ថ្ងៃអាទិត្យ ទី០២ ខែមករា ឆ្នាំ២០២២
អំណានព្រះគម្ពីរពេលព្រឹក៖ដោយសារសេចក្តីជំនឿ នោះអ័ប្រាហាំបានថ្វាយអ៊ីសាក ក្នុងកាលដែលទ្រង់ល្បងលលោក គឺអ្នកដែលបានទទួលសេចក្តីសន្យាទាំងប៉ុន្មាន លោកបានថ្វាយកូនលោកតែមួយ ដែលមានសេចក្តីចែងទុកពីដំណើរកូននោះថា «ពូជឯងនឹងបានរាប់តាមអ៊ីសាក» លោកបានរាប់ថា ព្រះទ្រង់អាចនឹងប្រោសកូន ឲ្យរស់ពីស្លាប់ឡើងវិញបានផង ហើយលោកបានទទួលវាមកវិញមែន ធៀបដូចជារស់ពីស្លាប់ឡើងវិញ។ ហេព្រើរ ១១:១៧-១៩
អំណានប្រចាំថ្ងៃ៖ ការទុកចិត្តទាំងស្រុងទៅលើព្រះ
លោកអ័ប្រាហាំបានជឿថា អ៊ីសាកគឺជាកូនដែលព្រះបានសន្យា។ គាត់ក៏បានជឿថា ព្រះចង់ឱ្យគាត់ធ្វើតាមអ្វីដែលទ្រង់មានបន្ទូលទៅកាន់គាត់ឱ្យយកកូនទៅធ្វើជាតង្វាយដុត។ គាត់មិនបានសង្ស័យទៅលើសេចក្តីសន្យារបស់ព្រះឡើយ តែគាត់ជឿថាព្រះដែលបានប្រទានកូនឱ្យនាងសារ៉ា ក្នុងគ្រាដែលនាងមានអាយុចាស់ហើយ ហើយជាព្រះដែលបានតម្រូវឱ្យគាត់យកជីវិតកូននោះ ទ្រង់ក៏អាចនឹងប្រទានជីវិតសាជាថ្មី ហើយធ្វើឱ្យអ៊ីសាករស់ឡើងវិញដែរ។
លោកអ័ប្រាហាំបានទុកអ្នកបំរើឱ្យចាំនៅកណ្តាលផ្លូវ ហើយមានបំណងចង់ធ្វើដំណើរទៅថ្វាយបង្គំព្រះ ជាមួយនឹងកូនរបស់គាត់នៅឆ្ងាយពីពួកគេ។ គាត់មិនបានឱ្យអ្នកបំរើទៅជាមួយទេ ក្រែងសេចក្តីស្រឡាញ់របស់ពួកគេ ចំពោះអ៊ីសាកអាចនឹងធ្វើឱ្យពួកគេមិនឱ្យគាត់ធ្វើនូវអ្វីដែលព្រះបានត្រាស់បង្គាប់ឱ្យគាត់ធ្វើ។ គាត់បានយកឧសពីអ្នកបំរើមកដាក់លើស្មារបស់អ៊ីសាក។ គាត់ក៏បានយកភ្លើងនិងកាំបិតដែរ។ គាត់បានរៀបប្រតិបត្តិនូវបេសកកម្មដ៏គួរឱ្យភ័យខ្លាចមួយដែលព្រះបានប្រទានដល់គាត់។ ឪពុកនិងកូនបានធ្វើដំណើរទៅជាមួយគ្នា។ «អ៊ីសាកនិយាយនឹងឪពុកថា លោកឪពុកអើយ គាត់ក៏ឆ្លើយថា អីកូន រួចវានិយាយថា នេះមានភ្លើងនិងឧសហើយ តែកូនចៀមសម្រាប់តង្វាយដុត តើនៅឯណា? អ័ប្រាហាំឆ្លើយថា កូនអើយ កូនចៀមដែលសម្រាប់ជាតង្វាយដុត នោះទ្រង់នឹងផ្គត់ផ្គង់ឱ្យ ដូច្នេះ គេក៏នាំគ្នាទៅជាមួយគ្នា»។ ឪពុកជាទីស្រឡាញ់ដែលឈឺចាប់បានដើរក្បែរកូនរបស់ខ្លួន ដោយចិត្តតានតឹងនិងរឹងមាំ។ នៅពេលដែលពួកគេបានមកដល់កន្លែងដែលព្រះបានមានបន្ទូលប្រាប់អ័ប្រាហាំហើយ គាត់បានស្អាងអាសនា១ នៅទីនោះ រួចតម្រៀបឧស ហើយចងអ៊ីសាកជាកូនដាក់លើឧសនៅលើអាសនា បម្រុងនឹងថ្វាយជាតង្វាយដុត ហើយបន្ទាប់មក ទើបប្រាប់អ៊ីសាកពីការត្រាស់បង្គាប់របស់ព្រះក្នុងការថ្វាយគាត់ជាតង្វាយដុត។ គាត់បាននិយាយដដែលៗ អំពីសេចក្តីសន្យាដែលព្រះបានមានបន្ទូលមកកាន់គាត់ជាច្រើនដងថា តាមរយៈអ៊ីសាកគាត់នឹងក្លាយទៅជាជាតិសាសន៍មួយយ៉ាងធំ និងថា តាមរយៈការបំពេញតាមការត្រាស់បង្គាប់របស់ព្រះឱ្យសម្លាប់កូនរបស់គាត់ព្រះនឹងបំពេញនូវសេចក្តីសន្យារបស់ទ្រង់ ដ្បិតទ្រង់អាចនឹងធ្វើឱ្យកូនគាត់រស់ពីស្លាប់ទ្បើងវិញ។
អំណានព្រះគម្ពីរពេលល្ងាច៖ ពេត្រុសទី១ ១:១៣-១៩
ខចងចាំ៖ តែបើឥតមានសេចក្តីជំនឿទេ នោះមិនអាចនឹងគាប់ដល់ព្រះហឫទ័យព្រះបានឡើយ ដ្បិតអ្នកណាដែលចូលទៅឯព្រះ នោះត្រូវតែជឿថា មានព្រះមែន ហើយថា ទ្រង់ប្រទានរង្វាន់ ដល់អស់អ្នកដែលស្វែងរកទ្រង់។ ហេព្រើរ ១១:៦
