្នកដែលបានភ្ញាក់រឭកដោយសង្កត់ថារបស់លោកប៉ុលនៅអាន់ទីយ៉ូក នៃស្រុកភីស៊ីឌា បានមកប្រជុំគ្នាម្តងទៀតនៅថ្ងៃសប្បាតហ៍ក្រោយ «នោះពួកអ្នកក្រុងស្ទើរតែទាំងអស់ ក៏មកប្រជុំគ្នា ដើម្បីនឹងស្តាប់ព្រះបន្ទូល តែកាលពួកសាសន៍យូដា បានឃើញមនុស្សទាំងហ្វូងដូច្នេះ នោះកើតមានចិត្តពេញដោយសេចក្តីច្រណែន ហើយក៏ឆ្លើយទទឹងទាស់នឹងសេចក្តីដែលប៉ុលអធិប្បាយនោះ ទាំងជម្នះហើយប្រមាថផង»។
«ប៉ុន្តែ ប៉ុល និងបាណាបាសនិយាយដោយក្លាហានថា មុខគួរឲ្យយើងខ្ញុំថ្លែងប្រាប់ព្រះបន្ទូល ដល់អ្នករាល់គ្នាជាមុនដំបូង ប៉ុន្តែ ដោយព្រោះអ្នករាល់គ្នាបោះបង់ចោលព្រះបន្ទូលនោះ ហើយជំនុំជម្រះកាត់ទោសដល់ខ្លួនឯងថា មិនគួរនឹងទទួលបានជីវិតដ៏នៅអស់កល្បជានិច្ចនោះទេ ហេតុដូច្នេះបានជាយើងខ្ញុំបែរទៅឯពួកសាសន៍ដទៃវិញ ដ្បិតព្រះអម្ចាស់ ទ្រង់បានបង្គាប់មកយើងខ្ញុំដូច្នេះថា អញបានតាំងឯងសម្រាប់ជាពន្លឺដល់សាសន៍ដទៃ ដើម្បីឲ្យឯងបានសម្រាប់ជាសេចក្តីសង្គ្រោះដល់ចុងផែនដីបំផុត»។
«កាលពួកសាសន៍ដទៃបានឮ ដូច្នេះ នោះគេមានសេចក្តីអំណរ ហើយក៏សរសើរព្រះបន្ទូលនៃព្រះអម្ចាស់ ចំណែកអស់អ្នកដែលត្រូវបានជីវិតអស់កល្បជានិច្ច នោះក៏បានជឿ» ។ ពួកគេមានអំណរយ៉ាងក្រៃលែង ដែលព្រះគ្រិស្តបានទទួលស្គាល់ពួកគេថាជាកូនរបស់ព្រះ ហើយពួកគេបានស្តាប់ព្រះបន្ទួលដែលពួកសាវ័កបានអធិប្បាយដោយមានចិត្តអរព្រះគុណ ។ ពួកអ្នកដែលបានជឿមានចិត្តពុះកញ្រ្ជោលក្នុងការចែកចាយសារនៃដំណឹងល្អបន្តដល់អ្នកដទៃ ហើយដូច្នេះ «ព្រះបន្ទូលនៃព្រះអម្ចាស់ បានផ្សាយសុសសាយទូទៅពេញក្នុងស្រុកនោះ»។
ស្លាបប៉ាកាដែលព្រះវិញ្ញាណបានបណ្តាល បានរៀបរាប់ពីការជួបប្រជុំគ្នានៃសាសន៍ដទៃនេះជាច្រើនសតវត្សរ៍កន្លងមកហើយ ប៉ុន្តែ បទទំនាយដែលចេញពីមាត់ហោរានេះមិនសូវមានមនុស្សយល់ឡើយ។ លោកហូសេបានមានប្រសាសន៍ថា៖ «ប៉ុន្តែ ពួកកូនចៅអ៊ីស្រាអែលនឹងមានចំនួនដូចជាខ្សាច់នៅសមុទ្រ ដែលនឹងវាល់ ឬរាប់មិនបានឡើយ រួចក្រោយមក នឹងកើតមានដូច្នេះ គឺពាក្យដែលបានពោលទុកថា ឯងរាល់គ្នាមិនមែនជារាស្ត្រអញទេ នោះនឹងផ្លាស់ទៅជាថា ឯងរាល់គ្នាជាកូននៃព្រះដ៏មានព្រះជន្មរស់នៅវិញ» ។ ហើយម្តងទៀត៖ «អញនឹងសាបព្រោះពូជនាងនៅលើផែនដីសម្រាប់អញ រួចអញនឹងអាណិតមេត្តាដល់ពួកឡូរ៉ូហាម៉ា ហើយនិងនិយាយដល់ពួកឡូអាំមីថា ឯងជារាស្រ្តរបស់អញ នោះគេនឹងឆ្លើយតបថា ទ្រង់ជាព្រះនៃយើងខ្ញុំ» (ហូសេ ១:១០ និង ២:២៣)។
នៅក្នុងព្រះរាជកិច្ចរបស់ព្រះអង្គនៅលើផែនដី ព្រះអង្គសង្រ្គោះបានទាយទុកជាមុនអំពីការរីករាលដាលនៃដំណឹងល្អនៅក្នុងចំណោមសាសន៍ដទៃនេះ។ នៅក្នុងរឿងប្រៀបប្រដូចអំពីចម្ការទំពាំងបាយជូរ ព្រះអង្គបានមានបន្ទូលទៅកាន់សាសន៍យូដាដែលរឹងចចេសថា «នគរព្រះនឹងត្រូវហូតចេញពីអ្នករាល់គ្នា ប្រគល់ទៅឲ្យសាសន៍មួយទៀត ដែលគេនឹងបង្កើតផលរបស់នគរនោះ» (ម៉ាថាយ ២១:៤៣) ។ ហើយបន្ទាប់ពីការមានព្រះជន្មរស់ឡើងវិញរបស់ទ្រង់ ព្រះអង្គបានមានបន្ទូលទៅកាន់ពួកសិស្សរបស់ព្រះអង្គថា ចូរ «ទៅពេញសព្វក្នុងលោកិយទាំងមូល» ហើយ «ផ្សាយដំណឹងល្អទូទៅដល់គ្រប់មនុស្សទាំងអស់ចុះ» (ម៉ាថាយ ២៨:១៩ និង ម៉ាកុស ១៦:១៥)។
ខព្រះគម្ពីរប្រចាំថ្ងៃសប្តាហ៍៖ អ្នករាល់គ្នាអើយ ហេតុអ្វីបានជាធ្វើដូច្នេះ យើងខ្ញុំជាមនុស្សវិស័យដូចជាអ្នករាល់គ្នាដែរ មួយទៀតយើងក៏ប្រកាសប្រាប់ដំណឹងល្អដល់អ្នករាល់គ្នាឲ្យបានបែរចេញពីអស់ទាំងការដែលឥតប្រយោជន៍យ៉ាងនេះទៅឯព្រះដ៏មានព្រះជន្មរស់វិញដែលទ្រង់បង្កើតផ្ទៃមេឃ ផែនដី សមុទ្រ និងរបស់ទាំងអស់ដែលនៅស្ថានទាំងនោះផង។ (កិច្ចការ ១៤:១៥)
