ថ្ងៃព្រហស្បតិ៍ ទី១៦ ខែធ្នូ ឆ្នាំ២០២១
អំណានព្រះគម្ពីរពេលព្រឹក៖ កុំឲ្យត្រាប់តាមសម័យនេះឡើយ ចូរឲ្យអ្នករាល់គ្នាបានផ្លាស់ប្រែវិញ ដោយគំនិតបានកែជាថ្មីឡើង ដើម្បីនឹងអាចលមើលឲ្យបានស្គាល់បំណងព្រះហឫទ័យនៃព្រះ ដែលល្អ ស្រួលទទួល ហើយគ្រប់លក្ខណ៍ផង។ រ៉ូម ១២:២
អំណានប្រចាំថ្ងៃ៖ បានផ្លាស់ប្រែដោយសារព្រះយេស៊ូវ
ក្រោយពីលោកអ័ដាមបានធ្លាក់ចុះពីលក្ខណៈនៃការសប្បាយដ៏គ្រប់លក្ខណ៍ ទៅជាមានទុក្ខវេទនានិងមានបាបមក មនុស្សមានគ្រោះថ្នាក់ដោយមានការបាក់ទឹកចិត្តហើយគិតថា «គឺឯងរាល់គ្នាពោលថា ការដែលខំគោរពតាមព្រះ នោះឥតអំពើទេ ហើយដែលយើងបានរក្សាបញ្ញើរបស់ព្រះយេហូវ៉ានៃពួកពលបរិវារ ព្រមទាំងដើរនៅចំពោះទ្រង់ដោយកាន់ទុក្ខដូច្នេះ តើមានប្រយោជន៍អ្វី?” (ម៉ាឡាគី ៣:១៤) តាំងពីបណ្តាសាយ៉ាងធ្ងន់ធ្ងរបានធ្លាក់មកលើមនុស្សលោកមក តើសេចក្តីស្លាប់បានក្លាយជាមរតករបស់យើងទាំងអស់គ្នាមែនឬទេ។ ប៉ុន្តែ ការបង្រៀនយ៉ាងច្បាស់ដែលព្រះបានប្រទានដល់លោកអ័ដាម ដែលសេតបានរំឭកឡើងវិញ ហើយដែលត្រូវបានលោកហេណុកបំពងសំឡេងឡើងយ៉ាងច្បាស់បានកំចាត់ភាពងងឹតនិងភាពស្រអាប់ និងផ្តល់សេចក្តីសង្ឃឹមដល់មនុស្សថា ដោយសារលោកអ័ដាម សេចក្តីស្លាប់បានកើតឡើងដល់មនុស្ស ហើយតាមរយៈព្រះយេស៊ូវជាព្រះដ៏ប្រោសលោះដែលព្រះបានសន្យានឹងនាំមកនូវជីវិត និងភាពមិនចេះស្លាប់ដល់មនុស្សលោក។
នៅក្នុងករណីរបស់លោកហេណុក រាស្ត្ររបស់ព្រះដែលមានការបាក់ទឹកចិត្តបានទទួលការបង្រៀនថា ទោះបីជាការរស់នៅក្នុងចំណោមមនុស្សអាក្រក់និងមានបាបដែលហ៊ានបះបោរប្រឆាំងទាស់នឹងព្រះដែលជាអ្នកបង្កើតគេមកដោយបើកចំហក៏ដោយ ប្រសិនបើគេស្តាប់បង្គាប់ដល់ទ្រង់ ហើយមានជំនឿលើព្រះដ៏ប្រោសលោះដែលព្រះបានសន្យា គេអាចប្រព្រឹត្តសុចរិតដូចជាលោកហេណុកដែលជាអ្នកដែលព្រះបានទទួលយក ហើយទីបំផុតត្រូវបានព្រះលើកយកទៅកាន់បល្ល័ង្ករបស់ទ្រង់នៅស្ថានសួគ៌នោះដែរ។
លោកហេណុកបានបំបែកខ្លួនគាត់ចេញពីលោកិយ ហើយបានចំណាយពេលវេលារបស់គាត់ជាច្រើន ដើម្បីអធិស្ឋាននិងប្រាស្រ័យទាក់ទងជាមួយនឹងព្រះតំណាងឱ្យរាស្ត្រដ៏ស្មោះត្រង់របស់ព្រះ នៅសម័យចុងក្រោយដែលនឹងបំបែកខ្លួនគេចេញពីលោកិយ។ មនុស្សទុច្ចរិតនឹងមានជ័យជំនះ ហើយបានរីកចម្រើនយ៉ាងគួរឱ្យភ័យខ្លាចនៅលើផែនដី។ មានមនុស្សជាច្រើននឹងប្រគល់ខ្លួនគេឱ្យដើរតាមការស្រមើស្រមៃនៃចិត្តដ៏ពុករលួយរបស់មនុស្សអាក្រក់ ហើយរក្សាទស្សនៈ បោកប្រាស់របស់គេព្រមទាំងនាំគ្នាប្រឆាំងទាស់នឹងស្ថានសួគ៌ដ៏ខ្ពស់បំផុត។ រាស្ត្ររបស់ព្រះនឹងញែកខ្លួនគេចេញពីអំពើទុច្ចរិតរបស់មនុស្សដែលនៅជុំវិញគេ ហើយដើរតាមព្រះហឫទ័យរបស់ព្រះទាំងស្រុងរហូតដល់រូបអង្គរបស់ព្រះត្រូវបានឆ្លុះបញ្ចាំងចេញពីពួកគេ។ ពួកគេក៏សុចរិត ល្មមអាចនឹងលើកយកទៅស្ថានសួគ៌ដូចជាលោកហេណុកដែរ។ នៅពេលដែលគេខំប្រឹងបង្រៀន និងព្រមានដល់លោកិយ ពួកគេនឹងមិនធ្វើតាមគំនិតនិងប្រពៃណីរបស់អ្នកមិនជឿឡើយ ប៉ុន្តែ ពួកគេនឹងថ្កោលទោសដល់មនុស្សអាក្រក់ដោយពាក្យសំដីដ៏បរិសុទ្ធនិងយកគំរូតាមព្រះរបស់ពួកគេវិញ។ ការលើកយកលោកហេណុកទៅកាន់ស្ថានសួគ៌ កើតឡើងនៅមុនគ្រាដែលផែនដីត្រូវបានបំផ្លាញដោយទឹកជំនន់ តំណាងឱ្យការលើកយកមនុស្សសុចរិតដែលមានជីវិតចេញពីផែនដី មុននឹងផែនដីនេះត្រូវបំផ្លាញដោយសារភ្លើងដូច្នោះដែរ។ ពួកបរិសុទ្ធនឹងត្រូវបានលើកតម្កើង នៅចំពោះមុខពួកមនុស្សដែលធ្លាប់តែស្អប់ដល់ពួកគេដោយសារការគោរពដ៏ស្មោះត្រង់របស់ពួកគេចំពោះបញ្ញត្តិដ៏សុចរិតរបស់ព្រះ។
អំណានព្រះគម្ពីរពេលល្ងាច៖ ភីលីព ២:១-៥
ខចងចាំ៖ តែបើយើងរាល់គ្នាដើរក្នុងពន្លឺវិញ ដូចជាទ្រង់ក៏គង់ក្នុងពន្លឺដែរ នោះយើងមានសេចក្តីប្រកបនឹងគ្នាទៅវិញទៅមក ហើយព្រះលោហិតនៃព្រះយេស៊ូវគ្រីស្ទ ជាព្រះរាជបុត្រានៃទ្រង់ ក៏សំអាតយើងរាល់គ្នា ពីគ្រប់អំពើបាបទាំងអស់។ យ៉ូហានទី១ ១:៧
