ថ្ងៃអង្គារ ទី១៤ ខែធ្នូ ឆ្នាំ២០២១
អំណានព្រះគម្ពីរពេលព្រឹក៖ ឯហេណុក ជាដំណទី៧ពីលោកអ័ដាមមក គាត់បានទាយពីមនុស្សទាំងនោះថា មើល ព្រះអម្ចាស់ទ្រង់យាងមក នៅកណ្តាលពួកបរិសុទ្ធទ្រង់ទាំងសល់សែន ដើម្បីនឹងកាត់ទោសដល់គ្រប់មនុស្សទាំងឡាយ ហើយនិងរំឭកពួកទមិលល្មើសទាំងអម្បាលម៉ាន ឲ្យដឹងខ្លួនពីគ្រប់ទាំងការទមិលល្មើស ដែលគេបានប្រព្រឹត្តធ្វើ ដោយចិត្តល្មើស ហើយពីអស់ទាំងសេចក្តីរឹងទទឹងទាំងប៉ុន្មាន ដែលអស់ពួកទមិលល្មើសដ៏មានបាបទាំងនោះ បានពោលទាស់នឹងទ្រង់។ យូដាស ខ:១៤-១៥
អំណានប្រចាំថ្ងៃ៖ សេចក្តីសង្ឃឹមហួសពីផ្នូរ
សួនច្បារអេដែនជាទីស្រឡាញ់និងដ៏បរិសុទ្ធដែលព្រះបានដាក់ឪពុកម្តាយដើមរបស់យើងនោះ មាននៅរហូតមកដល់ពេលព្រះមានបំណងនឹងបំផ្លាញផែនដីដោយទឹកជំនន់។ ព្រះបានធ្វើសួនច្បារនេះ ហើយបានប្រទានព្រះពរ ជាពិសេសដល់សួនច្បារនោះ ហើយទ្រង់បានដកយកសួនច្បារនេះចេញពីផែនដីដោយព្រះប្រាជ្ញាញាណដ៏មានព្រះចេស្តារបស់ទ្រង់ រួចទ្រង់នឹងយកមកដាក់នៅលើផែនដីនេះវិញម្តងទៀត ដោយតាក់តែងយ៉ាងល្អជាងកាលដែលទ្រង់បានយកចេញពីផែនដីនេះទៅទៀត។ ព្រះអង្គមានគោលបំណងរក្សាការបង្កបង្កើតលោកដ៏គ្រប់លក្ខណ៍របស់ទ្រង់ឱ្យផុតពីបណ្តាសាដែលទ្រង់បានដាក់ដល់ផែនដី។
ព្រះបានបើកបង្ហាញនូវផែនការនៃសេចក្តីសង្គ្រោះឱ្យលោកហេណុកឃើញកាន់តែច្បាស់ ហើយដោយវិញ្ញាណនៃបទទំនាយ ទ្រង់បានបង្ហាញគាត់អំពីមនុស្សជាច្រើនជំនាន់ដែលរស់នៅក្រោយទឹកជំនន់ ហើយបានបង្ហាញគាត់នូវព្រឹត្តិការណ៍ធំៗ ដែលបានភ្ជាប់ទំនាក់ទំនងទៅនឹងការយាងមកជាលើកទីពីររបស់ព្រះគ្រីស្ទនិងទីចុងបំផុតនៃពិភពលោក(យូដាស)។ លោកហេណុកមានកង្វល់អំពីសេចក្តីស្លាប់។ ចំពោះគាត់មនុស្សសុចរិតនិងមនុស្សទុច្ចរិតនឹងក្លាយទៅជាធូលីដីទាំងអស់គ្នា ហើយការនោះអាចក្លាយជាទីបញ្ចប់របស់ពួកគេ។ គាត់បានមើលឃើញថា ជីវិតទៅមិនហួសពីផ្នូរ (ចៀសពីសេចក្តីស្លាប់មិនរួច) នោះឡើយ។ ព្រះបានបង្រៀនគាត់នៅក្នុងការបើកសម្តែងខាងបទទំនាយមួយទាក់ទងនឹងព្រះរាជបុត្រារបស់ព្រះ ដែលនឹងត្រូវសុគតសម្រាប់ជាតង្វាយយញ្ញបូជាជំនួសមនុស្ស ហើយព្រះបានបង្ហាញគាត់ពីការយាងទៅលើពពករបស់ព្រះគ្រីស្ទដែលមានពួកទេវតាហែហមជាច្រើនអង្គបានប្រទានជីវិតដល់អ្នកសុចរិតដែលបានស្លាប់ ព្រមទាំងបានចេញថ្លៃលោះឱ្យគេរួចពីសេចក្តីស្លាប់ផង។ គាត់ក៏បានឃើញអំពើអាក្រក់របស់ពិភពលោក នៅគ្រាដែលព្រះគ្រីស្ទយាងមកវិញជាលើកទីពីរផងដែរ ដែលនឹងមានតែអំនួត ភាពព្រហើនកោងកាច ជំនាន់មនុស្សដែលគិតតែពីប្រយោជន៍ផ្ទាល់ខ្លួនបានរៀបចំខ្លួន ដើម្បីប្រឆាំងទាស់នឹងច្បាប់របស់ព្រះហើយបដិសេធព្រះអម្ចាស់តែមួយអង្គគត់ និងព្រះគ្រីស្ទជាព្រះអម្ចាស់នៃយើងថែមទាំងបានបដិសេធព្រះលោហិតរបស់ព្រះយេស៊ូវ ដោយស្អប់ខ្ពើមដល់ការលោះបាបរបស់ទ្រង់សម្រាប់ពួកគេ។ គាត់បានឃើញអ្នកសុចរិតត្រូវបានបំពាក់មកុដឱ្យដោយមានសិរីល្អនិងកិត្តិយសនៅពេលដែលមនុស្សអាក្រក់ត្រូវបានបំបែកចេញពីព្រះវត្តមាននៃព្រះអម្ចាស់ ហើយត្រូវបានដុតបញ្ឆេះដោយភ្លើង។
លោកហេណុកបានបង្ហាត់បង្រៀនដោយសេចក្តីជំនឿដល់មនុស្សទាំងឡាយនូវអ្វីដែលព្រះបានបង្ហាញដល់គាត់ដោយសារវិញ្ញាណនៃបទទំនាយ។ មនុស្សខ្លះបានជឿតាមពាក្យសំដីរបស់គាត់ហើយបានងាកចេញពីអំពើអាក្រក់របស់គេមកកោតខ្លាចនិងថ្វាយបង្គំព្រះវិញ។
អំណានព្រះគម្ពីរពេលល្ងាច៖ ថែស្សាឡូនីចទី១ ៤:១៣-១៨
ខចងចាំ៖ តែបើយើងរាល់គ្នាដើរក្នុងពន្លឺវិញ ដូចជាទ្រង់ក៏គង់ក្នុងពន្លឺដែរ នោះយើងមានសេចក្តីប្រកបនឹងគ្នាទៅវិញទៅមក ហើយព្រះលោហិតនៃព្រះយេស៊ូវគ្រីស្ទ ជាព្រះរាជបុត្រានៃទ្រង់ ក៏សំអាតយើងរាល់គ្នា ពីគ្រប់អំពើបាបទាំងអស់។ យ៉ូហានទី១ ១:៧
