​អំណានព្រះគម្ពីរពេលព្រឹក៖ ទេវតា​នៃ​ព្រះយេហូវ៉ា​ចោមរោម​នៅ​ជុំវិញ​នៃ​អស់​អ្នក​ដែលកោតខ្លាច​ដល់​ទ្រង់ ហើយ​ក៏​ជួយ​គេ​ឲ្យ​រួច។ ទំនុកតម្កើង ៣៤:៧

អំណានប្រចាំថ្ងៃ៖ ការព្រមានឲ្យប្រុងប្រយ័ត្ន

ទេវតាបានប្រាប់ឱ្យនាងអេវ៉ាប្រុងប្រយ័ត្ន កុំឱ្យឃ្លាតឆ្ងាយពីប្តី​របស់​នាង នៅក្នុងការងាររបស់​នាងឡើយ ដ្បិតនាងអាចនឹងត្រូវនាំឱ្យមានទំនាក់ទំនងជាមួយនឹងសត្រូវដែលបានធ្លាក់ចុះនោះ។ ប្រសិនបើពួកគេបែកគ្នា នោះពួកគេនឹងមានគ្រោះថ្នាក់ធ្ងន់ជាងការដែលពួកគេនៅជុំគ្នា។ ទេវតាបានផ្តែផ្តាំពួកគេ ឱ្យធ្វើតាមការណែនាំរបស់ព្រះដែលទ្រង់បានប្រទាន​ដល់គេ​ឱ្យបានល្អ ទាក់ទងនឹងដើមដឹងខុសត្រូវ ព្រោះការស្តាប់បង្គាប់ដ៏ត្រឹមត្រូវនោះ ពួកគេនឹងមានសុវត្ថិភាព ហើយពេលនោះសត្រូវដែលបានធ្លាក់ចុះនោះនឹងមិនមានអំណាច ក្នុងការបោកបញ្ឆោតពួកគេបានឡើយ។ ព្រះនឹងមិនអនុញ្ញាតឱ្យសាតាំងល្បួងដល់ពួកគេទាំងពីរជាបន្តបន្ទាប់ឡើយ។ វាអាចចូលទៅជិតពួកគេបានដោយសារតែដើមដឹងខុសត្រូវប៉ុណ្ណោះ។

លោកអ័ដាម​​​និង​នាងអេវ៉ាបានបញ្ជាក់ប្រាប់ដល់ទេវតាវិញថា ពួកគេនឹងមិនប្រព្រឹត្តរំលងនឹងបញ្ជាដ៏ច្បាស់លាស់របស់ព្រះនេះឡើយ ដ្បិតការធ្វើ​តាមព្រះហឫទ័យព្រះ គឺជាការសប្បាយជាទីបំផុតរបស់គេទាំងពីរនាក់។

ទេវតាបានរូបរួមជាមួយនឹងលោកអ័ដាមនិងនាងអេវ៉ាបន្លឺសំឡេងច្រៀងបទចម្រៀងដ៏បរិសុទ្ធយ៉ាងពីរោះរណ្តំនៅពេលដែលបទចម្រៀងទាំងនោះអណ្តែតត្រសែតចេញពីសួនច្បារអេដែនដ៏សែនមនោរម្យ សាតាំង​បានឮសំឡេង​បទចម្រៀង នៃការសរសើរតម្កើងដល់ព្រះវរបិតានិងព្រះរាជបុត្រាដោយក្តីអំណរ។ ហើយពេលដែលសាតាំងបានឮចម្រៀងនោះ ការច្រណែន សម្អប់ និងគំនិតអាក្រក់របស់វាបានពុះពោរឡើង ហើយវា​បាន​បញ្ចញ​កង្វល់​របស់វា ប្រាប់ដល់ទេវតាដែលដើរតាមវាឱ្យ​ញុះញង់​ពួកគេ (អ័ដាមនិងអេវ៉ា) កុំឱ្យស្តាប់បង្គាប់ព្រះ ហើយនៅពេលជាមួយគ្នានោះ ត្រូវនាំយកសេចក្តី​ក្រោធ​របស់ព្រះទម្លាក់មកលើពួកគេនិងផ្លាស់ប្តូរបទចម្រៀងសរសើរតម្កើងរបស់គេឱ្យទៅជាចម្រៀងនៃការសម្អប់និងបណ្តាសាដល់ព្រះអាទិកររបស់គេវិញ។

​អំណានព្រះគម្ពីរពេលល្ងាច៖ អេភេសូរ​ ៦៖១០-២០