ថ្ងៃចន្ទ ទី១៣ ខែធ្នូ ឆ្នាំ២០២១
អំណានព្រះគម្ពីរពេលព្រឹក៖ ព្រះគុណនៃព្រះ ដែលនាំសេចក្តីសង្គ្រោះមកដល់មនុស្សទាំងឡាយ បានលេចមកហើយ ទាំងបង្ហាត់បង្រៀនយើងរាល់គ្នាឲ្យលះចោលសេចក្តីទមិលល្មើស និងសេចក្តីប៉ងប្រាថ្នាក្នុងលោកនេះ ហើយឲ្យរស់នៅក្នុងសម័យនេះ ដោយសេចក្តីធ្ងន់ធ្ងរ សេចក្តីសុចរិត ហើយដោយគោរពប្រតិបត្តិដល់ព្រះវិញ។ ទីតុស ២:១១-១២
អំណានប្រចាំថ្ងៃ
សេតគឺជាតួអង្គដ៏ល្អ ហើយជាអ្នកដែលបានធ្វើល្អដូចជាអេបិលដែរ។ ប៉ុន្តែ គាត់ជាកូនរបស់អ័ដាម ជាមនុស្សមានបាបដូចជាកាអ៊ីន ហើយក៏មិនបានទទួលនិស្ស័យជាមនុស្សល្អជាងកាអ៊ីនដែរ។ គាត់បានកើតមកនៅក្នុងអំពើបាប ប៉ុន្តែ ដោយព្រះគុណរបស់ព្រះ គាត់បានទទួលការបង្រៀនពីលោកអ័ដាមជាឪពុកគាត់បានសរសើរតម្កើងព្រះ ដោយធ្វើតាមព្រះហឫទ័យរបស់ទ្រង់។ គាត់បានបំបែកខ្លួនគាត់ចេញពីពូជអំបូរពុករលួយរបស់កាអ៊ីន ហើយបានបែរចេញពីមនុស្សមានបាបមកគោរពនិងកោតខ្លាចដល់ព្រះជាខ្លាំងដូចជាអេបិលដែរ។
លោកហេណុកគឺជាមនុស្សបរិសុទ្ធ។ គាត់បានបំរើព្រះយ៉ាងអស់ពីចិត្ត។ គាត់បានដឹងពីអំពើពុករលួយរបស់គ្រួសារនៃមនុស្ស ហើយគាត់បានបំបែកខ្លួនគាត់ចេញពីពូជអំបូររបស់កាអ៊ីន ហើយស្តីបន្ទោសដល់ពួកគេចំពោះអំពើដ៏អាក្រក់របស់ពួកគេ។ មានមនុស្សខ្លះនៅលើផែនដីដែលទទួលស្គាល់ព្រះ កោតខ្លាចទ្រង់ និងថ្វាយបង្គំដល់ទ្រង់។ តែលោកហេណុកដ៏សុចរិតមានកង្វល់យ៉ាងខ្លាំងទៅនឹងកំណើននៃអំពើអាក្រក់របស់មនុស្សដែលគ្មានព្រះដែលគាត់មិនបានទាក់ទងជាមួយនឹងគេជារៀងរាល់ថ្ងៃ ដោយខ្លាចក្រែងគាត់ត្រូវទទួលឥទ្ធិពលពីការមិនស្មោះត្រង់របស់ពួកគេ និងខ្លាចក្រែងគាត់លែងគោរពដល់ព្រះ ដោយការគោរពដ៏បរិសុទ្ធស្របទៅតាមអត្តចរិតរបស់ទ្រង់តទៅទៀត។ ចិត្តរបស់គាត់បានមួម៉ៅឡើង នៅពេលដែលគាត់បានឃើញពួកគេជាន់ឈ្លីអំណាចរបស់ព្រះ។ គាត់បានសម្រេចចិត្តបំបែកខ្លួនចេញពីពួកគេ ហើយបានចំណាយពេលជាច្រើននៅតែម្នាក់ឯងដើម្បីអធិស្ឋាន។ គាត់បានរង់ចាំនៅចំពោះព្រះ ហើយអធិស្ឋានដើម្បីឱ្យបានដឹងពីព្រះហឫទ័យរបស់ទ្រង់។ ព្រះបានប្រាស្រ័យទាក់ទងជាមួយនឹងលោកហេណុកតាមរយៈពួកទេវតា ហើយបានប្រទានដល់គាត់នូវការណែនាំរបស់ទ្រង់។ ព្រះអង្គបានប្រាប់គាត់ថា គាត់នឹងមិនត្រូវនៅជាមួយនឹងមនុស្សដែលមានបាបនេះរហូតទេ ព្រោះទ្រង់មានបំណងនឹងបំផ្លាញពូជមនុស្សដែលមានបាបនេះដោយបណ្តាលឱ្យមានទឹកជំនន់ជន់លិចផែនដីទាំងមូល។
អំណានព្រះគម្ពីរពេលល្ងាច៖លោកលុប្បត្តិ ៥៖១-៨
ខចងចាំ៖ តែបើយើងរាល់គ្នាដើរក្នុងពន្លឺវិញ ដូចជាទ្រង់ក៏គង់ក្នុងពន្លឺដែរ នោះយើងមានសេចក្តីប្រកបនឹងគ្នាទៅវិញទៅមក ហើយព្រះលោហិតនៃព្រះយេស៊ូវគ្រីស្ទ ជាព្រះរាជបុត្រានៃទ្រង់ ក៏សំអាតយើងរាល់គ្នា ពីគ្រប់អំពើបាបទាំងអស់។ យ៉ូហានទី១ ១:៧
