ថ្ងៃព្រហស្បតិ៍ ទី២ ខែកញ្ញា ឆ្នាំ២០២១
អំណានព្រះគម្ពីរប្រចាំថ្ងៃ៖ អេសាយជំពួក៧
ខព្រះគម្ពីរប្រចាំថ្ងៃ៖ មិនតែប៉ុណ្ណោះសោត យើងនៅតែអួតក្នុងកាលដែលមានទុក្ខលំបាកដែរ ដោយដឹងថា សេចក្តីទុក្ខលំបាកបង្កើតឲ្យមានសេចក្តីទ្រាំទ្រ សេចក្តីទ្រាំទ្របង្កើតឲ្យមានសេចក្តីស៊ាំថ្នឹក សេចក្តីស៊ាំថ្នឹកបង្កើតឲ្យមានសេចក្តីសង្ឃឹម ឯសេចក្តីសង្ឃឹមក៏មិនដែលនាំឲ្យយើងមានសេចក្តីខ្មាសឡើយ ពីព្រោះសេចក្តីស្រឡាញ់របស់ព្រះ បានផ្សាយមកសព្វក្នុងចិត្តយើងរាល់គ្នា ដោយសារព្រះវិញ្ញាណបរិសុទ្ធដែលព្រះបានប្រទានមកយើងហើយ។ រ៉ូម ៥:៣-៥
សេចក្តីមិនស្កប់បានក្លាយទៅជាអំពើបះបោរយ៉ាងសកម្ម
ក្នុងព្រះតម្រិះប្រាជ្ញារបស់ព្រះ ទ្រង់បានអនុញ្ញាតឱ្យសាតាំងបន្តកិច្ចការរបស់វា រហូតដល់សេចក្តីមិនស្កប់ចិត្តបានធំលូតលាស់ដល់មានការបះបោរ។ នេះជាការចាំបាច់មួយ ដើម្បីទុកឱ្យគម្រោងការរបស់វាបានពេញរូបរាងឡើង ប្រយោជន៍ឱ្យទាំងអស់គ្នាបានឃើញនិស្ស័យពិតប្រាកដរបស់វា។ ពពួកទេវបុត្រនៃស្ថានសួគ៌ស្រឡាញ់លូស៊ីហ្វ័រខ្លាំងណាស់ ហើយវាក៏មានអនុភាពលើគេណាស់ដែរ។ ព្រះពុំគ្រាន់តែគ្រប់គ្រងលើពួកអ្នករស់នៅស្ថានសួគ៌ប៉ុណ្ណោះទេ តែលើអស់ទាំងពិភពដែលទ្រង់បានបង្កើតមកផង ហើយសាតាំងបានគិតថា ប្រសិនបើអាចនាំពួកទេវតាជាមួយវាក្នុងការប្រឆាំងនោះ វាក៏នឹងអាចកាន់ពិភពដទៃទៀតបានដែរ។ ដោយប្រើកលល្បិច និងការបន្លំអំណាចបោកបញ្ឆោតរបស់វាគឺខ្លាំងណាស់។ សូម្បីតែពួកទេវតាដែលស្មោះត្រង់នោះ ក៏ពុំអាចយល់ពីចរិតរបស់វាបានពេញលក្ខណៈ ឬដឹងថាកិច្ចការរបស់វានោះនឹងកើតទៅជាអ្វីដែរ។
គេបានគោរពសាតាំងខ្លាំងណាស់ ហើយអស់ទាំងការប្រព្រឹត្តរបស់វាត្រូវបានបិទបាំងដោយអាថ៌កំបាំង ធ្វើឱ្យពិបាកនឹងបើកឱ្យពួកទេវតាឃើញនូវនិស្ស័យពិតប្រាកដ។ បើមិនបានពេញរូបរាងពិតប្រាកដទេ បាបមិនមែនមើលទៅឃើញអាក្រក់ដូច្នោះឡើយ។ ពួកទេវតាពុំបានយល់នូវផលវិបត្តិនៃការផាត់ចោលក្រឹត្យវិន័យដ៏ពិសិដ្ឋទេ។ មុនដំបូងសាតាំងបានអះអាងថា វាស្វះស្វែងចង់លើកតម្កើងកិត្តិយសរបស់ព្រះ និងរកប្រយោជន៍សម្រាប់អស់អ្នករស់នៅស្ថានសួគ៌។
ក្នុងការដោះស្រាយអំពើបាប ព្រះអាចប្រើបានតែសេចក្តីសុចរិត និងសេចក្តីពិតទេ។ សាតាំងអាចប្រើនូវអ្វីដែលព្រះប្រើពុំបាន ពោលគឺសេចក្តីបញ្ជោរ និងសេចក្តីបញ្ឆោត។ ចរិតពិតប្រាកដនៃមេដណ្តើមអំណាចនេះត្រូវតែបានយល់ដោយសត្វលោកទាំងអស់។ ត្រូវឱ្យពេលវេលាដល់វាដើម្បីឱ្យវាសម្តែងខ្លួនដោយអំពើទុច្ចរិតរបស់វា។
រីឯសេចក្តីមិនស្របគ្នាដែលវាបានបង្កើតឡើងនៅស្ថានសួគ៌នោះ វាបានចោទទៅលើព្រះវិញ។ អស់ទាំងអំពើអាក្រក់ទាំងប៉ុន្មាន វាបានប្រកាសថា ជាលទ្ធផលនៃការចាត់ចែងរបស់ព្រះ។ ដូច្នេះ ជាការចាំបាច់ណាស់ដែលត្រូវឱ្យវាសម្តែងផលផ្លែនៃការផ្លាស់ប្តូរក្រឹត្យវិន័យរបស់ព្រះដែលវាបានលើកមក។ កិច្ចការរបស់វាត្រូវផ្ចាញ់ផ្ចាលវា។ ពិភពលោកទាំងមូលត្រូវឃើញមេបញ្ឆោត។
សូម្បីតែនៅពេលបានសម្រេចថា វាមិនគួរនៅស្ថានសួគ៌ទៀតក៏ដោយ ព្រះដ៏មានតម្រិះប្រាជ្ញាគ្មានទីបំផុត ពុំបានបំផ្លាញសាតាំងទេ។ សេចក្តីស្មោះត្រង់នៃរាស្ត្ររបស់ព្រះ ត្រូវតែស្ថិតនៅលើការយល់ដឹងជាក់ច្បាស់នូវសេចក្តីយុត្តិធម៌របស់ទ្រង់។ បើប្រហារជីវិតសាតាំងនៅពេលនោះ អស់អ្នករស់នៅក្នុងស្ថានសួគ៌ និងស្ថានដទៃទៀតនឹងពុំអាចឃើញយុត្តិធម៌ និងមេត្តាធម៌របស់ព្រះបានឡើយ ដោយពួកគេពុំមានការឈ្វេងយល់អំពីផលវិបត្តិនៃបាបកម្ម ព្រោះពុំដែលបានប្រទះពីមុនមក។ បើបំបាត់វាមិនឱ្យមានតទៅទៀត នោះពួកគេនឹងបម្រើព្រះដោយសេចក្តីភ័យខ្លាចជាជាងដោយសេចក្តីស្រឡាញ់។ ឥទ្ធិពលនៃមេបញ្ឆោតនឹងមិនបានវិនាសទាំងស្រុងទេ ហើយកិរិយានៃសេចក្តីប្រឆាំងក៏មិនបានបាត់សូន្យឈឹងដែរ។ ដើម្បីជាប្រយោជន៍ដល់ពិភពសកលតាមសម័យដ៏អស់កល្បនោះសាតាំងត្រូវគ្រោង ការរបស់វាឱ្យបានពេញលេញថែមទៀត ដើម្បីឱ្យអស់ទាំងរូបអង្គដែលត្រូវបានបង្កើតមក ឃើញក្នុងពន្លឺដ៏ពិតនូវសេចក្តីចោទប្រកាន់នឹងការគ្រប់គ្រងរបស់ព្រះ។
ខព្រះគម្ពីរប្រចាំថ្ងៃសប្តាហ៍៖ ដូច្នេះ ដែលបាបបានចូលមកក្នុងលោកីយ៍ដោយសារមនុស្សតែម្នាក់ ហើយក៏មានសេចក្តីស្លាប់ចូលមកដែរ ដោយសារអំពើបាបនោះជាយ៉ាងណា នោះសេចក្តីស្លាប់បានឆ្លងរាលដាលដល់មនុស្សគ្រប់គ្នាយ៉ាងនោះដែរ ដ្បិតគ្រប់គ្នាបានធ្វើបាបហើយ។ រ៉ូម ៥:១២
