​អំណានព្រះគម្ពីរពេលព្រឹក៖ វេទនា​ដល់​មនុស្ស​អាក្រក់​គេ​នឹង​ត្រូវ​សេចក្តី​ទុក្ខ​ព្រួយ ដ្បិត​ការ​ដែល​ដៃ​គេ​បាន​ធ្វើ​នោះ​នឹង​បាន​សង​ដល់​គេ​វិញ ។ អេសាយ ៣:១១

អំណានប្រចាំថ្ងៃ៖ ផែនការអាក្រក់ប្រឆាំងទាស់នឹងគ្រួសារមនុស្សលោក

ការផ្លាស់ប្តូរមុខតំណែងដ៏ធំនេះមិនបានធ្វើឱ្យសេចក្តីស្រឡាញ់របស់វាចំពោះព្រះ ចំពោះព្រះប្រាជ្ញា​ញ្ញាណ និងច្បាប់ដ៏យុត្តិធម៌របស់ទ្រង់កើតឡើងនោះទេ។ នៅពេលដែលសាតាំងបានដឹងច្បាស់ថាវាមិនមានលទ្ធភាពអាចនឹងទទួលការគាប់ព្រះហឫទ័យពីព្រះដូចដើមវិញទេនោះ វាក៏បានបញ្ចេញ​នូវ​ការព្យាបាទរបស់វាដែលធ្វើឱ្យសម្អប់និងកំហឹងឆេះឆួលឡើង។

ព្រះបា​ន​ជ្រាប​ថា​ការបះបោរដោយចេតនាបែបនេះ នឹងមិនអាចនៅ​ស្ងៀមទេ។ សាតាំងរិះរក​មធ្យោបាយជាច្រើន ដើម្បីរុកកួនដល់ទេវតាទាំងឡាយនៅឯស្ថានសួគ៌និងបង្ហាញនូវការមិនគោរពដល់អំណាចរបស់ព្រះ។ នៅពេលដែលវាមិនអាចទទួលការអនុញ្ញាតឱ្យចូលតាមទ្វារនៃស្ថានសួគ៌ វានឹងរង់ចាំនៅត្រង់ច្រកចូល ដើម្បីនិយាយឡកឡឺយឱ្យទេវតាទាំងឡាយ ហើយស្វែងរករឿងជាមួយនឹងទេវតាទាំងនោះនៅពេលដែល​លោក​យាង​ទៅមកកាត់ទីនោះ។ វានឹងរកវិធីបំផ្លាញសេចក្តីសុខសាន្តរបស់លោកអ័ដាម និងនាងអេវ៉ា។ វានឹងខំប្រឹងប្រែងញុះញង់ឱ្យពួកគេបះបោរទាស់នឹងព្រះដោយវាដឹងថាការនេះនឹងធ្វើឱ្យស្ថានសួគ៌កើតទុក្ខព្រួយ។

អ្នកដើរតាមវាកំពុងស្វែងរកវា ហើយវាក៏បង្ហាញខ្លួនជាអ្នកអាចប្រឆាំងជាមួយនឹងព្រះទាំងប្រកាសប្រាប់ដល់ពួកវាអំពីគម្រោងការរបស់វា ដើម្បីទាញលោកអ័ដាមនិងនាងអេវ៉ាជាដៃគូរបស់គាត់ចេញពីព្រះ។ ប្រសិនបើវាអាចលួងលោមបញ្ឆោតពួកគេដោយប្រការណាមួយឱ្យលែងស្តាប់បង្គាប់ព្រះ នោះព្រះទ្រង់នឹងធ្វើកិច្ចសន្យាណាមួយ ដើម្បីអត់ឱនទោស​ដល់ពួកគេជា​មិនខាន ពេលនោះខ្លួនវាផ្ទាល់និងពួកទេវតាដែលធ្លាក់ចុះដទៃទៀតក៏អាចទទួលបាននូវសេចក្តីមេត្តាករុណាពីព្រះផងដែរ។ ប្រសិនបើគម្រោ​ងការ​នេះមិនបានជោគជ័យទេ ពួកវាអាចនឹងរួបរួមជាមួយនឹងេលាកអ័ដាមនិងនាងអេវ៉ាវិញ​ ដ្បិតអីនៅពេលណាពួកគេទាំងពីរល្មើសនឹងច្បាប់របស់ព្រះ ពួកគេក៏នឹងត្រូវទទួលនូវសេចក្តីក្រោធរបស់ព្រះដូចជាពួកវាដែរ។ ការបំពាន​​លើច្បាប់ព្រះរបស់ពួកគេអាចនឹងរាប់ជាការប្រឆាំងបះបោរផងដែរ ហើយពួកទេវតាអារក្សក៏រួបរួមជាមួយនឹងលោកអ័ដាម និងនាងអេវ៉ា កាន់កាប់សួន​ច្បារ​អេដែន ហើយយកទីនោះជាលំនៅរបស់វាថែមទៀតផង។ ពួកវាបាន​គិតថា ប្រសិនបើវាអាចចូលទៅកាន់ដើមជីវិតដែលនៅចំកណ្តាលសួនច្បារអេដែនបាន នោះកម្លាំងរបស់ពួកគេនឹងបានស្មើនឹងពួកទេវតាបរិសុទ្ធដែលសូម្បីតែព្រះក៏មិនអាចបណ្តេញពួកគេចេញបានដែរ។

​អំណានព្រះគម្ពីរពេលល្ងាច៖ ទំនុកតម្កើង ជំពូក​៥២