អំណានព្រះគម្ពីរប្រចាំថ្ងៃ៖ យ៉ូបជំពួក​១១​

ខព្រះគម្ពីរប្រចាំថ្ងៃ: ដ្បិត​ខ្ញុំ​គ្មាន​សេចក្តី​ខ្មាស ចំពោះ​ដំណឹង​ល្អ​នៃ​ព្រះគ្រីស្ទ​ទេ ពី​ព្រោះ​ជា​ព្រះចេស្តា​នៃ​ព្រះ សំរាប់​នឹង​ជួយ​សង្គ្រោះ​ដល់​អស់​អ្នក​ណា​ដែល​ជឿ គឺ​ដល់​ទាំង​សាសន៍​យូដា​ជា​ដើម និង​សាសន៍​ក្រេក​ផង។ រ៉ូម ១:១៦

លោកប៉ុលប្តឹងឧទ្ធរណ៍ទៅស្តេចសេសារ ហើយលោកភេស្ទុសមិនអាចធ្វើអ្វីផ្សេងក្រៅពីបញ្ជូនគាត់ទៅទីក្រុងរ៉ូមបានទេ ។ ប៉ុន្តែ មុននឹងរកសំពៅ​ទៅ​បានគេត្រូវចំណាយពេលជាច្រើនថ្ងៃ។ ហើយដោយមានអ្នកទោសដទៃទៀតត្រូវបញ្ជូនទៅជាមួយលោកប៉ុល សំណុំរឿងរបស់ពួកគេក៏ត្រូវពន្យារពេលដែរ។ ការនេះបានផ្ដល់ឱកាសឲ្យលោកប៉ុលបង្ហាញពីមូលហេតុនៃជំនឿរបស់លោកនៅចំពោះមុខមនុស្សសំខាន់ៗនៅក្រុងសេសារា និងនៅចំពោះមុខ​ស្ដេច​អ័គ្រីប៉ា ដែលជាស្ដេចចុងក្រោយនៃរាជវង្សស្ដេចហេរ៉ូឌ ។

«ក្រោយបួនដប់ថ្ងៃមកទៀត ព្រះរាជាអ័គ្រីប៉ា និងព្រះនាងបេរេនីស ស្តេច​យាងចុះមកឯសេសារា ក៏ចូលទៅសួរលោកភេស្ទុស កាលទ្រង់គង់នៅ​ទី​នោះ​​ជាយូរថ្ងៃ នោះលោកភេស្ទុសក៏ទូលពីរឿងប៉ុល ថ្វាយស្តេចថា លោកភេលីច​បានទុកអ្នកទោសម្នាក់ឲ្យជាប់គុកនៅទីនេះ» ។ លោកបានរៀប​រាប់ពី​កាលៈ​ទេសៈ ដែលនាំឲ្យមានការប្តឹងឧទ្ធរណ៍របស់អ្នកទោសមកដល់ស្តេចសេសារដោយទូលប្រាប់ពីដំណើរការកាត់ក្ដីរបស់លោកប៉ុល កន្លងមក នៅមុនពេល​ដែល​លោកបានចូលកាន់តំណែង លោកនិយាយថា សាសន៍យូដាបាន​ប្ដឹងប៉ុលដោយមិនមានការចោទប្រកាន់ដូចអ្វីដែលលោកបានគិតស្មាននោះទេ ប៉ុន្តែ «គេគ្រាន់តែប្រកាន់ពីរបៀបសាសនាគេ ហើយពីដំណើរម្នាក់ឈ្មោះយេស៊ូវដែលស្លាប់ទៅហើយ តែប៉ុលប្រកាន់ថានៅរស់ទេប៉ុណ្ណោះ»។

កាលលោកភេស្ទុសរៀបរាប់អំពីរឿងរបស់លោកដូច្នេះ ស្តេចអ័គ្រីប៉ាបានចាប់អារម្មណ៍ជាខ្លាំង ហើយមានបន្ទូលថា «ខ្ញុំក៏ចង់ស្តាប់អ្នកនោះដែរ»។ ដើម្បីតម្រូវទៅតាមបំណងរបស់ស្តេចអ័គ្រីប៉ា លោកភេស្ទុសក៏បានរៀបចំការជំនុំជម្រះនៅថ្ងៃបន្ទាប់ ។ «ដូច្នេះ លុះថ្ងៃស្អែកឡើង នោះព្រះរាជាអ័គ្រីប៉ា និងព្រះនាងបេរេនីស ក៏យាងមក ដោយដំណើរដ៏រុងរឿង ចូលក្នុងសាលាក្តី មានទាំងមេទ័ពធំ និងពួកអ្នកធំក្នុងទីក្រុងផង រួចកាលលោកភេស្ទុស​បាន​បង្គាប់ហើយ នោះគេនាំប៉ុលចូលមក»។

ដើម្បីថ្វាយកិត្តិយសដល់ភ្ញៀវរបស់លោក លោកភេស្ទុសបានខិតខំពន្យារឱកាសដ៏ធំនេះឲ្យបានយូរ ។ សម្លៀកបំពាក់ដ៏រុងរឿងរបស់លោកអភិបាលខេត្តនិងភ្ញៀវរបស់លោក ដាវរបស់ទាហាន និងគ្រឿងសឹករបស់ពួកមេបញ្ជាការរបស់ពួកគេ បានជះពន្លឺពេញបន្ទប់កាត់ក្តី។

ឥឡូវនេះ លោកប៉ុលនៅតែឈរទាំងជាប់ខ្នោះ នៅមុខក្រុមមនុស្សដែលប្រជុំគ្នាដដែល វត្តមាននេះមានភាពផ្ទុយគ្នាស្រឡះ ស្តេចអ័គ្រីប៉ា​និង​ព្រះ​នាង​បេរេនីស មានអំណាចនិងឋានៈខ្ពស់ ហើយដោយសារតែរឿងនេះ ពួកគេត្រូវបានទទួលការពេញនិយមពីសំណាក់លោកិយ ។ ប៉ុន្ដែ ពួកគេ​មាន​ភាព​ទន់ខ្សោយខាងអត្តចរិត ដែលព្រះគួរកោតសរសើរ ។ ពួកគេជា​អ្នក​បំពាន​នឹងក្រឹត្យវិន័យ ពុករលួយនៅក្នុងចិត្តនិងក្នុងជីវិត ។ ទង្វើរបស់ពួកគេត្រូវបានឋានសួគ៌ស្អប់ខ្ពើម។

អ្នកជាប់ឃុំចំណាស់ ដែលត្រូវគេដាក់ច្រវាក់ជាប់ជាមួយនឹងទាហានដែលយាមលោកនោះ មិនមានរូបរាងខាងក្រៅ ដែលនាំឲ្យលោកិយ​គោរព​ឡើយ ។ ប៉ុន្តែ នៅក្នុងបុរសដែលហាក់ដូចជាគ្មានមិត្តភ័ក្រ្ត ទ្រព្យសម្បត្តិ ឬមុខតំណែង ហើយបានជាប់ឃុំឃាំងដោយសារជំនឿរបស់គាត់ទៅលើព្រះរាជបុត្រានៃព្រះនោះ ពួកទេវតានៃឋានសួគ៌មានការចាប់អារម្មណ៍ជាខ្លាំង ។ ពួកទេវតាគឺជាអ្នកតាមបម្រើរបស់លោក ។ មាន​សិរីរុងរឿងរបស់អ្នកនាំសារម្នាក់ក្នុងចំណោមអ្នកនាំសារដ៏មានពន្លឺ បានជះចែងចាំង ធ្វើឲ្យស្តេចដ៏មានអំណាចនិងអំនួតឡើងស្លេកស្លាំង ស្តេចនិងពួករាជបម្រើត្រូវបានវាយប្រហារឲ្យក្រាបដល់ដី ដូចជាពួកទាហានរ៉ូមនៅឯផ្នូររបស់ព្រះគ្រិស្តយ៉ាងដូច្នោះដែរ។

លោកភេស្ទុសបានរៀបរាប់អំពីករណីរបស់គាត់ ប្រាប់ដល់​ហ្វូង​មនុស្ស​ដោយផ្ទាល់ ដោយពាក្យថា «ឱព្រះករុណាអ័គ្រីប៉ា និងអស់លោក​ដែលទៅ​ទីនេះ ជាមួយនឹងយើងខ្ញុំអើយ សូមទតមើលមនុស្សនេះ ដែលបណ្តាជន​សាសន៍យូដាទាំងប៉ុន្មាន បានប្តឹងដល់ទូលបង្គំ កាលនៅឯក្រុងយេរូសាឡិម ហើយនិងនៅទីនេះដែរ ដោយសម្រែកថា មិនគួរឲ្យវានៅរស់ទៀតទេ តែទូលបង្គំមិនឃើញថាមានទោសអ្វីដែលគួរឲ្យស្លាប់សោះ ហើយដែលខ្លួនវាបានសូមរើក្តីដល់មហារាជអូគូស្ទវិញ នោះបានជាទូលបង្គំសម្រេចថា នឹងបញ្ជូន​វាឲ្យទៅចុះ តែទូលបង្គំគ្មានរឿងអ្វីជាប្រាកដ នឹងសរសេរថ្វាយដល់ព្រះអម្ចាស់នៃទូលបង្គំ ពីដំណើរវាទេ ហេតុនោះបានជាទូលបង្គំនាំវាមកនៅទីចំពោះមុខនៃអស់លោកទាំងឡាយ មានព្រះរាជាជាដើម ឱព្រះរាជាអ័គ្រីប៉ាអើយ ដើម្បីកាលណាបានពិចារណាសួរវារួចហើយ នោះទូលបង្គំនឹងបានរឿងអ្វីខ្លះ ឲ្យ​ដាក់ចុះក្នុងសំបុត្រ ដ្បិតបើតាមទូលបង្គំ មើលទៅដូចជាគ្មានទំនងនឹងបញ្ជូនអ្នកទោសទៅ ឥតមានបង្ហាញទោសទាំងប៉ុន្មាន ដែលគេចោទដល់វានោះទេ»។