ថ្ងៃសៅរ៍ ទី២៥ ខែធ្នូ ឆ្នាំ២០២១
អំណានព្រះគម្ពីរពេលព្រឹក៖ អស់អ្នកណាដែលមានចិត្តឆ្មើងឆ្មៃ នោះជាទីស្អប់ខ្ពើមដល់ព្រះយេហូវ៉ា ទោះបើព្រួតដៃគ្នា គង់តែគេមិនរួចពីទោសឡើយ។ សុភាសិត ១៦:៥
អំណានប្រចាំថ្ងៃ
មិនយូរប៉ុន្មាន កូនចៅរបស់លោកណូអេក៏បានចាប់ផ្តើមបោះបង់សេចក្តីជំនឿ (បែរទៅរកផ្លូវអាក្រក់វិញ)។ មួយចំនួនបានដើរតាមគំរូរបស់លោកណូអេ ដោយបានគោរពក្រឹត្យវិន័យរបស់ព្រះ មួយចំនួនផ្សេងទៀតមិនបានដើរតាមព្រះទេ ហើយថែមទាំងបានបះបោរប្រឆាំងទាស់នឹងព្រះថែមទៀតផង។ ពួកគេរហូតដល់មិនទាំងជឿលើទឹកជំនន់ថែមទៀត។ ពួកគេមិនជឿថាមានព្រះទេ ហើយនៅក្នុងគំនិតរបស់គេបែរជាយល់ថាទឹកជំនន់នេះកើតមកពីគ្រោះធម្មជាតិទៅវិញ។ មនុស្សមួយចំនួនបានជឿថា ព្រះទ្រង់មានពិត ហើយថាទ្រង់បានបំផ្លាញមនុស្សជំនាន់មុន ដោយសារទឹកជំនន់ ហើយអារម្មណ៍របស់ពួកគេក៏បានពុះកញ្ជ្រោលឡើងបះបោរប្រឆាំងនឹងព្រះ ដូចជាកាអ៊ីនដែរដោយសារតែទ្រង់បានបំផ្លាញមនុស្សពីផែនដី និងបានដាក់បណ្តាសាផែនដីជាលើកទីបីដោយសារទឹកជំនន់ (លើកទីមួយពេលលោកអ័ដាមនិងនាងអេវ៉ាស្តាប់តាមអារក្ស លើកទីពីរនៅពេលដែលកាអ៊ីនសម្លាប់អេបិល)។
អស់អ្នកដែលជាសត្រូវរបស់ព្រះត្រូវបានស្តីបន្ទោសជារៀងរាល់ថ្ងៃដោយពាក្យសំដីសុចរិត និងជីវិតរស់នៅតាមការណែនាំរបស់ព្រះ ពួកមនុស្សដែលស្រឡាញ់ព្រះ ស្តាប់បង្គាប់ និងលើកតម្កើងព្រះ។ ពួកអ្នកមិនជឿព្រះបានជំនុំគ្នា ហើយបានព្រមព្រៀងគ្នាបំបែកខ្លួនចេញពីពួកមនុស្សដែលមានជំនឿដែលជីវិតសុចរិតរបស់ពួកគេបានបន្ទុចបង្អាក់ដល់អំពើអាក្រក់របស់គេ (ពួកមនុស្សអាក្រក់) ជាបន្តបន្ទាប់។ ពួកគេបានធ្វើដំណើរយ៉ាងឆ្ងាយ ចាកចេញពីមនុស្សសុចរិត ហើយបានជ្រើសរើសយកទីវាលរាបដ៏ធំមួយតាំងទីលំនៅ។ ពួកគេបានសាងសង់ទីក្រុងមួយ រួចពួកគេផុសគំនិតចង់សង់ប៉មយ៉ាងខ្ពស់កប់ពពកមួយ ដើម្បីឱ្យពួកគេអាចរស់នៅក្នុងទីក្រុងនិងនៅលើប៉មនោះ ដោយមិនត្រូវខ្ចាត់ខ្ចាយទៀតឡើយ។ ពួកគេបានគិតថាពួកគេនឹងមានសុវត្ថិភាព នៅពេលមានទឹកជំនន់ម្តងទៀត ព្រោះពួកគេបានសង់ប៉មរបស់គេដែលខ្ពស់ផុតពីកំពស់ទឹកជំនន់កាលពីលើកមុន ហើយពេលនោះមនុស្សទាំងឡាយនៅលើពិភពលោកនឹងកោតសរសើរដល់ពួកគេ ហើយពួកគេនឹងបានដូចជាព្រះដោយគ្រប់គ្រងលើពិភពលោកទាំងមូល។ គេបានគិតថាប៉មនេះ នឹងលើកតម្កើងដល់អ្នកដែលបានកសាងវា ហើយគេបានរៀបចំដើម្បីទាញចំណាប់អារម្មណ៍មនុស្សដទៃទៀត ដែលរស់នៅលើផែនដីនេះចេញពីព្រះឱ្យមកចូលរួមជាមួយពួកគេ ក្នុងការថ្វាយបង្គំរូបព្រះវិញ។ មនុស្សបានរស់នៅក្នុងប៉មនោះ មុនប៉មនោះបានសង់ហើយរួចរាល់។ បន្ទប់ទាំងឡាយត្រូវបានរៀបចំតុបតែងយ៉ាងស្អាតសម្រាប់ថ្វាយដល់រូបព្រះរបស់គេ។ ពួកមនុស្សដែលមិនបានជឿដល់ព្រះបានគិតស្រមៃថា ប្រសិនបើប៉មរបស់ពួកគេអាចឡើងខ្ពស់កប់ពពក ពួកគេអាចនឹងស្វែងរកឃើញនូវហេតុផលដែលបានបណ្តាលឱ្យមានទឹកជំនន់។
អំណានព្រះគម្ពីរពេលល្ងាច៖លោកលុប្បត្តិ ១១៖១-៩
ខចងចាំ៖ កុំឲ្យត្រាប់តាមសម័យនេះឡើយ ចូរឲ្យអ្នករាល់គ្នាបានផ្លាស់ប្រែវិញ ដោយគំនិតបានកែជាថ្មីឡើង ដើម្បីនឹងអាចលមើលឲ្យបានស្គាល់បំណងព្រះហឫទ័យនៃព្រះ ដែលល្អ ស្រួលទទួល ហើយគ្រប់លក្ខណ៍ផង។ រ៉ូម ១២:២
