ថ្ងៃសុក្រ ទី១៤ ខែមករា ឆ្នាំ២០២២
អំណានព្រះគម្ពីរពេលព្រឹក៖ ចូរអំពាវនាវដល់អញនៅថ្ងៃមានសេចក្តីទុក្ខលំបាក នោះអញនឹងជួយឲ្យរួច ឯឯងនឹងលើកដំកើងដល់អញ។ ទំនុកតម្កើង ៥០:១៥
អំណានប្រចាំថ្ងៃ៖ ការទទួលជ័យជំនះដោយសេចក្តីជំនឿ
ព្រះយេហូវ៉ាទ្រង់បានឮការសុំអង្វរឱ្យលើកលែងទោសពីយ៉ាកុប ហើយទ្រង់បានបំផ្លាស់បំប្រែចិត្តរបស់អេសាវ។ ព្រះអម្ចាស់ទ្រង់ពុំបានយកទោសនូវអំពើដែលយ៉ាកុបបានប្រព្រឹត្តនោះទេ។ ជីវិតរបស់គាត់ជាជីវិតដែលពោរពេញទៅដោយការសង្ស័យ ភាពអល់ឯក និងមានវិប្បដិសារីដោយសារតែអំពើបាបទាំងឡាយរបស់គាត់រហូតដល់ការបោកចំបាប់ដ៏ស្វិតស្វាញរបស់គាត់ជាមួយទេវតាហើយនិងភស្តុតាងនៅទីនោះដែលបញ្ជាក់ថា ព្រះបានអត់ទោសចំពោះអំពើបាបរបស់គាត់ហើយ។
«អើ គាត់ក៏មានអំណាចលើទេវតា ហើយលោកបានឈ្នះផង លោកបានយំហើយអង្វរដល់ទ្រង់ ក៏ប្រទះឃើញនៅត្រង់បេតអែលនៅទីនោះទ្រង់ក៏មានបន្ទូលមកយើងរាល់គ្នា» ហូសេ ១២:៤, ៥។
អេសាវកំពុងទៅជួបនឹងយ៉ាកុបជាមួយនឹងក្បួនកងព័ទក្នុងគោលបំណងចង់សម្លាប់ប្អូនប្រុសរបស់ខ្លួន។ ប៉ុន្តែ នៅពេលដែលយ៉ាកុបបានបោកចំបាប់ជាមួយទេវតានៅយប់នោះ ព្រះបានចាត់ទេវតាមួយអង្គទៀតឱ្យទៅផ្លាស់ប្តូរចិត្តរបស់អេសាវ នៅពេលដែលគាត់កំពុងសម្រាន្ត។ នៅក្នុងសុបិនរបស់គាត់ អេសាវបានឃើញយ៉ាកុបភៀសខ្លួនចាកចេញពីផ្ទះឪពុករបស់គាត់អស់រយៈពេល២០ឆ្នាំដោយខ្លាចបាត់បង់ជីវិត។
គាត់បានសង្កេតឃើញទុក្ខព្រួយរបស់យ៉ាកុបដោយម្តាយស្លាប់។ ក្នុងសុបិននោះ គាត់បានឃើញនូវការបន្ទាបខ្លួនរបស់យ៉ាកុប ហើយមានទេវតាជាច្រើនអង្គ នៅព័ទ្ធជុំវិញគាត់។ គាត់បានសុបិនឃើញថា នៅពេលដែលពួកគេបានជួបគាត់ គាត់គ្មានគំនិតនឹងធ្វើបាបគេឡើយ។ ហើយនៅពេលដែលអេសាវភ្ញាក់ដឹងទ្បើង គាត់បានរៀបរាប់ពីសុបិនរបស់គាត់ ប្រាប់ដល់ពួកទាហានរបស់គាត់ ទាំងបួនរយនាក់ ហើយបានប្រាប់ពួកគេថា មិនត្រូវធ្វើឱ្យយ៉ាកុបមានរបួសឡើយ ព្រោះព្រះនៃឪពុកគាត់ទ្រង់គង់នៅជាមួយនឹងគាត់។ ហើយពេលដែលពួកគេបានជួបនឹងយ៉ាកុបនោះគ្មានទាហានណាម្នាក់បានប៉ះពាល់ដល់គាត់ឡើយ។
«យ៉ាកុបគាត់បានងើបភ្នែកទ្បើង មើលទៅឃើញអេសាវកំពុងមក មានទាំងមនុស្សបួនរយនាក់មកជាមួយផង . . . ។ ក៏បានដើរទៅខាងមុខ ហើយឱនក្រាបចុះដល់ដី៧ដងទាល់តែជិតដល់បង។ អេសាវក៏រត់មកទទួល ហើយឱបថើបរួចនាំគ្នាយំជាមួយគ្នាទាំងពីរនាក់» យ៉ាកុបបានទទួលអង្វរឱ្យអេសាវទទួលយកជំនួនជាតង្វាយសន្តិភាព តែអេសាវបានបដិសេធមិនព្រមទទួល តែយ៉ាកុបបានជំរុញគាត់ «សូមទទួលយកជំនួនរបស់ខ្ញុំដែលគេបាននាំមកជូនចុះ ដ្បិតព្រះទ្រង់បានប្រទានមកខ្ញុំ ខ្ញុំក៏មានគ្រប់គ្រាន់ហើយ រួចអេសាវទទួលយកដោយគាត់បានបង្ខំ»។
អំណានព្រះគម្ពីរពេលល្ងាច៖ លោកុប្បត្តិ ជំពូក៣៣
ខចងចាំ៖ កុំឲ្យច្រឡំឡើយ និងបញ្ឆោតព្រះមិនបានទេ ដ្បិតពូជណាដែលមនុស្សព្រោះចុះ នោះនឹងច្រូតបានពូជនោះឯងវិញ។ កាឡាទី ៦:៧
