ថ្ងៃច័ន្ទ ទី២៩ ខែវិច្ឆិកា ឆ្នាំ២០២១
អំណានព្រះគម្ពីរពេលព្រឹក៖ ដ្បិតឈ្នួលរបស់អំពើបាប នោះជាសេចក្តីស្លាប់ តែអំណោយទាននៃព្រះវិញ គឺជាជីវិតដ៏នៅអស់កល្បជានិច្ច ដោយព្រះគ្រីស្ទយេស៊ូវ ជាព្រះអម្ចាស់នៃយើងរាល់គ្នា។ រ៉ូម ៦:២៣
អំណានប្រចាំថ្ងៃ
សេចក្តីទុក្ខព្រួយបានកើតមានពេញស្ថានសួគ៌ ពេលដែលគេបានដឹងថាមនុស្សត្រូវបានបាត់បង់ហើយពិភពលោកដែលព្រះបានបង្កើតត្រូវបានបំពេញដោយសេចក្តីស្លាប់ ត្រូវផ្តន្ទាដោយសេចក្តីវេទនា ជំងឺតម្កាត់ ហើយអ្នកដែលមិនពេញចិត្តនឹងសេចក្តីទាំងនេះមិនអាចគេចវេះបានឡើយ។ គ្រួសារលោកអ័ដាមទាំងមូលត្រូវតែស្លាប់។ ខ្ញុំបានឃើញព្រះយេស៊ូវជាទីស្រឡាញ់ និងឃើញមានការបង្ហាញពីការអាណិតអាសូរនិងការសោកស្តាយ នៅនឹងព្រះភ័ក្ត្ររបស់ទ្រង់។ រំពេចនោះ ខ្ញុំបានឃើញទ្រង់យាងចូលទៅជិតពន្លឺដ៏ភ្លឺក្រៃលែងដែលហ៊ុំព័ទ្ធព្រះវរបិតា។ ទេវតាដែលមកជាមួយខ្ញុំបានប្រាប់ថា ព្រះអង្គកំពុងតែមានបន្ទូលយ៉ាងជិតស្និទ្ធជាមួយព្រះវរបិតាទ្រង់។ ការថប់បារម្ភរបស់ពួកទេវតាទាំងឡាយ ហាក់បីដូចជាកើនខ្លាំងឡើងៗ នៅពេលដែលព្រះយេស៊ូវកំពុងតែទាក់ទងជាមួយព្រះវរបិតា។ ព្រះអង្គត្រូវបានបិទបាំងដោយសិរីល្អរបស់ព្រះវរបិតាបីដង ហើយលើកទីបី ព្រះអង្គបានចេញពីព្រះវរបិតាមកគេអាចមើលព្រះកាយរបស់ទ្រង់ឃើញ។ព្រះភ័ក្ត្ររបស់ព្រះអង្គស្ងប់ស្ងៀមដូចជារួចផុតពីភាពអល់ឯក និងបញ្ហាទាំងឡាយព្រមទាំងមានចែងចាំង ដោយព្រះទ័យមេត្តានិងសេចក្តីស្រឡាញ់ដែលមិនអាចពណ៌នាបាន។
បន្ទាប់មក ទ្រង់បានប្រាប់ដល់ពពួកទេវតាឱ្យដឹងថា ផ្លូវនៃការរំដោះខ្លួនត្រូវបានបង្កើតឡើងសម្រាប់មនុស្សហើយ។ ព្រះអង្គបានប្រាប់ដល់ពួកទេវតាថា ទ្រង់បានអង្វរករព្រះវរបិតា ហើយបានលះបង់ព្រះជន្មរបស់ទ្រង់ជាថ្លៃលោះ ហើយទទួលទោសដល់ស្លាប់នោះមកដាក់លើអង្គទ្រង់ដែលដោយសារព្រះអង្គ មនុស្សអាចរកឃើញការអត់ឱនទោស។ គឺតាមរយៈតម្លៃនៃព្រះលោហិត និងការស្តាប់បង្គាប់តាមបញ្ញត្តិរបស់ព្រះ គេអាចមានការគាប់ព្រះហឫទ័យរបស់ព្រះ ហើយត្រូវបាននាំត្រឡប់មកកាន់សួនច្បារដ៏ល្អនិងបរិភោគផ្លែនៃដើមជីវិតវិញ។
អំណានព្រះគម្ពីរពេលល្ងាច៖ រ៉ូម ៨៖២៦-៣៩
ខចងចាំ៖ ដ្បិតឈ្នួលរបស់អំពើបាប នោះជាសេចក្តីស្លាប់ តែអំណោយទាននៃព្រះវិញ គឺជាជីវិតដ៏នៅអស់កល្បជានិច្ច ដោយព្រះគ្រីស្ទយេស៊ូវ ជាព្រះអម្ចាស់នៃយើងរាល់គ្នា។ រ៉ូម ៦:២៣
