​អំណានព្រះគម្ពីរពេលព្រឹក៖ ដោយសារ​សេចក្តី​ជំនឿ នោះ​ហេណុក​បាន​ឡើង​ទៅ​លើ មិន​បាន​ឃើញ​សេចក្តី​ស្លាប់​ឡើយ ហើយ​គេ​រក​គាត់​មិន​ឃើញ​ទៀត ពី​ព្រោះ​ព្រះ​បាន​យក​គាត់​ទៅ ដ្បិត​កាល​មុន​ដែល​លើក​យក​គាត់​ទៅ នោះ​មាន​សេចក្តី​បន្ទាល់​ពី​គាត់​ថា ព្រះ​ទ្រង់​សព្វ​ព្រះហឫទ័យ​នឹង​គាត់​ណាស់។ ហេព្រើរ ១១:៥

អំណានប្រចាំថ្ងៃ៖ ការលើកយកលោកហេណុកឡើងទៅកាន់ស្ថានសួគ៌

លោកហេណុកបានបន្តលូតលាស់ខាងសេចក្តីជំនឿពីព្រះកាន់តែខ្លាំងនៅពេលដែលគាត់ចំណាយពេលជាមួយនឹងព្រះ។ មុខរបស់គាត់ត្រូវបានចែងចាំងដោយពន្លឺដ៏បរិសុទ្ធដែលនៅជាប់នឹងទឹកមុខរបស់គាត់នៅពេលដែលគាត់កំពុងបង្រៀនដល់អ្នកដែលស្តាប់ពាក្យពេចន៍នៃប្រាជ្ញារបស់គាត់។ រូបរាងដ៏ថ្លៃថ្នូរនិងកោតខ្លាចរបស់គាត់ ធ្វើឱ្យមនុស្សទាំងឡាយកោតសរសើរជាខ្លាំង។ ព្រះទ្រង់បានស្រឡាញ់លោកហេណុកព្រោះគាត់បានដើរតាមទ្រង់យ៉ាងរឹងមាំ ហើយស្អប់ខ្ពើមអំពើអសីលធម៌ ព្រមទាំងស្វែងរកចំណេះដឹងរបស់ព្រះយ៉ាងអស់ពីចិត្ត ដើម្បីឱ្យគាត់អាចធ្វើតាមព្រះហឫទ័យរបស់ព្រះបានយ៉ាងត្រឹមត្រូវ។ គាត់ប្រាថ្នាចង់រួបរួមជាមួយនឹងព្រះ​ដែលគាត់គោរពកោតខ្លាចឱ្យកាន់តែជិតស្នទ្ធិ។ ព្រះមិនបានទុកឱ្យលោកហេណុកស្លាប់ដូចមនុស្សដទៃឡើយ ហើយទ្រង់បានបញ្ជូនពួកទេវតាឱ្យទៅយកគាត់មកកាន់ស្ថានសួគ៌ ដោយគាត់មិនបានឃើញសេចក្តីស្លាប់ឡើយ។ ព្រះបាន​លើក​យកលោកហេណុកចេញពីមនុស្សសុចរិត និងមនុស្សទុច្ចរិត​ទាំង​ឡាយ។ អ្នកដែលស្រឡាញ់គាត់បានគិតថាព្រះបានទុកឱ្យគាត់សម្រាកនៅកន្លែង​ណាមួយ ប៉ុន្តែ បន្ទាប់ពីគេបានស្វែងរកគាត់គ្រប់ទិសទី តែមិនបាន​ឃើញ​នោះមក ពួកគេបានប្រកាសថា គាត់មិននៅលើផែនដីទៀតទេ ​ព្រោះព្រះបាននាំយកគាត់ទៅបាត់ហើយ។

នៅទីនេះព្រះបង្រៀនមេរៀនដ៏សំខាន់មួយដោយការលើកយកលោកហេណុកដែលជាតំណពូជរបស់លោកអ័ដាមដែលបានធ្លាក់ចុះ ថាអ្នកទាំងឡាយណាដែលមានសេចក្តីជំនឿ និងពឹងផ្អែកលើយញ្ញបូជាដែលព្រះបានសន្យា ព្រមទាំងស្តាប់បង្គាប់តាមបញ្ញត្តិរបស់ទ្រង់ អ្នកនោះនឹង​ត្រូវបាន​ទទួលរង្វាន់។ យើងឃើញមនុស្សពីរស្រទាប់នៅទីនេះម្តងទៀតដែលតំណាងឱ្យមនុស្សដែលមានរហូតដល់ការយាងមកជាលើកទីពីររបស់ព្រះគ្រីស្ទ គឺអ្នកសុចរិត និងមនុស្សអាក្រក់ អ្នកប្រឆាំងបះបោរនិងអ្នកស្មោះត្រង់។ ព្រះទ្រង់នឹងនឹកចាំពីមនុស្សសុចរិតដែលកោតខ្លាចដល់ទ្រង់។ តាមរយៈព្រះ​រាជ​បុត្រាស្ងួនភ្ងា (ជាទីស្រឡាញ់) របស់ព្រះអង្គ ទ្រង់នឹងគោរពនិង​លើកតម្កើង​ពួកគេ ហើយនិង​ប្រទានជីវិតអស់កល្បដល់ពួកគេ។ ប៉ុន្តែ មនុស្សអាក្រក់ដែលជាន់ឈ្លីអំណាចគ្រប់គ្រងរបស់ព្រះអង្គទ្រង់នឹងកាត់ពួកគេចេញព្រមទាំងបំផ្លាញពួកគេចេញពីផែនដីជារៀងរហូត។

​អំណានព្រះគម្ពីរពេលល្ងាច៖ លោកុប្បត្តិ​ ៥:១៨-២៤