ថ្ងៃសៅរ៍ ទី១១ ខែធ្នូ ឆ្នាំ២០២១
អំណានព្រះគម្ពីរពេលព្រឹក៖ អ្នកណាដែលគ្រប់បាំងការរំលងរបស់ខ្លួន នោះនឹងមិនចំរើនឡើងទេ តែអ្នកណាដែលលន់តួ ហើយលះបង់អំពើនោះ នឹងប្រទះបានសេចក្តីមេត្តាករុណាវិញ។ សុភាសិត ២៨:១៣
អំណានប្រចាំថ្ងៃ៖ កាអុីនបែរជាខឹង
នៅពេលដែលអេបិលពេញចិត្តនឹងផែនការរបស់ព្រះ កាអ៊ីនបានបែរជាក្តៅក្រហាយ ហើយកំហឹងរបស់គាត់បានពុះពោរឡើងយ៉ាងឆេះឆួលទាស់នឹងអេបិលរហូតសម្លាប់អេបិលចោលទាំងកំរោល។ ព្រះបានសួរកាអ៊ីនរកប្អូនប្រុសរបស់គាត់ កាអ៊ីនទូលឆ្លើយថា ទូលបង្គំមិនដឹងទេ «តើទួលបង្គំជាអ្នកថែរក្សាប្អូនឬអី?» នោះទ្រង់មានបន្ទូលសួរថា ឯងបានធ្វើអ្វីដូច្នេះ ពីព្រោះឮសូរសម្រែកនៃឈាមរបស់ប្អូនឯងពីដីឡើងទៅដល់អញ ឥឡូវនេះឯងត្រូវដីដាក់បណ្តាសា ដោយបានទទួលឈាមនៃប្អូនពីដៃឯង កាលណាឯងធ្វើស្រែចំការ នោះដីនឹងមិនបង្កើតឱ្យឯងដ៏ពេញកម្លាំងទៀតទេ ឯងត្រូវរសាត់ព្រាត់ ហើយអណ្តែតទៅមកលើផែនដីវិញ»។
ព្រះបានដាក់បណ្តាសាមកលើដីលើកទីមួយរួចមកហើយ តែនៅពេលនោះ បណ្តាសានោះស្រាលទេ ប៉ុន្តែ ឥឡូវនេះបណ្តាសាបានធ្លាក់មកលើដីទ្វេឡើងមួយជាពីរ។ កាអ៊ីននិងអេបិលតំណាងឱ្យមនុស្សពីរប្រភេទ អ្នកសុចរិត និងអ្នកទុច្ចរិត អ្នកជឿនិងអ្នកមិនជឿដែលបានកើតមានឡើងតាំងពីការធ្លាក់ចុះរបស់មនុស្ស រហូតដល់ការយាងមកវិញជាលើកទីពីររបស់ព្រះគ្រីស្ទ។ ការសម្លាប់អេបិលជាប្អូនរបស់កាអ៊ីនតំណាងឱ្យមនុស្សអាក្រក់ដែលច្រណែន និងស្អប់ដល់មនុស្សសុចរិត ដោយសារតែពួកគេល្អជាងខ្អួន។ ពួកគេនឹងច្រណែនជាមួយមនុស្សសុចរិត ហើយបៀតបៀន និងសម្លាប់ពួកគេ ពីព្រោះការប្រព្រឹត្តិត្រឹមត្រូវរបស់ពួកគេថ្កោលទោសដល់អំពើបាបរបស់ខ្លួន (មនុស្សអាក្រក់)។
ជីវិតរបស់លោកអ័ដាមគឺជាជីវិតដ៏ពោរពេញទៅដោយទុក្ខព្រួយ ការបន្ទាបខ្លួន និងការកែប្រែចិត្ត ជាបន្តបន្ទាប់។ នៅពេលដែលគាត់បានបង្រៀនដល់កូនចៅរបស់គាត់ពីការកោតខ្លាចដល់ព្រះ គាត់តែងតែបានស្តីបន្ទោសយ៉ាងជូរចត់នូវអំពើបាបរបស់គាត់ ដែលបាននាំមកនូវទុក្ខវេទនាយ៉ាងច្រើនដល់កូនចៅជំនាន់ក្រោយរបស់គាត់។ នៅពេលដែលគាត់បានចាកចេញពីសួនច្បារអេដែនដ៏ស្រស់បំព្រង គំនិតដែលថា គាត់ត្រូវតែស្លាប់បានធ្វើឱ្យគាត់រំភើបញាប់ញ័រ។ គាត់បានសម្លឹងមើលទៅសេចក្តីស្លាប់ ដោយការភ័យខ្លាចដ៏រន្ធត់។ គាត់បានជួបនឹងសេចក្តីស្លាប់ពិតប្រាកដ ដ៏គួរឱ្យរន្ធត់នៅក្នុងគ្រួសាររបស់គាត់ជាលើកដំបូងបង្អស់ ដោយកាអ៊ីនជាកូនរបស់គាត់ផ្ទាល់បានសម្លាប់អេបិលជាប្អូន។ ដោយមានវិប្បដិសារីជូរចត់បំផុតចំពោះការរំលងច្បាប់របស់គាត់ ព្រមទាំងការសោកស្តាយអេបិលជាកូន និងមើលទៅកាអ៊ីនដែលជាឃាតក ចិត្តរបស់លោកអ័ដាមត្រូវខ្ទេចខ្ទាំដោយទុក្ខព្រួយ។
អំណានព្រះគម្ពីរពេលល្ងាច៖ យ៉ូហានទី១ ជំពូក៣
ខចងចាំ៖ ដ្បិតព្រះទ្រង់ស្រឡាញ់មនុស្សលោកដល់ម៉្លេះបានជាទ្រង់ប្រទានព្រះរាជបុត្រាទ្រង់តែ១ ដើម្បីឲ្យអ្នកណាដែលជឿដល់ព្រះរាជបុត្រានោះ មិនត្រូវវិនាសឡើយ គឺឲ្យមានជីវិតអស់កល្បជានិច្ចវិញ។ យ៉ូហាន ៣:១៦
