ថ្ងៃសុក្រ ទី១២ ខែវិច្ឆិកា ឆ្នាំ២០២១
អំណានព្រះគម្ពីរពេលព្រឹក៖ ចូរសរសើរដល់ព្រះយេហូវ៉ា ចូរសរសើរដល់ព្រះ នៅក្នុងទីបរិសុទ្ធរបស់ទ្រង់ ចូរសរសើរដល់ទ្រង់ នៅចន្លោះអាកាសជាទីសំដែងព្រះចេស្តាទ្រង់ ចូរសរសើរដល់ទ្រង់ ដោយព្រោះការឥទ្ធិឫទ្ធិរបស់ទ្រង់ ចូរសរសើរដល់ទ្រង់ ឲ្យសមនឹងសណ្ឋានដ៏ធំប្រសើររបស់ទ្រង់។ ទំនុកតម្កើង ១៥០:១-២
អំណានប្រចាំថ្ងៃ៖ សាតាំងសោកស្តាយចំពោះទង្វើរបស់វា
ពេលវេលាដែលត្រូវច្រៀងសរសើរតម្កើងដល់ព្រះដោយអំណរ និងសប្បាយរីករាយបានមកដល់។ សាតាំងធ្លាប់បានដឹកនាំក្រុមចម្រៀងនៅស្ថានសួគ៌ វាបានបង្កើតបទភ្លេងដំបូងបង្អស់ ហើយបន្ទាប់មកទេវតាទាំងឡាយបានចូលរួមជាមួយវា ហើយបទភ្លេងនៃសិរីល្អបានបន្លឺឡើងពាសពេញស្ថានសួគ៌ ដើម្បីសរសើរតម្កើងដល់ព្រះវរបិតា និងព្រះរាជបុត្រាជាទីគាប់ព្រះហឫទ័យរបស់ទ្រង់។ ប៉ុន្តែ ឥឡូវនេះជំនួសឱ្យបទភ្លេងដ៏ពីរោះពាក្យគំរោះគំរើយ និងខឹងសម្បាហូរចូលទៅក្នុងត្រចៀករបស់មេបះបោរដ៏ធំនេះ។ តើវានៅឯណា? តើទាំងអស់នេះមិនមែនជាសុបិនអាក្រក់ទេឬអី? តើវាត្រូវបានទម្លាក់ចុះពីស្ថានសួគ៌មកហើយឬអី? តើទ្វារនៃស្ថានសួគ៌លែងបើកទទួលវាឱ្យចូលវិញហើយឬ?
ពេលថ្វាយបង្គំព្រះជិតចូលមកដល់ហើយ នៅពេលដែលពួកទេវតាដែលមានពន្លឺនិងបរិសុទ្ធបានក្រាបថ្វាយបង្គំដល់ព្រះវរបិតា។ វាលែងបានចូលរួមជាមួយនឹងបទចំរៀងនៃស្ថានសួគ៌ទៀតហើយ។ វាលែងបានក្រាបថ្វាយបង្គំព្រះ ដោយគោរពនិងកោតសរសើរនៅចំពោះព្រះវត្តមានរបស់ព្រះដ៏មានព្រះជន្មអស់កល្បទៀតហើយ។
វាចង់ឱ្យវាក្លាយទៅជាទេវតាបរិសុទ្ធ ស្មោះត្រង់ មានភក្តីភាពដូចពីមុនឡើងវិញនោះខ្លាំងណាស់។ ប៉ុន្តែ វាត្រូវបានបាត់បង់ទៅហើយមិនអាចប្រោសលោះបានដោយសារតែការបះបោរដោយគ្មានការកោតក្រែងរបស់វាឡើយ ហើយនេះមិនទាន់អស់នៅឡើយទេ វាថែមទាំងបានដឹកនាំទេវតាផ្សេងៗទៀតឱ្យបះបោរ ហើយឱ្យទទួលលទ្ធផលជាការបាត់បង់ដូចវាដែរ ទេវតាដែលមិនបានសង្ស័យពីព្រះហឫទ័យរបស់ព្រះនៃស្ថានសួគ៌ ឬមិនដែលតវ៉ានឹងការគោរពច្បាប់របស់ព្រះ រហូតមិនទាំងបានដាក់គំនិតនេះនៅក្នុងចិត្តរបស់លោកផងនោះ លោក (ទេវតា) មានតែសេចក្តីអំណរជាមួយនឹងអំពើល្អដ៏ធំធេង និងសេរីភាពដ៏ខ្ពង់ខ្ពស់និងថ្លៃថ្នូរនៅចំពោះមុខជានិច្ច។ នេះគឺជាការបោកប្រាស់ដែលវាបានបោកបញ្ឆោតដល់ពួកទេវតាទាំងឡាយ។ ឥឡូវនេះ ការទទួលខុសត្រូវបានធ្លាក់មកលើវាដែលវាសោកស្តាយចំពោះទង្វើនេះជាខ្លាំង។ ទេវតាទាំងនេះបានជ្រួលច្របល់ដោយការខកចិត្ត។ ជំនួសឱ្យសេចក្តីល្អដ៏ធំ ពួកគេបែរជាបានទទួលនូវលទ្ធផលដ៏ក្រៀមក្រំ ពីការមិនស្តាប់បង្គាប់ និងមិនគោរពតាមច្បាប់របស់ព្រះទៅវិញ។ ច្បាប់ដ៏សុភាពរបស់ព្រះយេស៊ូវគ្រីស្ទលែងមានឥទ្ធិពលលើជីវិតមិនសប្បាយរីករាយទាំងនេះទៀតហើយ។ វិញ្ញាណរបស់គេលែងរំជួលដោយសេចក្តីអំណរ សេចក្តីសុខសាន្ត និងសេចក្តីស្រឡាញ់ដ៏ស្មោះ និងជ្រាលជ្រៅនៃព្រះវត្តមានរបស់ទ្រង់ ដែលបានបណ្តាលចិត្តគេឱ្យត្រឡប់មករកទ្រង់វិញ ទាំងស្តាប់បង្គាប់ដោយរីករាយ និងថ្វាយសិរីល្អដល់ទ្រង់ដោយគោរពទៀតហើយ។
អំណានព្រះគម្ពីរពេលល្ងាច៖ វិវរណៈ ជំពូក៤
ខចងចាំ៖ ទូលបង្គំបានកំណត់ចាំព្រះបន្ទូលទ្រង់ទុកនៅក្នុងចិត្ត ប្រយោជន៍កុំឲ្យទូលបង្គំធ្វើបាបនឹងទ្រង់ឡើយ។ ទំនុកតម្កើង ១១៩:១១
