អំណានព្រះគម្ពីរប្រចាំថ្ងៃ៖ យ៉ូបជំពួក​៤០

ខព្រះគម្ពីរប្រចាំថ្ងៃ: ចូរ​ឲ្យ​រត់​ពី​សេចក្តី​ស្រើបស្រាល​របស់​ក្មេងៗ​ចេញ ហើយ​ដេញ​តាម​សេចក្តី​សុចរិត សេចក្តី​ជំនឿ សេចក្តី​ស្រឡាញ់ និង​សេចក្តី​មេត្រី ជា​មួយ​នឹង​អ្នក​អស់​អ្នក​ដែល​អំពាវនាវ​ដល់​ព្រះអម្ចាស់ អំពី​ចិត្ត​ដ៏​បរិសុទ្ធ​វិញ។ ធីម៉ូថេទី២ ២:២២

នៅក្នុងសំបុត្រចុងក្រោយរបស់លោក ផ្ញើទៅជូនធីម៉ូថេនេះ លោកប៉ុលបានលើកឡើងនៅមុខអ្នកបម្រើការវ័យក្មេងជាងគេនេះពីគំនិតដ៏ខ្ពង់ខ្ពស់ ដោយចង្អុលបង្ហាញពីភារកិច្ចដែលលោកបានប្រគល់ឲ្យគាត់ធ្វើជាអ្នកបម្រើរបស់ព្រះគ្រិស្ត ។ សាវ័កប៉ុលបានសរសេរថា «ចូរខំប្រឹង​នឹង​ថ្វាយខ្លួនដល់​ព្រះ ទុកជាមនុស្សដែលបានល្បងលជាប់ហើយ ជាអ្នកធ្វើការ ដែលមិន​ត្រូវ​ខ្មាសឡើយ ដោយកាត់ស្រាយព្រះបន្ទូលនៃសេចក្តីពិតយ៉ាងត្រឹមត្រូវ» ។ «ចូរឲ្យរត់ពីសេចក្តីស្រើបស្រាលរបស់ក្មេងៗចេញ ហើយដេញតាម​សេចក្តី​សុចរិត សេចក្តីជំនឿ សេចក្តីស្រឡាញ់ និងសេចក្តីមេត្រី ជាមួយនឹងអស់​អ្នកដែលអំពាវនាវដល់ព្រះអម្ចាស់ អំពីចិត្តដ៏បរិសុទ្ធវិញ កុំឲ្យព្រមស្តាប់សេចក្តីដេញដោលចម្កួត ហើយឥតច្បាប់នោះឡើយ ដោយដឹងថាសេចក្តីទាំងនោះនាំឲ្យមានសេចក្តីឈ្លោះប្រកែកគ្នាទេ ក៏មិនគួរឲ្យបាវបម្រើនៃព្រះអម្ចាស់ឈ្លោះប្រកែកគ្នាឡើយ គួរឲ្យបានចិត្តសុភាពរាបសាដល់មនុស្សទាំងអស់វិញ ត្រូវប្រសប់ក្នុងការបង្រៀន ទាំងមានចិត្តអត់ធ្មត់ផង ត្រូវប្រដៅតម្រង់មនុស្សដែលទទឹងទទែង ដោយមានចិត្តសុភាព ក្រែងព្រះទ្រង់នឹងបណ្តាលឲ្យគេប្រែចិត្តឲ្យបានស្តាប់សេចក្តីពិតវិញ»។

សាវ័កប៉ុលបានព្រមានធីម៉ូថេទប់ទល់នឹងគ្រូបង្រៀនក្លែងក្លាយដែលនឹងព្យាយាមស្វែងរកផ្លូវចូលមកក្នុងពួកជំនុំ។ លោកបានមានប្រសាសន៍ថា «ចូរឲ្យដឹងថា នៅជាន់ក្រោយបង្អស់ នឹងមានគ្រាលំបាកណាស់ ដ្បិតនៅគ្រា​នោះ មនុស្សនឹងស្រឡាញ់តែខ្លួនឯង ទាំងស្រឡាញ់ប្រាក់ អួតអាងគឃរ មានឫកខ្ពស់ ប្រមាថមើលងាយ មិនស្តាប់បង្គាប់ឪពុកម្តាយ រមិលគុណ មាន​ចិត្តមិនបរិសុទ្ធ … គេមានឫកពាជាអ្នកគោរពប្រតិបត្តិដល់ព្រះ ប៉ុន្តែ មិន​ព្រម​ទទួលស្គាល់ព្រះចេស្តា ដែលមកដោយការគោរពប្រតិបត្តិនោះទេ ចូរបែរពី​ពួក​មនុស្សយ៉ាងនោះចេញ»។

លោកបានបន្តថា «ហើយពួកអាក្រក់ និងពួកឆបោក គេនឹងមានជំនឿជឿទៅខាងសេចក្តីអាក្រក់កាន់តែខ្លាំងឡើង ទាំងនាំមនុស្សឲ្យវង្វេង ហើយ​ត្រូវវង្វេងខ្លួនឯងផង តែឯអ្នកចូរឲ្យអ្នកនៅជាប់ក្នុងសេចក្តីដែលអ្នកបានរៀន ហើយជឿប្រាកដវិញ ដោយដឹងថា អ្នកបានរៀនសេចក្តីនោះពីអ្នកណា ហើយថា តាំងពីក្មេងតូចមក អ្នកបានស្គាល់បទគម្ពីរទាំងប៉ុន្មាន ដែលអាចនឹងនាំឲ្យអ្នកមានប្រាជ្ញាដល់ទីសង្គ្រោះ … គ្រប់ទាំងបទគម្ពីរ គឺជាព្រះទ្រង់បានបញ្ចេញព្រះវិញ្ញាណបណ្តាលឲ្យតែងទេ ក៏មាន​ប្រយោជន៍​សម្រាប់​ការបង្រៀន ការរំឭកឲ្យដឹងខ្លួន ការប្រដៅតម្រង់ និងការបង្ហាត់ខាង​ឯ​សេចក្តី​សុចរិត ដើម្បីឲ្យអ្នកសំណប់របស់ព្រះបានគ្រប់លក្ខណ៍ ហើយ​មាន​គ្រប់ទាំង​ចំណេះ សម្រាប់នឹងធ្វើការល្អគ្រប់មុខ» ។ ព្រះបានប្រទានមធ្យោបាយជាច្រើនសម្រាប់ធ្វើសង្គ្រាមឲ្យទទួលបានជោគជ័យ ប្រឆាំងនឹងអំពើអាក្រក់ដែលមាននៅក្នុងពិភពលោកនេះ ។ ព្រះគម្ពីរជាគ្រឿងសឹកដែលយើងអាចពាក់សម្រាប់ពេលប្រយុទ្ធ យើងត្រូវក្រវាត់សេចក្តីពិតនៅនឹងចង្កេះ ។ យកសេចក្តីសុចរិតធ្វើជាប្រដាប់បាំងដើមទ្រូង ។ ត្រូវកាន់សេចក្តីជំនឿដែលជាខែលជាប់នៅដៃ សេចក្តីសង្គ្រោះដែលជាមួកសុវត្ថិភាពនៅលើក្បាល ហើយ​ព្រះបន្ទូលនៃព្រះវិញ្ញាណ ដែលជាព្រះបន្ទូលរបស់ព្រះ យើងត្រូវកាប់ឆ្កា​ផ្លូវ​របស់យើង ឆ្លងកាត់ឧបសគ្គនិងភាពស្មុកស្មាញទាំងឡាយនៃអំពើបាប។

លោកប៉ុលបានដឹងថា នឹងមានពេលគ្រោះថ្នាក់ដ៏ធំកើតឡើងនៅចំពោះពួកជំនុំ ។ លោកបានដឹងថាការងារដ៏ស្មោះត្រង់ និងស្មោះស្ម័គ្រនឹងត្រូវបង្ហើយដោយអស់អ្នកដែលទទួលខុសត្រូវនៃពួកជំនុំ ហើយលោក​បាន​សរសេរទៅកាន់ធីម៉ូថេថា «ដូច្នេះ ខ្ញុំផ្តាំមកអ្នកយ៉ាងអស់ពីចិត្ត នៅចំពោះ​ព្រះ និងព្រះគ្រិស្តយេស៊ូវ ដែលទ្រង់រៀបនឹងជំនុំជម្រះ ទាំងមនុស្សរស់ និង​មនុស្សស្លាប់ផង គឺផ្តាំដោយអាងដំណើរទ្រង់យាងមក និងនគរទ្រង់ថា ចូរ​ឲ្យអ្នកផ្សាយព្រះបន្ទូលចុះ ហើយទទូចជំរុញផង ទោះត្រូវពេល ឬខុសក្តី ចូររំឭកគេឲ្យដឹងខ្លួន ព្រមទាំងបន្ទោស ហើយកម្លាចិត្តគេ ដោយចិត្តអត់ធ្មត់ និងសេចក្តីប្រៀនប្រដៅគ្រប់យ៉ាង»។