អំណានព្រះគម្ពីរប្រចាំថ្ងៃ៖ ទំនុកតម្កើងជំពួក៦

ខព្រះគម្ពីរប្រចាំថ្ងៃ: រីឯ​ព្រះ​ដ៏​មាន​ព្រះគុណ​សព្វ​គ្រប់ ដែល​ទ្រង់​បាន​ហៅ​យើង​រាល់​គ្នា មក​ក្នុង​សិរីល្អ​នៃ​ទ្រង់ ដ៏​នៅ​អស់​កល្ប​ជានិច្ច ដោយ​ព្រះគ្រីស្ទ​យេស៊ូវ នោះ​សូម​ទ្រង់​មេត្តា​ប្រោស​ឲ្យ​អ្នក​រាល់​គ្នា​បាន​គ្រប់​លក្ខណ៍ ទាំង​ចំរើន​កំឡាំង ហើយ​តាំង​អ្នក​រាល់​គ្នា​ឲ្យ​មាំមួន​ឡើង ក្នុង​ខណៈ​ក្រោយ​ដែល​បាន​រង​ទុក្ខ​បន្តិច។ េពត្រុសទី១ ៥:១០

នៅដើមដំបូងនៃសំបុត្រទីមួយរបស់គាត់ អ្នកបម្រើព្រះចំណាស់ម្នាក់នេះបានពណ៌នាទៅកាន់ព្រះជាម្ចាស់ អំពីលក្ខណៈនៃការសរសើរតម្កើងនិងការអរព្រះគុណ ។ លោកបានមានប្រសាសន៍ថា «សូមសរសើរដល់ព្រះដ៏ជាព្រះវរបិតានៃព្រះយេស៊ូវគ្រិស្ត ជាព្រះអម្ចាស់នៃយើងរាល់គ្នា ដែលទ្រង់​បានបង្កើតយើងឡើងជាថ្មី តាមសេចក្តីមេត្តាករុណាដ៏ធំរបស់ទ្រង់ ដើម្បីឲ្យយើងរាល់គ្នាបានសេចក្តីសង្ឃឹមដ៏រស់ ដោយសារព្រះយេស៊ូវគ្រិស្ត ទ្រង់រស់ពីសុគតឡើងវិញហើយឲ្យយើងបានមរតក ដែលមិនចេះពុករលួយ ក៏ឥត​សៅហ្មង ហើយមិនដែលស្រពោនឡើយ ជាមរតកដែលបម្រុង​ទុកឲ្យយើង​រាល់គ្នានៅឋានសួគ៌ គឺឲ្យយើងរាល់គ្នា ដែលព្រះចេស្តានៃព្រះកំពុងតែថែរក្សា ដោយសារសេចក្តីជំនឿ សម្រាប់ឲ្យបានសេចក្តីសង្គ្រោះ ដែលប្រុងប្រៀបនឹងសម្តែងមកនៅជាន់ក្រោយបង្អស់នោះ»។

គ្រិស្ដសាសនិកនៅសម័យដើមមានអំណរក្នុងក្តីសង្ឃឹមនៃមរតកពិតប្រាកដ នៅលើផែនដីថ្មី ទោះបីនៅក្នុងពេលមានការល្បងលនិងទុក្ខវេទនាខ្លាំងយ៉ាងណាក៏ដោយ ។ លោកពេត្រុសបានសរសេរថា «អ្នករាល់គ្នាក៏មានសេចក្តីអំណរជាខ្លាំង ក្នុងសេចក្តីសង្គ្រោះនោះ ទោះបើសព្វថ្ងៃនេះត្រូវរងទុក្ខព្រួយជាយូរបន្តិច ដោយកើតមានសេចក្តីល្បួងផ្សេងៗក៏ដោយ ដើម្បីឲ្យការសាកលសេចក្តីជំនឿនៃអ្នករាល់គ្នា ដ៏វិសេសជាងមាសដែលតែងតែខូច ទោះបើបានសាកនឹងភ្លើងក៏ដោយ នោះបានឃើញសម្រាប់​ជាសេចក្តី​សរសើរ កេរ្តិ៍ឈ្មោះ និងសិរីល្អ ក្នុងកាលដែលព្រះយេស៊ូវគ្រិស្តទ្រង់លេចមក ដែល​អ្នករាល់គ្នាមិនបានឃើញទ្រង់ទេ តែបានស្រឡាញ់ទ្រង់ ហើយទោះបើ​នៅ​ជាន់ឥឡូវនេះ អ្នករាល់គ្នានៅតែមិនឃើញទ្រង់ទៀត គង់តែមានចិត្តជឿដែរ ហើយក៏ត្រេកអរសាទរក្នុងទ្រង់ ដោយសេចក្តីអំណរដ៏ប្រសើរ ដែល​រកថ្លែង​មិនបាន ដោយបានទទួលចុងបំផុតនៃសេចក្តីជំនឿរបស់អ្នករាល់គ្នា គឺជា​សេចក្តីសង្គ្រោះដល់ព្រលឹង»។

ពាក្យរបស់សាវ័កពេត្រុស ត្រូវបានសរសេរសម្រាប់ណែនាំដល់អ្នកជឿនៅគ្រប់ជំនាន់ ហើយមានសារៈសំខាន់ជាពិសេសសម្រាប់អ្នកដែលរស់នៅក្នុង «ទីបញ្ចប់នៃកិច្ចការទាំងអស់បានមកដល់ហើយ» ការទូន្មាននិងការព្រមានរបស់លោក និងពាក្យពេចន៍នៃសេចក្តីជំនឿនិងការលើកទឹកចិត្តរបស់លោកគឺជាសេចក្តីត្រូវការរបស់មនុស្សដែលរក្សាសេចក្តីជំនឿ «ខ្ជាប់តាមសេចក្តីជំនឿដើម ដរាបដល់ចុងបំផុត» (ហេព្រើរ ៣:១៤)។

សាវ័កពេត្រុសបានព្យាយាមបង្រៀនដល់ពួកអ្នកជឿពីសារៈសំខាន់នៃការរក្សាគំនិតកុំឲ្យវង្វេងទៅតាមប្រធានបទដែលព្រះបានហាមឃាត់ ឬពីការចំណាយថាមពលរបស់ខ្លួនទៅលើកិច្ចការតូចតាចឥតប្រយោជន៍។ អស់អ្នកដែលមិនបានក្លាយជារំពានៃឧបាយកលរបស់សាតាំងត្រូវតែការពារផ្លូវនៃចិត្តឲ្យបានល្អ ពួកគេត្រូវជៀសវាងការអាន ការមើលឬស្ដាប់ នូវអ្វីដែលនឹងណែនាំមកនូវភាពមិនបរិសុទ្ធដល់គំនិត។ មិនត្រូវទុកគំនិតនេះឲ្យនៅក្នុងប្រធានបទទាំងឡាយណាដែលសត្រូវនៃចិត្តបានបង្ហាញនោះទេ ។ ត្រូវតែ​រក្សា​ចិត្តដោយស្មោះត្រង់ បើមិនដូច្នោះទេ អំពើអាក្រក់ពីខាងក្រៅនឹងដាស់អំពើអាក្រក់នៅក្នុង ហើយចិត្តនឹងវង្វេងនៅក្នុងភាពងងឹតជាក់ជាមិនខាន ។ លោកពេត្រុសបានសរសេរថា «ដូច្នេះ ចូរក្រវាត់គំនិតអ្នករាល់គ្នាឲ្យមាំមួនចុះ ទាំងដឹងខ្លួន ហើយឲ្យមានសេចក្តីសង្ឃឹមគ្រប់ជំពូក ដល់ព្រះគុណដែលត្រូវផ្តល់មកដល់អ្នករាល់គ្នា ក្នុងកាលដែលព្រះយេស៊ូវគ្រិស្តទ្រង់លេចមកផង … ឥតបណ្តោយតាមសេចក្តីប៉ងប្រាថ្នា ដែលអ្នករាល់គ្នាមាន ពីកាល​នៅ​ល្ងង់ពីដើមនោះឡើយ តែចូរឲ្យអ្នករាល់គ្នាបានបរិសុទ្ធក្នុងគ្រប់កិរិយាទាំងអស់ ដូចជាព្រះដែលហៅអ្នករាល់គ្នាទ្រង់បរិសុទ្ធដែរ ដ្បិតមានសេចក្តី​ចែងទុកមកថា ចូរឲ្យឯងរាល់គ្នាបានបរិសុទ្ធ ដ្បិតអញជាបរិសុទ្ធ»។