ថ្ងៃចន្ទ ទី១០ ខែមករា ឆ្នាំ២០២២
អំណានព្រះគម្ពីរពេលព្រឹក៖ ចូរឲ្យកិរិយាដែលអ្នករាល់គ្នាប្រព្រឹត្ត បានឥតលោភឡើយ ឲ្យស្កប់ចិត្តនឹងរបស់ដែលមានហើយប៉ុណ្ណោះចុះ ដ្បិតទ្រង់មានព្រះបន្ទូលថា «អញនឹងមិនចាកចេញពីឯង ក៏មិនបោះបង់ចោលឯងឡើយ» បានជាយើងរាល់គ្នាអាចនឹងនិយាយ ដោយក្លាហានថា «ខ្ញុំមិនព្រមខ្លាចឡើយ ព្រោះព្រះអម្ចាស់ទ្រង់ជាជំនួយខ្ញុំ តើមនុស្សនឹងធ្វើដល់ខ្ញុំជាយ៉ាងណាបាន»។ ហេព្រើរ ១៣:៥-៦
អំណានប្រចាំថ្ងៃ៖ ឡាបាន់ជាមនុស្សអាត្មានិយម
នៅក្នុងទំនាក់ទំនងជាមួយយ៉ាកុបនេះ ឡាបាន់មានចិត្តអាត្មានិយមខ្លាំងណាស់។ គាត់បានគិតតែពីប្រយោជន៍ខ្លួនឯង ពីការងារដ៏ស្មោះត្រង់របស់យ៉ាកុប។ គាត់អាចនឹងចាកចេញពីឡាបាន់ដែលជាមនុស្សដែលមានល្បិចជាយូរណាស់មកហើយ ប៉ុន្តែ គាត់មិនហ៊ានជួបជាមួយនឹងអេសាវឡើយ។ គាត់បានឮពាក្យត្អួញត្អែររបស់កូនប្រុសៗរបស់ឡាបាន់ថា «យ៉ាកុបបានលួចរបស់ទ្រព្យឪពុកយើងទាំងអស់ហើយ គឺពីរបស់ឪពុកយើងទេតើ ដែលវាបានទៅជាមានដូច្នេះ។ ហើយយ៉ាកុបមើលមុខឡាបាន់ឃើញថាមិនសូវស្រួលចំពោះខ្លួនដូចពីដើមទេ»។
យ៉ាកុបមានសេចក្តីទុក្ខព្រួយជាខ្លាំង។ គាត់មិនដឹងជាធ្វើយ៉ាងណាទេ។ គាត់បានទូលដល់ព្រះអំពីរឿងរ៉ាវរបស់គាត់ ហើយបានអង្វរសុំការដឹកនាំផ្លូវពីទ្រង់។ ព្រះអម្ចាស់បានឆ្លើយតបដោយក្តីមេត្តាករុណាទៅនឹងការអធិស្ឋានដ៏ពោរពេញដោយទុក្ខព្រួយរបស់គាត់។ «ព្រះយេហូវ៉ាទ្រង់បានមានបន្ទូលទៅកាន់យ៉ាកុបថា ចូរឯងវិលត្រឡប់ទៅនៅស្រុកឪពុកឯង ឯញាតិសន្តានឯងវិញទៅនោះអញនឹងនៅជាមួយនឹងឯង។
«យ៉ាកុបគាត់ចាត់គេឱ្យទៅហៅរ៉ាជែល និងលេអាមកឯហ្វូងសត្វត្រង់ទីវាលប្រាប់ថា អញឃើញឫកពារបស់ឪពុកឯងហាក់ដូចជាមិនសូវស្រួលនឹងអញ ដូចពីដើមសោះ តែព្រះនៃឪពុកអញទ្រង់បានគង់នៅជាមួយនឹងអញ ឯងក៏ដឹងថាអញបានបំរើឪពុកឯងអស់ពីកម្លាំងដែរតែឪពុកឯងបានបញ្ឆោតអញ ហើយបានបំផ្លាញឈ្នួលរបស់អញ១០ដងហើយ តែព្រះទ្រង់មិនព្រមបើកឱកាសឱ្យគាត់ប្រទូស្ត ឬធ្វើបាបចំពោះអញទេ យ៉ាកុបបានរៀបរាប់ប្រាប់ពួកគេទាំងពីរនាក់នូវសុបិនដែលព្រះបានប្រទានមកគាត់ឱ្យចាកចេញពីឡាបាន់ ហើយត្រឡប់ទៅឯញាតិសន្តានគាត់វិញឯរ៉ាជែលនិងលេអាក៏ឆ្លើយទៅប្តីថា ចុះយើងនៅមានចំណែក ឬមរតកនៅក្នុងផ្ទះឪពុកយើងឯណា តើគាត់មិនចាត់យើងទុកដូចជាអ្នកដទៃទេឬ ដ្បិតគាត់បានលក់យើង ហើយស៊ីបង្ហិនប្រាក់បណ្តាការរបស់យើងអស់រលីងផង គ្រប់ទាំងរបស់ទ្រព្យណាដែលព្រះបានដកពីឪពុកយើងមកនោះជារបស់ផងយើង និងកូនចៅយើងហើយ ដូច្នេះការអ្វីដែលព្រះបានបង្គាប់មកអ្នក សូមអ្នកធ្វើឥឡូវចុះ»។
អំណានព្រះគម្ពីរពេលល្ងាច៖ លោកុប្បត្តិ ៣១:១-២១
ខចងចាំ៖ កុំឲ្យច្រឡំឡើយ និងបញ្ឆោតព្រះមិនបានទេ ដ្បិតពូជណាដែលមនុស្សព្រោះចុះ នោះនឹងច្រូតបានពូជនោះឯងវិញ។ កាឡាទី ៦:៧
