​អំណានព្រះគម្ពីរពេលព្រឹក៖ សេចក្តី​ឆ្មើងឆ្មៃ​នាំ​មុខ​សេចក្តី​ហិនវិនាស ហើយ​ចិត្ត​ព្រហើន​ក៏​នាំ​ឲ្យ​ដួល​ចុះ​ដែរ។ សុភាសិត ១៦:១៨

អំណានប្រចាំថ្ងៃ

មុនការបះបោររបស់វា លុយស៊ីហ្វ័រគឺជាទេវតាមួយអង្គនៅនគរស្ថានសួគ៌ ដែលមានឋានៈខ្ពង់ខ្ពស់ និងមានកិត្តិយស បន្ទាប់ពីព្រះរាជបុត្រា ជាទីស្រឡាញ់របស់ព្រះ។ ទឹកមុខរបស់វាស្លូតបូត ហើយពោរពេញដោយ​សេចក្តីអំណរ ដូចជាទេវតាដទៃទៀតដែរ។ ថ្ងាសរបស់វាធំស្រឡះ ដែល​បង្ហាញនូវប្រាជ្ញាដ៏វាងវៃរបស់វា។ រូបរាងរបស់វាល្អឥតខ្ចោះប្រកបដោយ ភាពថ្លៃថ្នូរដ៏មានអានុភាព។ មានពន្លឺរស្មីពិសេសចេញពីមុខរបស់វា ហើយ​ចែងចាំងនៅជុំវិញ ដែលភ្លឺចាំង ជាងពន្លឺនៅជុំវិញទេវតាផ្សេងៗទៀត ប៉ុន្តែព្រះគ្រីស្ទជាព្រះរាជបុត្រារបស់ព្រះទ្រង់មានភាពល្អប្រសើរឧត្តម លើសជាងអស់ទាំងពួកទេវតាទាំងឡាយទៅទៀត។ ព្រះអង្គគង់នៅជាមួយនឹងព្រះវរបិតា​ទ្រង់ តាំងពីមុនព្រះបានបង្កើតពួកទេវតាទាំងអស់មកម៉្លេះ។ លុយស៊ីហ្វ័របាន​​ច្រណែននឹងព្រះគ្រីស្ទ ហើយទាមទារចង់បានឋានៈដែលព្រះបានប្រទានដល់ព្រះគ្រីស្ទតែមួយអង្គគត់នោះបន្តិចម្តងៗ។

ព្រះអាទិករដ៏​ឧត្តម​បានប្រជុំពួកពលបរិវារ (ទេវតា) ទាំងឡាយ​នៅ​ស្ថានសួគ៌ ដើម្បីប្រទានកិត្តិយសដល់ព្រះរាជបុត្រារបស់ទ្រង់ នៅចំពោះ​មុខ​ពពួកទេវតាទាំងអស់។ ព្រះរាជបុត្រាបានគង់នៅលើបល្ល័ង្កជាមួយនឹងព្រះវរ​បិតា​របស់ទ្រង់ ហើយពួកពលទេវតាដ៏ច្រើនកុះករបានប្រមូលផ្តុំគ្នានៅជុំវិញព្រះអង្គ។ បន្ទាប់មក ព្រះវរបិតាបានប្រកាសថា ទ្រង់បានតែងតាំងព្រះគ្រីស្ទ ដោយផ្ទាល់ព្រះអង្គឱ្យមានឋានៈស្មើនឹងអង្គព្រះអង្គ ដូច្នេះ អ្វីៗទាំងអស់ដែលនៅចំពោះព្រះវត្តមានរបស់ព្រះរាជបុត្រា ក៏ដូចជានៅចំពោះព្រះវត្តមានរបស់ព្រះវរបិតាដែរ។ ពពួកទេវតាទាំងឡាយក៏ត្រូវតែស្តាប់តាមព្រះបន្ទូលរបស់ព្រះរាជបុត្រា ដូចជាព្រះបន្ទូលរបស់ព្រះវរបិតាដែរ។ ទ្រង់បានប្រទានអំណាចដល់ព្រះរាជបុត្រាឱ្យអាចបញ្ជាលើពួកទេវតាទាំងឡាយនៅស្ថានសួគ៌។ ជាពិសេស ព្រះរាជបុត្រារបស់ទ្រង់នឹងត្រូវរួបរួមជាមួយនឹងទ្រង់ ក្នុងការបង្ក​បង្កើតផែនដី និងរបស់សព្វសារពើដែលមាននៅលើផែនដី។ ព្រះរាជបុត្រានឹងគោរពតាមព្រះហឫទ័យ និងព្រះរាជបំណងរបស់ព្រះអង្គ ហើយព្រះរាជបុត្រានឹងមិនអាចធ្វើអ្វីតាមតែព្រះហឫទ័យរបស់ទ្រង់ផ្ទាល់ឡើយ។ ព្រះហឫទ័យ​របស់ព្រះវរបិតានឹងត្រូវបានសម្រេចដោយសារទ្រង់។

​អំណានព្រះគម្ពីរពេលល្ងាច៖​អេសេគាល ជំពូក​ ២៨:១២-១៧