​អំណានព្រះគម្ពីរពេលព្រឹក៖ ដូច្នេះ ត្រូវ​ចុះ​ចូល​ចំពោះ​ព្រះ ហើយ​តស៊ូ​នឹង​អារក្ស​វិញ​ចុះ នោះ​វា​នឹង​រត់​ចេញ​ពី​អ្នក​រាល់​គ្នា​ទៅ។ យ៉ាកុប ៤:៧

អំណានប្រចាំថ្ងៃ៖ ការស្តាប់ការកុហក

ញាណិច្ឆតា (ការចង់ដឹង) របស់នាងអេវ៉ាបានពុះពោរទ្បើង។ នាង​មិនបាន​រត់ចេញពីកន្លែងនោះទេ តែបែរជានៅស្តាប់សត្វពស់នោះនិយាយទៅវិញ។ នៅក្នុងគំនិតរបស់នាង នាងមិនបានដឹងថា ជាសត្រូវដែលបាន​ធ្លាក់​ចុះកំពុង​ប្រើប្រាស់សត្វពស់ធ្វើជាធ្នាក់នោះទេ។ គឺជាសាតាំងនោះ​ហើយ​ដែលបាននិយាយជាមួយនឹងនាង គឺមិនមែនជាពស់ទេ។ សាតាំងបាន​លួង​លោមដល់នាងអេវ៉ាបានបញ្ឆោតនិងធ្វើឱ្យនាងស្រើបស្រាល។ ប្រសិនបើនាង​បានជួបនឹងឥស្សរជនដែលមានរូបរាងដូចជាទេវតាមកនិយាយជាមួយនឹងនាងនោះ នាងនឹងប្រុងប្រយ័ត្នជាមិនខាន។ ប៉ុន្តែ នៅពេលឮសំឡេងដ៏​ចំឡែក​នោះ នាងគួរតែរត់ទៅរកប្តីរបស់នាង ដើម្បីសួរគាត់ពីរឿងនោះ ហេតុអ្វីបានជានាងបណ្តោយឱ្យសំឡេងនោះនិយាយមកកាន់នាងដោយសេរីដូច្នេះ។ ផ្ទុយទៅវិញនាងបានចូលទៅរកគូវិវាទដែលក្លែងខ្លួនធ្វើជាសត្វពស់នោះទៅវិញ។ នាងបានឆ្លើយនឹងសំណួររបស់វាថា «យើង​បរិភោគអស់ទាំងផ្លែឈើនៅក្នុងសួនច្បារបាន តែត្រង់ដើមឈើ១ដែលនៅកណ្តាលសួនច្បារនោះ ព្រះទ្រង់មានបន្ទូលថាកុំឱ្យបរិភោគផ្លែនោះឡើយ ថែមទាំងកុំឱ្យប៉ះពាល់ផងក្រែងលោស្លាប់»។ ពស់បានឆ្លើយទៅវិញថា «អ្នកមិនស្លាប់ជាពិតមែនទេ ដ្បិតព្រះទ្រង់ជ្រាបថា នៅថ្ងៃណាដែលអ្នកបរិភោគ នោះភ្នែកអ្នកនឹងបាន​ភ្លឺឡើង ហើយអ្នកនឹងបានដូចជាព្រះដែរព្រមទាំងដឹងការខុសត្រូវផង»។

សាតាំងបានបង្ហាញនូវគំនិតមួយថា បើនាងបរិភោគផ្លែឈើដែលព្រះបានហាមឃាត់នោះ ពួកគេនឹងទទួលបាននូវចំណេះដឹងថ្មីដ៏ល្អពិសេស ជាចំណេះដឹងដែលមានតាំងពីមុនរហូតមកដល់ពេលនេះ។ នេះគឺជាការងារ​ដ៏ពិសេស ដែលមិនធ្លាប់មានសោះ តាំងពីវាធ្លាក់ចុះមកដែលជាជោគ​ជ័យ​ដ៏ធំក្នុងការដឹកនាំមនុស្សឱ្យសង្ស័យចំពោះព្រះហើយមិនពេញចិត្តនិងអ្វីដែល​ព្រះបានបង្ហាញដល់ពួកគេ ព្រមទាំងមិនរវល់គោរពនូវអ្វីដែលព្រះទ្រង់បានត្រាស់បង្គាប់ដល់គេ ថែមទៀតផង។ វាបានដឹកនាំពួកគេមិនឱ្យស្តាប់​បង្គាប់​តាមបញ្ញត្តិរបស់ព្រះ ហើយបន្ទាប់មកវាធ្វើឱ្យពួកគេជឿថា ពួកគេកំពុងតែទទួលបាននូវចំណេះដឹងថ្មីដ៏អស្ចារ្យ។ នេះគឺជារឿងមិនពិតឡើយ ហើយជា​ការបោកបញ្ឆោតដ៏អាក្រក់។ ពួកគេលែងយល់ពីអ្វីដែលព្រះបានបង្ហាញដល់ពួកគេ ហើយគេបានបដិសេធបញ្ញត្តិដែលបានចែងយ៉ាងច្បាស់ ហើយ​ប្រាថ្នាចង់បានប្រាជ្ញា ដោយមិនពឹងអាស្រ័យលើព្រះ និងមិនយល់ថាអ្វីដែលព្រះសព្វព្រះហឫទ័យនោះ នាំឱ្យគេរួចផុតពីសេចក្តីស្លាប់ឡើយ។ ពួកគេគិត​ថាគេមានប្រាជ្ញាជាងព្រះ ប៉ុន្តែ ខាងចំណេះដឹងនៃសេចក្តីពិត ពួកគេនៅងងឹតដូចពេលយប់កណ្តាលអាធ្រាត្រ។​ ពួកគេមិនអាចដឹងនិងមិនអាចត្រឡប់ទៅរកចំណេះដឹងដ៏ពិតនេះវិញបានឡើយ។

​អំណានព្រះគម្ពីរពេលល្ងាច៖ យ៉ាកុប ១៖២-១៨