ថ្ងៃចន្ទ ទី២២ ខែវិច្ឆិកា ឆ្នាំ២០២១
អំណានព្រះគម្ពីរពេលព្រឹក៖ ដ្បិតគ្មានសេចក្តីល្បួងណាកើតដល់អ្នករាល់គ្នា ក្រៅពីសេចក្តីល្បួង ដែលត្រូវខាងមនុស្សលោកទេ រីឯព្រះទ្រង់ក៏ស្មោះត្រង់ដែរ ទ្រង់មិនឲ្យកើតមានសេចក្តីល្បួងហួសកំឡាំងអ្នករាល់គ្នាឡើយ គឺនៅវេលាណាដែលត្រូវល្បួង នោះទ្រង់ក៏រៀបផ្លូវឲ្យចៀសរួច ដើម្បីឲ្យអ្នករាល់គ្នាអាចនឹងទ្រាំបាន។ កូរិនថូសទី១ ១០:១៣
អំណានប្រចាំថ្ងៃ៖ នាងអេវ៉ាបានក្លាយជាអ្នកល្បួង
រួចនាងក៏បានបេះផ្លែឈើនោះដោយខ្លួនឯងរួចបរិភោគទៅ ហើយនាងបានគិតក្នុងចិត្តថានាងមានអំណាច និងចំណេះដឹងយ៉ាងរហ័សដែលជាលទ្ធផលរបស់ឥទ្ធិពលដ៏លើសលុបនៃផ្លែឈើដែលព្រះបានហាមឃាត់នេះ។ នាងមានការរំភើបដ៏ចម្លែកខុសពីធម្មតានៅពេលដែលនាងបានស្វែងរកប្តីរបស់នាង ដោយមានទាំងផ្លែឈើដែលព្រះបានហាមឃាត់នៅនឹងដៃផង។ នាងបានដំណាលប្រាប់ដល់គាត់ពីសំដីរបស់សត្វពស់ ហើយចង់នាំគាត់ទៅកាន់ដើមដឹងខុសត្រូវភ្លាម។ នាងបានប្រាប់ប្តីថានាងបានបរិភោគផ្លែឈើនោះហើយ ហើយនាងមិនបានស្លាប់ទេ តែបែរជាមានឥទ្ធិពលយ៉ាងសប្បាយរីករាយគួរឱ្យត្រេកត្រអាលទៅវិញ។ ក្រោយពីនាងអេវ៉ាមិនស្តាប់បង្គាប់ព្រះភ្លាម នាងបានក្លាយជារូបអារក្សដ៏មានអំណាចម្នាក់ ដែលបណ្តាលឱ្យប្តីរបស់នាងធ្លាក់ចុះ (មានបាប)។
ខ្ញុំបានឃើញទឹកមុខអ័ដាមពោរពេញដោយភាពក្រៀមក្រំ។ គាត់បង្ហាញការភ័យខ្លាចនិងការភ្ញាក់ផ្អើល។ ការពិបាកហាក់បីដូចជាបានកើតឡើងនៅក្នុងគំនិតរបស់គាត់។ គាត់បានប្រាប់ដល់អេវ៉ាថា គាត់ដឹងយ៉ាងច្បាស់ថា នេះគឺជាសត្រូវដែលព្រះបានព្រមានឱ្យពួកគេប្រឆាំងទប់ទល់ ហើយប្រសិនបើដូច្នោះមែន នោះនាងនឹងត្រូវតែស្លាប់។ នាងបានបញ្ជាក់ប្រាប់គាត់ថា នាងហាក់ដូចជាមិនមានឈឺអ្វីឡើយតែបែរជាមានឥទ្ធិពលដ៏សប្បាយយ៉ាងខ្លាំងទៅវិញនាងបានទទូចអង្វរសុំឱ្យគាត់បរិភោគផ្លែនោះ។
លោកអ័ដាមបានយល់យ៉ាងច្បាស់ថាដៃគូរបស់គាត់បានប្រព្រឹត្តបំពាននឹងការហាមប្រាមដែលព្រះបានដាក់ឱ្យពួកគេទុកជាការសាកល្បងសេចក្តីស្មោះត្រង់និងសេចក្តីស្រឡាញ់របស់ពួកគេហើយ។ នាងអេវ៉ាបង្ហាញហេតុផលថា ពស់បាននិយាយថាពួកគេនឹងមិនស្លាប់ជាពិតប្រាកដ ហើយសំដីរបស់វាគឺជាការពិត ព្រោះនាងមិនមានសញ្ញាណាមួយដែលបង្ហាញពីការមិនសប្បាយព្រះទ័យរបស់ព្រះឡើយ តែនាងបែរជាមានអារម្មណ៍រីករាយយ៉ាងខ្លាំងទៅវិញ។
អំណានព្រះគម្ពីរពេលល្ងាច៖ យ៉ូហាន ១៥៖១-១៤
ខចងចាំ៖ ចូរទីពឹងដល់ព្រះយេហូវ៉ាឲ្យអស់អំពីចិត្ត កុំឲ្យពឹងផ្អែកលើយោបល់របស់ខ្លួនឡើយ ត្រូវឲ្យទទួលស្គាល់ទ្រង់នៅគ្រប់ទាំងផ្លូវឯងចុះ នោះទ្រង់នឹងដំរង់អស់ទាំងផ្លូវច្រករបស់ឯង ។ សុភាសិត ៣:៥-៦
