កិច្ចការនៃពួកសាវ័ក (ជំពូកទី-៣៩)
អំណានព្រះគម្ពីរប្រចាំថ្ងៃ៖ យ៉ូបជំពួក៨
ខព្រះគម្ពីរប្រចាំថ្ងៃ: បងប្អូនអើយ ព្រះទ្រង់បានហៅអ្នករាល់គ្នាមក ឲ្យមានសេរីភាព តែកុំឲ្យប្រើសេរីនោះ ទុកជាឱកាសដល់សាច់ឈាមឡើយ គឺត្រូវបំរើគ្នាទៅវិញទៅមក ដោយសេចក្តីស្រឡាញ់វិញ។ កាឡាទី ៥:១៣
ដូច្នោះ លោកប៉ុលដែលជាអ្នកទោស បានជំរុញការទាមទារនៃក្រឹត្យវិន័យរបស់ព្រះ ដល់សាសន៍យូដានិងសាសន៍ដទៃ ហើយបានបង្ហាញថាព្រះយេស៊ូវ ជាអ្នកស្រុកណាសារ៉ែតដែលគេមើលងាយ គឺជាព្រះរាជបុត្រានៃព្រះ ជាព្រះដ៏ប្រោសលោះនៃពិភពលោក ។
ព្រះរាជនីនៃសាសន៍យូដាបានយល់យ៉ាងច្បាស់ អំពីលក្ខណៈដ៏ពិសិដ្ឋនៃក្រឹត្យវិន័យដែលព្រះនាងបានប្រព្រឹត្តដោយឥតអៀនខ្មាស ប៉ុន្តែ ការប្រកាន់ពូជសាសន៍ប្រឆាំងនឹងព្រះយេស៊ូវនៃកាល់វ៉ារី បានធ្វើឲ្យព្រះទ័យរបស់ព្រះនាង ប្រឆាំងនឹងព្រះបន្ទូលនៃជីវិត ។ ប៉ុន្ដែ កន្លងមក លោកភេលីចមិនដែលស្ដាប់សេចក្ដីពិតទេ ហើយនៅពេលដែលព្រះវិញ្ញាណនៃព្រះបានបំផ្លាស់បំប្រែចិត្តរបស់លោក លោកបានព្រួយចិត្ដយ៉ាងខ្លាំង។ ឥឡូវនេះ មនសិការរបស់លោកក៏បានភ្ញាក់រឭកឡើង ធ្វើឲ្យលោកភេលីចបានឮសំឡេងនៃមនសិការរបស់លោក ហើយលោកបានដឹងថាសម្តីរបស់លោកប៉ុលជាពាក្យពិត។ គំនិតបាននឹកឃើញកំហុសពីអតីតកាល ។ ដោយមានភាពខុសគ្នាដ៏គួរឲ្យភ័យខ្លាច អាថ៌កំបាំងនៃជីវិតដែលបំផ្លិចបំផ្លាញនិងបង្ហូរឈាម និងកំណត់ត្រាខ្មៅងងឹតកាលពីឆ្នាំមុនៗ របស់លោក បានលេចធ្លោឡើងនៅចំពោះមុខលោក ។ លោកបានមើលឃើញដោយខ្លួនឯងមានភាពអយុត្តិធម៌ ឃោរឃៅ និងការរំលោភបំពាន។ កន្លងមក លោកមិនដែលដឹងពីសេចក្តីពិតដូច្នេះឡើយ។ កន្លងមក ចិត្តរបស់លោកមិនដែលពោរពេញដោយការភ័យខ្លាចដូច្នេះទេ។ គំនិតដែលថាអាថ៌កំបាំងទាំងអស់នៃឧក្រិដ្ឋកម្មរបស់លោកត្រូវបានបើកចំហនៅចំពោះព្រះនេត្ររបស់ព្រះ ហើយថាលោកនឹងត្រូវបានជំនុំជម្រះទៅតាមអំពើដែលខ្លួនបានប្រព្រឹត្ត បានធ្វើឲ្យលោកភ័យញាប់ញ័រ ។
ប៉ុន្តែ ជំនួសឲ្យការភ្ញាក់រឭករបស់លោកនេះដឹកនាំឲ្យមានការកែប្រែចិត្ត លោកបែរជាបានព្យាយាមបោះបង់ការឆ្លុះបញ្ចាំងដែលលោកមិនពេញចិត្តទាំងនេះចោលចេញទៅវិញ ។ លោកបានកាត់បន្ថយបទសម្ភាសន៍ជាមួយលោកប៉ុលឲ្យខ្លី ។ លោកបានមានប្រសាសន៍ថា «ឥឡូវនេះ ឲ្យទៅសិនចុះ កាលណាមានឱកាសស្រួល នោះអញនឹងហៅឯងមកទៀត» ។
ការគ្រប់គ្រងរបស់លោកភេលីចនិងឆ្មាំគុកនៅក្រុងភីលីពមានភាពខុសគ្នាដាច់ស្រឡះ! ពួកអ្នកបម្រើរបស់ព្រះអម្ចាស់ត្រូវបានគេចាប់ចង យកមកប្រគល់ឲ្យឆ្មាំគុក ដូចជាលោកប៉ុលត្រូវបានគេនាំយកមកជូនលោកភេលីចដូច្នោះដែរ ។ ភស្តុតាងដែលពួកគេបានផ្តល់ឲ្យ ស្តីអំពីការទ្រទ្រង់ដោយអំណាចរបស់ព្រះ ក្តីអំណររបស់ពួកគេ នៅក្រោមការរងទុក្ខនិងភាពអាម៉ាស់ភាពមិនភ័យខ្លាចរបស់ពួកគេ នៅពេលដែលផែនដីត្រូវបានកក្រើករំពើកដោយការរញ្ជួយដី និងស្មារតីនៃការអភ័យទោសដូចជាព្រះគ្រិស្ត បានបញ្ជូនការជឿជាក់ដល់ចិត្តរបស់ឆ្មាំគុក ហើយដោយការភ័យរន្ធត់ គាត់បានលន់តួអំពើបាបរបស់គាត់ ហើយបានរកឃើញការលើកលែងទោស។ ចំណែកឯលោកភេលីចវិញ បានភ័យញ័ររន្ធត់ដែរ តែលោកមិនបានកែប្រែចិត្ដឡើយ ឆ្មាំគុកបានស្វាគមន៍ចំពោះព្រះវិញ្ញាណនៃព្រះ មកកាន់ចិត្ដ និងផ្ទះរបស់គាត់។ តែលោកភេលីចបានសុំឲ្យអ្នកនាំសាររបស់ព្រះចាកចេញពីលោកទៅ ។ ម្នាក់បានជ្រើសរើសធ្វើជាកូនរបស់ព្រះ និងជាអ្នកស្នងមរតកនៃ ឋានសួគ៌ ។ ម្នាក់ទៀតចាប់ឆ្នោតយកការប្រព្រឹត្តអំពើទុច្ចរិត។
អស់រយៈពេលពីរឆ្នាំ គ្មានការសម្រេចក្តីយ៉ាងណា ទាស់នឹងលោកប៉ុលទេ ហើយលោកនៅតែជាប់ក្នុងគុកដដែល ។ លោកភេលីចបានទៅជួបគាត់ជាច្រើនដង ហើយបានស្ដាប់សម្តី របស់គាត់ដោយយកចិត្តទុកដាក់ ។ ប៉ុន្ដែ គោលបំណងពិតប្រាកដរបស់លោកភេលីចក្នុងការបង្ហាញភាពស្និទ្ធស្នាលនេះ គឺគ្រាន់តែចង់បានសំណូកប៉ុណ្ណោះ ហើយលោកបានគិតក្នុងចិត្តថាប្រសិនបើលោកប៉ុលយកប្រាក់ជាច្រើនមកសូក នោះលោកនឹងបានរួចខ្លួនជាមិនខាន ។ ទោះជាយ៉ាងនេះក៏ដោយ ក៏និស្ស័យដ៏ថ្លៃថ្នូររបស់សាវ័កប៉ុល មិនចង់បានរួចខ្លួនដោយការសូកប៉ាន់ឡើយ ។ លោកមិនមានទោសពីបទឧក្រិដ្ឋអ្វីទេ ហើយលោកនឹងមិនព្រមឱនក្បាលប្រព្រឹត្តខុស ដើម្បីទទួលបានសេរីភាពដែរ ។ លើសពីនេះទៅទៀត លោកមានជីវភាពក្រីក្រណាស់ មិនមានប្រាក់បង់ថ្លៃលោះបែបនេះទេ ប៉ុន្តែ ប្រសិនបើគាត់ចង់ធ្វើដូច្នេះ ហើយមិនអាចធ្វើដោយខ្លួនឯងបាន លោកអាចអំពាវនាវសុំការអាណិតអាសូរ និងក្តីសប្បុរសពីពូកអ្នកដែលបានកែប្រែចិត្ដបាន ។ លោកក៏បានដឹងដែរថា លោកនៅក្នុងព្រះហស្តរបស់ព្រះ ហើយលោកនឹងមិនរំខានដល់គោលបំណងរបស់ព្រះ ដោយសារតែរឿងផ្ទាល់ខ្លួនឡើយ ។
ទីបំផុត លោកភេលីចត្រូវបានកោះហៅទៅកាន់ទីក្រុងរ៉ូម ដោយសារតែបានប្រព្រឹត្តកំហុសធ្ងន់ធ្ងរប្រឆាំងនឹងសាសន៍យូដា ។ មុននឹងពេលចាកចេញពីសេសារា តាមការកោះហៅនេះ លោកភេលីចបានគិតថា «ចង់បានបំណាច់ ចំពោះសាសន៍យូដាផង» បានជាលោកទុកឲ្យប៉ុលជាប់គុកទៅ ។ ប៉ុន្ដែ លោកភេលីចមិនទទួលជោគជ័យក្នុងការប៉ុនប៉ងទាក់ទាញទំនុកចិត្តពីសាសន៍យូដាទេ ។ គេបានដកលោកចេញពីតំណែងយ៉ាងអាម៉ាស់ ហើយលោកព័រគាសភេ ស្ទុស បានមកឈរជំនួសតំណែងលោកភេលីច ជាអភិបាលក្រុងសេសារា ។ព្រះបានអនុញ្ញាតឲ្យកាំរស្មីនៃពន្លឺពីឋានសួគ៌ចែងចាំងមកលើលោកភេលីច ពេលដែលលោកប៉ុលបានវែកញែកជាមួយលោកអំពីសេចក្ដីសុចរិត សេចក្ដីមេត្ដាករុណា និងការជំនុំជម្រះ ដែលនឹងកើតឡើង ។ ឱកាសដែលព្រះបានបញ្ជូនមកពីឋានសួគ៌នោះហើយ ដែលលោកមើលឃើញ និងបោះបង់ចោល អំពើបាបរបស់លោក ។ ប៉ុន្ដែ លោកបានប្រាប់ដល់អ្នកនាំសាររបស់ព្រះថា៖ «ឥឡូវនេះឲ្យទៅសិនចុះ កាលណាមានឱកាសស្រួល នោះអញនឹងហៅឯងមកទៀត» ។ លោកបានបន្ទាបសេចក្ដីមេត្តាករុណាដែលព្រះបានប្រទានដល់លោកចុងក្រោយបង្អស់ ។ ហើយលោកនឹងមិនដែលបានទទួលការត្រាស់ហៅពីព្រះម្តងទៀតឡើយ។
ខព្រះគម្ពីរប្រចាំថ្ងៃសប្តាហ៍៖ ប៉ុលអើយ កុំខ្លាចអ្វីឡើយ ត្រូវឲ្យអ្នកឈរនៅមុខសេសារ ហើយមើល ព្រះទ្រង់បានអនុញ្ញាតឲ្យអស់អ្នក ដែលដើរដំណើរជាមួយនឹងអ្នកដែរ ដូច្នេះ អ្នករាល់គ្នាអើយ ចូរសង្ឃឹមឡើង ព្រោះខ្ញុំជឿព្រះថា ការដែលទ្រង់មានព្រះបន្ទូលមកខ្ញុំនឹងកើតមកដូច្នោះមែន។ ( កិច្ចការ ២៧:២៤-២៥ )។
