​អំណានព្រះគម្ពីរពេលព្រឹក៖ ទូលបង្គំ​បាន​រើស​យក​ផ្លូវ​ស្មោះត្រង់​ហើយទូលបង្គំ​បាន​តាំង​ច្បាប់​របស់​ទ្រង់​នៅ​ចំពោះ​ភ្នែក​ដែរ។ទំនុកតម្កើង ១១៩:៣០

អំណានប្រចាំថ្ងៃ៖ សង្គ្រាមនៅស្ថានសួគ៌

ទេវតាទាំងអស់ត្រូវបានកោះឱ្យមកប្រជុំគ្នានៅចំពោះព្រះវរបិតា ដើម្បីវិនិច្ឆ័យករណីរបស់គេរៀងៗខ្លួន។ សាតាំងបាន​​ប្រកាស​​​ដោយឥត​អៀនខ្មាសថា វាមិនពេញ​ចិត្តនឹង​ព្រះគ្រីស្ទដែលជាទីគាប់ព្រះហឫទ័យនៃព្រះវរបិតា ខ្លាំងជាងវានោះឡើយ។ វាបានឈរឡើងដោយអំនួត ហើយអះអាងថាវាត្រូវតែមានឋានៈស្មើនឹងព្រះ ហើយត្រូវតែបានចូលរួមប្រជុំជា​មួយនឹងព្រះវរបិតា​ និងត្រូវតែយល់នូវបំណងព្រះហឫទ័យរបស់ទ្រង់។ ព្រះ​ទ្រង់បានប្រាប់សាតាំងថា មានតែ​ព្រះរាជបុត្រា​​របស់ទ្រង់តែមួយអង្គប៉ុណ្ណោះ ដែលទ្រង់អាចនឹងបើកសម្តែងឱ្យជ្រាបពីគោលបំណងដ៏លាក់កំបាំងរបស់​ទ្រង់ ហើយទ្រង់បានតម្រូវឱ្យគ្រប់គ្រួសារទាំងអស់នៅស្ថានសួគ៌ រួមទាំង​សាតាំងផង គោរពនិងស្តាប់បង្គាប់ទ្រង់ ដោយ​គ្មាន​សង្ស័យ ប៉ុន្តែសាតាំងបានបញ្ជាក់ថាវាមិនមានតម្លៃនឹងរស់នៅក្នុង​ព្រះរាជ​វាំងនៃនគរស្ថានសួគ៌​ឡើយ។ បន្ទាប់មក សាតាំងបានចង្អុល​ដោយត្រេកអរទៅទេវតាដែលគាំ្រទវា ដែលមានចំនួនរហូតដល់ជិតពាក់កណ្តាលនៃចំនួន​ទេវតាទាំងអស់នោះ ហើយប្រកាសថា «ទេវតាទាំងអស់នោះនៅខាងខ្ញុំ តើទ្រង់នឹងបណ្តេញ​ពួកគេចេញ ហើយទុកឱ្យស្ថានសួគ៌នៅទទេឬ?» រួចវាបានប្រកាសថាវាបានរៀបចំតស៊ូប្រឆាំងនឹងអំណាចរបស់ព្រះគ្រីស្ទ ហើយការពារកន្លែងរបស់វានៅស្ថានសួគ៌ដោយប្រើអានុភាពកម្លាំងទល់នឹងកម្លាំង។

ទេវតាល្អបាន​យំដោយឮសំដីរបស់សាតាំង និងអំនួតដ៏ត្រេកត្រអាលរបស់វា។ ព្រះបានប្រកាសថា ទេវតាដែលបះបោរមិនអាចនៅក្នុងនគរស្ថានសួគ៌តទៅទៀតបានទេ។ លក្ខណៈដ៏ខ្ពង់ខ្ពស់និងសប្បាយរីករាយរបស់ពួកវាអាស្រ័យទៅលើលក្ខខណ្ឌនៃការស្តាប់បង្គាប់តាមច្បាប់ដែលព្រះបានប្រទានឱ្យសម្រាប់គ្រប់គ្រងចក្រវាលទាំងមូល។ ព្រះមិនអាចអត់ឱនដល់អស់អ្នកដែលហ៊ានបំពានទៅលើច្បាបរ់បស់ទ្រង់ឡើយ។

​អំណានព្រះគម្ពីរពេលល្ងាច៖ ទំនុកតម្កើង ជំពូក​១៩