ថ្ងៃព្រហស្បតិ៍ ទី២១ ខែមករា ឆ្នាំ២០២១
អំណានព្រះគម្ពីរប្រចាំថ្ងៃ៖ យ៉ូបជំពួក២៦
ខព្រះគម្ពីរប្រចាំថ្ងៃ: ហើយឲ្យបានស្គាល់សេចក្តីស្រឡាញ់របស់ព្រះគ្រីស្ទដ៏រកគិតមិនយល់ ប្រយោជន៍ឲ្យអ្នករាល់គ្នាបានពេញ ដល់គ្រប់ទាំងសេចក្តីពោរពេញរបស់ផងព្រះ។ អេភេសូរ ៣:១៩
ព្រះបានប្រទានឱកាសពិសេសដល់សាវ័កប៉ុល នៅដើមដំបូងនៃបទពិសោធន៍ជាគ្រិស្តបរិស័ទរបស់លោក ដើម្បីរៀនសូត្រពីព្រះហឫទ័យរបស់ព្រះ ទាក់ទងនឹងអ្នកដើរតាមព្រះយេស៊ូវ ។ លោកត្រូវ «បានលើកឡើងទៅឋានសួគ៌ នៅជាន់ទីបី» «អ្នកនោះបានលើកឡើងដល់ឋានបរមសុខ ហើយបានឮពាក្យដែលថ្លែងប្រាប់មិនបាន ក៏គ្មានច្បាប់ឲ្យមនុស្សណានិយាយឡើយ» ។ លោកទទួលស្គាល់ដោយខ្លួនឯងថា «ការជាក់ស្តែង និងការបើកសម្តែងមកពីព្រះអម្ចាស់ទៀត» ត្រូវបានប្រទានដល់លោក «មកអំពីព្រះ» ។ ការយល់របស់លោកអំពីគោលការណ៍នៃសេចក្តីពិតរបស់ដំណឹងល្អ «មិនចាញ់ពួកសាវ័កធំណាមួយនោះទេ» (កូរិនថូសទី២ ១២: ២, ៤, ១, ១១) ។ លោកមានការយល់ដឹងច្បាស់លាស់អំពី «ទទឹង បណ្តោយ ជម្រៅ និងកម្ពស់» នៃ «សេចក្តីស្រឡាញ់នោះ ហើយឲ្យបានស្គាល់សេចក្តីស្រឡាញ់របស់ព្រះគ្រិស្តដ៏រកគិតមិនយល់» (អេភេសូរ ៣:១៨, ១៩)។
លោកប៉ុលមិនអាចប្រាប់ពីអ្វីៗទាំងអស់ ដែលគាត់បានឃើញក្នុងចក្ខុនិមិត្ដនោះឡើយ ដ្បិតក្នុងចំណោមអ្នកស្ដាប់ទាំងនោះមានអ្នកខ្លះដែលមិនធ្វើតាមពាក្យសម្ដីរបស់លោក។ ប៉ុន្តែ អ្វីដែលបានបង្ហាញដល់លោកនៅក្នុងការបើកសម្តែងនោះ បានជួយឲ្យលោកធ្វើការជាមេដឹកនាំនិងជាគ្រូបង្រៀនដែលប្រកបដោយប្រាជ្ញា ហើយក៏បានបង្កើតសារដែលប៉ុន្មានឆ្នាំក្រោយមកបានផ្ញើទៅកាន់ពួកជំនុំផងដែរ ។ ចំណាប់អារម្មណ៍ដែលលោកបានទទួលនៅពេលដែលលោកបានឃើញការបើកសម្តែងនោះ នៅជាមួយនឹងលោកជានិច្ច ធ្វើឲ្យលោកអាចធ្វើជាគំរូដ៏ត្រឹមត្រូវអំពីអត្តចរិតគ្រិស្តបរិស័ទ។ លោកបាននាំមកនូវជំនួយនិងកម្លាំងដល់ពួកជំនុំរបស់ព្រះ តាមរយៈពាក្យសម្តីនិងសំបុត្រដែលលោកបានសរសេរ។ សារនេះនិយាយយ៉ាងច្បាស់ជាមួយពួកអ្នកជឿសព្វថ្ងៃនេះ អំពីគ្រោះថ្នាក់ដែលនឹងគំរាមកំហែងដល់ពួកជំនុំ និងគោលលទ្ធិក្លែងក្លាយដែលពួកគេនឹងជួបប្រទះ។
សាវ័កប៉ុលមានបំណងចង់ឲ្យពួកអ្នកដែលគាត់បានផ្ញើសំបុត្រទៅទូន្មាន និងដាស់តឿននោះ «កុំឲ្យយើងនៅជាកូនតូចទៀត ទាំងត្រូវគ្រប់អស់ទាំងខ្យល់នៃសេចក្តីបង្រៀនបោក ហើយផាត់យើងចុះឡើង ដោយសេចក្តីឆបោករបស់ផងមនុស្ស ហើយដោយឧបាយកលដែលគេប្រើនឹងនាំឲ្យវង្វេងទៀតឡើយ»។ ប៉ុន្តែ ឲ្យពួកគេទាំងអស់គ្នា «បានរួបរួម ខាងឯសេចក្តីជំនឿរួចជាស្រេច ហើយបានស្គាល់ព្រះរាជបុត្រានៃព្រះ ដូចគ្នាទាំងអស់ គឺដល់បានពេញជាមនុស្ស ហើយដល់ខ្នាតកម្ពស់នៃសេចក្តីពោរពេញផងព្រះគ្រិស្ត» ។ លោកបានអង្វរដល់អស់អ្នកដែលជាអ្នកដើរតាមព្រះយេស៊ូវនៅក្នុងសហគមន៍នៃសាសន៍ដទៃកុំឲ្យដើរ «ដូចជាសាសន៍ដទៃឯទៀត ដែលគេដើរតាមគំនិតឥតប្រយោជន៍របស់គេទៀតឡើយ គំនិតគេត្រូវបង្អាប់ ហើយគេដាច់ចេញពីព្រះជន្មព្រះ… ព្រោះចិត្តគេរឹងទទឹង» ។ ប៉ុន្តែ «ត្រូវប្រយ័ត្នដោយមធ្យ័ត ដែលអ្នករាល់គ្នាដើរយ៉ាងណា កុំឲ្យដើរដូចជាមនុស្សឥតប្រាជ្ញាឡើយ ត្រូវតែដើរដោយមានប្រាជ្ញាវិញ ទាំងលៃយកឱកាសឲ្យទាន់ពេលផង ពីព្រោះសម័យនេះអាក្រក់ណាស់» (អេភេសូរ ៤:១៤, ១៣, ១៧, ១៨; ៥:១៥, ១៦) ។ លោកបានលើកទឹកចិត្តពួកអ្នកជឿឲ្យទន្ទឹងរង់ចាំពេលដែលព្រះគ្រិស្ត ជាព្រះដែល «បានស្រឡាញ់ដល់ពួកជំនុំ ហើយបានប្រគល់ព្រះអង្គទ្រង់ជំនួសផង ប្រយោជន៍នឹងថ្វាយពួកជំនុំនេះដល់ព្រះអង្គទ្រង់ ទុកជាពួកជំនុំដ៏ឧត្តម ឥតប្រឡាក់ ឥតជ្រួញ ឬមានអ្វីឲ្យដូចឡើយ គឺឲ្យបានបរិសុទ្ធ ហើយឥតកន្លែងបន្ទោសបានវិញ» (អេភេសូរ ៥:២៥, ២៧)។
សំបុត្រដែលសរសេរដោយអំណាចរបស់ព្រះ មិនមែនជាអំណាចរបស់មនុស្សនេះ មានមេរៀនដែលមនុស្សទាំងអស់អាចនឹងទទួលបានអត្ថប្រយោជន៍ជាញឹកញាប់ ។ នៅក្នុងសំបុត្រទាំងនេះរៀបរាប់ពីការអនុវត្តន៍នៃភាពដូចជាព្រះ មានបង្ហាញពីគោលការណ៍ដែលពួកជំនុំគ្រប់គ្នាត្រូវធ្វើតាម និងមានបញ្ជាក់យ៉ាងច្បាស់អំពីផ្លូវទៅកាន់ជីវិតអស់កល្ប។
ខព្រះគម្ពីរប្រចាំថ្ងៃសប្តាហ៍៖ ឯព្រះដែលទ្រង់អាចនឹងធ្វើហួសសន្ធឹក លើសជាងអស់ទាំងសេចក្តីដែលយើងសូម ឬគិតក្តីតាមព្រះចេស្តាដែលបណ្តាលក្នុងយើងរាល់គ្នា។ ( អេភេសូរ ៣:២០ )
