ថ្ងៃសុក្រ ទី១០ ខែធ្នូ ឆ្នាំ២០២១
អំណានព្រះគម្ពីរពេលព្រឹក៖ មនុស្សមួម៉ៅរមែងអុចអាល ឲ្យកើតមានសេចក្តីទាស់ទែងគ្នា ហើយមនុស្សមានចិត្តក្រោធ នោះរំលងច្បាប់ជាច្រើន។ចិត្តឆ្មើងឆ្មៃរបស់មនុស្ស នឹងនាំឲ្យទាបថោកទៅ តែអ្នកណាដែលមានចិត្តសុភាពរាបទាប នោះនឹងបានកិត្តិសព្ទវិញ។ សុភាសិត ២៩:២២
អំណានប្រចាំថ្ងៃ៖ កាអុីនបែរជាខឹង
នៅពេលដែលកាអុីនបានឃើញថាព្រះបានទទួលតង្វាយរបស់អេបិលហើយមិនទទួលតង្វាយរបស់គាត់ ដូច្នេះគាត់ខឹងជាខ្លាំង។ ដោយសេចក្តីមេត្តាករុណានិងសេចក្តីស្រឡាញ់របស់ទ្រង់ ព្រះបានចាត់ទេវតាឲ្យទៅនិយាយជាមួយនឹងកាអុីន។ ទេវតាបានចោទសួរកាអ៊ីនពីមូលហេតុនៃកំហឹងរបស់គាត់ និងបានមានព្រះបន្ទូលប្រាប់គាត់ថា ប្រសិនបើគាត់ធ្វើល្អ និងធ្វើតាមការណែនាំទាំងឡាយដែលព្រះបានបង្គាប់មក នោះព្រះទ្រង់នឹងទទួលយកគាត់ និងគោរពចំពោះតង្វាយរបស់គាត់ជាមិនខាន។ ប៉ុន្តែ ប្រសិនបើគាត់មិនចុះចូលជាមួយនឹងការរៀបចំរបស់ព្រះដោយបន្ទាបខ្លួន ព្រមទាំងមានជំនឿនិងស្តាប់បង្គាប់ដល់ទ្រង់នោះទេ នោះព្រះទ្រង់ក៏មិនអាចទទួលយកតង្វាយរបស់គាត់ដែរ។ ទេវតាប្រាប់កាអ៊ីនថា គ្មានភាពអយុត្តិធម៌នៅក្នុងផ្នែកណាមួយនៃព្រះហឫទ័យរបស់ព្រះឡើយ ឬក៏គ្មានអ្វីដែលបង្ហាញថា ព្រះទ្រង់លំអៀងទៅខាងអេបិលនោះដែរ ប៉ុន្តែ នោះគឺជាការទទួលខុសត្រូវនៃអំពើបាបផ្ទាល់ខ្លួនរបស់គាត់ និងការមិនបានស្តាប់បង្គាប់នូវការត្រាស់បង្គាប់របស់គាត់ទៅវិញទេ ដែលធ្វើឱ្យព្រះមិនអាចទទួលតង្វាយរបស់គាត់នោះហើយប្រសិនបើគាត់បានធ្វើល្អនោះ ព្រះមុខជាបានទទួលយកគាត់ហើយព្រោះគាត់គឺជាកូនច្បង។
ប៉ុន្តែ ទោះបីជាបន្ទាប់ពីបានទទួលការទូន្មានដ៏ស្មោះត្រង់របស់ទេវតាក្តី ក៏កាអ៊ីនមិនបានកែប្រែចិត្តដែរ។ ផ្ទុយទៅវិញ គាត់មិនបានកែប្រែកំហុសនិងស្អប់ខ្ពើមខ្លួនឯងចំពោះការមិនមានជំនឿរបស់គាត់ទេ តែគាត់នៅតែត្អូញត្អែរពីភាពអយុត្តិធម៌ និងភាពលំអៀងរបស់ព្រះទៅវិញ។ ដោយក្តីច្រណែននិងសម្អប់របស់គាត់ជាមួយអេបិល គាត់ខឹងនឹងអេបិលហើយស្តីបន្ទោសដល់ប្អូន។ អេបិលបានបង្ហាញយ៉ាងច្បាស់នូវកំហុសបងប្រុសរបស់គាត់ ដោយសុភាពស្លូតបូត ព្រមទាំងបានបង្ហាញគាត់ថា កំហុសនោះគឺមកពីគាត់។ ប៉ុន្តែ កាអ៊ីនស្អប់ប្អូនរបស់ខ្លួន តាំងពីពេលដែលព្រះបានបង្ហាញភស្តុតាងរបស់ទ្រង់ ពីការទទួលយកតង្វាយរបស់អេបិលមក។ អេបិលជាប្អូនប្រុសរបស់គាត់ បានព្យាយាមរកវិធីធ្វើឱ្យកំហឹងបងរបស់គាត់បានស្រាកស្រាន្តដោយអះអាងបញ្ជាក់ពីសេចក្តីអាណិតអាសូររបស់ព្រះ ដែលទ្រង់មានក្នុងជីវិតឪពុកម្តាយរបស់ពួកគេ នៅពេលទ្រង់អាចសម្លាប់ពួកគាត់ភ្លាមមួយរំពេចនោះ។ គាត់ប្រាប់កាអ៊ីនថា ព្រះទ្រង់ស្រឡាញ់ពួកគេ ឬព្រះមិនចាំបាច់ប្រទានព្រះរាជបុត្រារបស់ទ្រង់ដ៏បរិសុទ្ធនិងគ្មានបាបឱ្យមកទទួលរងការឈឺចាប់ដោយសេចក្តីក្រោធដែលមនុស្សត្រូវទទួល ដោយសារតែការមិនស្តាប់បង្គាប់របស់គាត់នោះឡើយ។
អំណានព្រះគម្ពីរពេលល្ងាច៖ អេភេសូរ ៤៖១៧-៣២
ខចងចាំ៖ ដ្បិតព្រះទ្រង់ស្រឡាញ់មនុស្សលោកដល់ម៉្លេះបានជាទ្រង់ប្រទានព្រះរាជបុត្រាទ្រង់តែ១ ដើម្បីឲ្យអ្នកណាដែលជឿដល់ព្រះរាជបុត្រានោះ មិនត្រូវវិនាសឡើយ គឺឲ្យមានជីវិតអស់កល្បជានិច្ចវិញ។ យ៉ូហាន ៣:១៦
