ថ្ងៃព្រហស្បតិ៍ ទី០៩ ខែធ្នូ ឆ្នាំ២០២១
អំណានព្រះគម្ពីរពេលព្រឹក៖ ដោយសារសេចក្តីជំនឿ នោះអេបិលបានថ្វាយយញ្ញបូជាដល់ព្រះ ដែលប្រសើរជាងតង្វាយរបស់កាអ៊ីន ហើយមានសេចក្តីបន្ទាល់ពីគាត់ ដោយព្រោះយញ្ញបូជានោះថា គាត់សុចរិត ទាំងមានព្រះធ្វើបន្ទាល់ពីតង្វាយគាត់ផង បានជាទោះបើគាត់ស្លាប់ក៏ដោយ គង់តែនៅមាននិយាយទៅទៀត ដោយសារតង្វាយនោះឯង។ ហេព្រើរ ១១:៤
អំណានប្រចាំថ្ងៃ
កាអ៊ីននិងអេបិល គឺជាកូនប្រុសរបស់លោកអ័ដាមដែលមានអត្តចរិតខុសគ្នាដាច់ស្រឡះ។ អេបិលបានកោតខ្លាចព្រះ។ កាអ៊ីនចូលចិត្តគំនិតបះបោរប្រឆាំងទាស់នឹងព្រះស្ងាត់ៗនៅក្នុងចិត្ត ដោយសារតែបណ្តាសាដែលព្រះបានដាក់ដល់លោកអ័ដាម និងដោយសារតែដីត្រូវបណ្តាសាដោយអំពើបាបរបស់គេ។ បងប្អូនទាំងពីរនាក់នេះ ត្រូវបានឪពុកម្តាយបង្រៀនពីទស្សនវិស័យដែលព្រះបានបង្កើតសម្រាប់សេចក្តីសង្គ្រោះដល់មនុស្ស។ ពួកគេត្រូវបានតម្រូវឱ្យស្តាប់បង្គាប់ដល់ព្រះដោយបន្ទាបខ្លួន និងដោយបង្ហាញនូវសេចក្តីគោរពរបស់គេចំពោះព្រះ ព្រមទាំងរក្សានូវសេចក្តី ជំនឿរបស់គេ ហើយទីពឹងទៅលើព្រះអង្គដ៏ប្រោសលោះរបស់គេ ដោយការសម្លាប់សត្វដំបូងពីហ្វូងសត្វរបស់គេ ហើយយកឈាមធ្វើជាតង្វាយដុតថ្វាយដល់ព្រះ។ តង្វាយនេះនឹងរំឭកគេឱ្យចងចាំនៅក្នុងចិត្តជានិច្ចពីអំពើបាបរបស់គេនិងពីព្រះអង្គដ៏ប្រោសលោះរបស់គេដែលនឹងយាងមកធ្វើជាតង្វាយយញ្ញបូជាដ៏អស្ចារ្យសម្រាប់មនុស្សលោក។
កាអ៊ីនបាននាំយកតង្វាយរបស់គេទៅថ្វាយដល់ព្រះដោយរអ៊ូរទាំ និងមានចិត្តមិនស្មោះត្រង់ទៅនឹងតង្វាយយញ្ញបូជាដែលព្រះបានសន្យា។ កាអ៊ីនមិនបានធ្វើតាមផែនការនៃការស្តាប់បង្គាប់ឱ្យបានត្រឹមត្រូវទេតែគេបានជំនួសការសម្លាប់កូនចៀមដោយយកថ្លែឈើជាផលដែលកើតពីដីមកថ្វាយដល់ព្រះទៅវិញ។ គាត់គ្រាន់តែបានយកផលពីដីយកទៅថ្វាយព្រះ ដោយមិនខ្វល់ពីការដែលព្រះបានតម្រូវនោះឡើយ។ ព្រះទ្រង់បានមានបន្ទូលប្រាប់ដល់លោកអ័ដាមថា បើគ្មានការខ្ចាយឈាមទេ នោះក៏នឹងមិនមានការលើកលែងទោសពីអំពើបាបដែរ។ កាអ៊ីនមិនទាំងបាន ជ្រើសរើសផ្លែឈើដ៏ល្អបំផុតទៅថ្វាយព្រះផង។ អេបិលបានទូន្មានដល់បងប្រុសរបស់ខ្លួនថា មិនត្រូវចូលទៅចំពោះព្រះ ដោយគ្មានឈាមនៃសត្វជាតង្វាយឡើយ។ កាអ៊ីនជាបងដែលមានអាយុច្រើនជាង គេមិនបានស្តាប់តាមការទូន្មានរបស់ប្អូនទេ។ គាត់មិនចូលចិត្តនឹងការឱ្យយោបល់របស់អេបិលឡើយ ហើយគាត់ក៏បានយកតង្វាយរបស់គាត់ទៅថ្វាយដល់ព្រះដោយការសង្ស័យនិងរអ៊ូរទាំ។ ប៉ុន្តែ ព្រះទ្រង់ពុំបានទទួលតង្វាយនោះទេ។
អេបិលបាននាំយកកូនដំបូងដ៏ធាត់ពីហ្វូងសត្វរបស់គាត់ ទៅថ្វាយជាតង្វាយដល់ព្រះ ដូចដែលព្រះបានបង្គាប់ដោយសេចក្តីជំនឿលើព្រះមែស្ស៊ីដែលនឹងយាងមក ដោយការគោរពនិងបន្ទាបខ្លួនយ៉ាងជ្រាលជ្រៅ។ ព្រះទ្រង់បានទទួលយកតង្វាយរបស់គាត់ដោយសព្វព្រះហឫទ័យ។ មានភ្លើងធ្លាក់ពីលើមេឃមកបញ្ឆេះតង្វាយរបស់អេបិល។ កាអ៊ីនមិនបានឃើញសញ្ញាដែលបង្ហាញថាព្រះសព្វព្រះហឫទយ័នឹងតង្វាយរបស់គាត់ឡើយ។ គាត់ក៏ខឹងនឹងព្រះ ហើយនិងប្អូនប្រុសរបស់គាត់។ ព្រះសព្វព្រះហឫទ័យបញ្ជូនទេវតាទៅសន្ទនាជាមួយនឹងកាអ៊ីន។
អំណានព្រះគម្ពីរពេលល្ងាច៖លោកលុប្បត្តិ ៤៖១-១៥
ខចងចាំ៖ ដ្បិតព្រះទ្រង់ស្រឡាញ់មនុស្សលោកដល់ម៉្លេះបានជាទ្រង់ប្រទានព្រះរាជបុត្រាទ្រង់តែ១ ដើម្បីឲ្យអ្នកណាដែលជឿដល់ព្រះរាជបុត្រានោះ មិនត្រូវវិនាសឡើយ គឺឲ្យមានជីវិតអស់កល្បជានិច្ចវិញ។ យ៉ូហាន ៣:១៦
