ថ្ងៃចន្ទ ទី២៤ ខែមករា ឆ្នាំ២០២២
អំណានព្រះគម្ពីរពេលព្រឹក៖ ដោយសារសេចក្តីជំនឿ នោះលោកក៏ចេញពីស្រុកអេស៊ីព្ទទៅ ឥតកោតខ្លាចដល់សេចក្តីកំហឹងនៃស្តេចឡើយ ដ្បិតលោកបានកាន់យ៉ាងខ្ជាប់ខ្ជួន ហាក់ដូចជាឃើញព្រះដ៏មើលមិនឃើញដែរ។ ហេព្រើរ ១១:២៧
អំណានប្រចាំថ្ងៃ៖ ព្រះគ្រប់គ្រងលើគ្រប់ទាំងអស់
នៅពេលម៉ូសេមានអាយុ ៤០ឆ្នាំ «នោះលោកចេញទៅឯញាតិសន្តានខ្លួនក៏បានឃើញការទុក្ខលំបាករបស់គេ ហើយឃើញសាសន៍អេស៊ីព្ទម្នាក់កំពុងតែវាយសាសន៍ហេព្រើរម្នាក់ដែលជាសាច់ញាតិ។
នោះលោកក្រឡេកមើលនេះ មើលនោះ ឃើញថាគ្មានអ្នកណាសោះក៏សម្លាប់សាសន៍អេស៊ីព្ទនោះកប់ក្នុងខ្សាច់ចោលទៅ។ ហើយនៅថ្ងៃទីពីរ គាត់ចេញទៅបានឃើញសាសន៍ហេព្រើរពីរនាក់កំពុងតែប្រឈ្លោះគ្នា ក៏និយាយនឹងអ្នកដែលធ្វើខុសថា ហេតុអ្វីបានជាអ្នកវាយគូកនដូច្នេះ? អ្នកនោះឆ្លើយតបថា តើអ្នកណាបានតាំងឯងឱ្យធ្វើជាចៅហ្វាយ ហើយជាចៅក្រម លើយើងរាល់គ្នា តើគិតសម្លាប់អញដូចជាបានសម្លាប់សាសន៍អេស៊ីព្ទម្នាក់នោះទៀតឬអី? នោះម៉ូសេ មានសេចក្តីភ័យខ្លាចយ៉ាងខ្លាំង ដោយគិតថាការនោះប្រាកដជាគេដឹងហើយ ឥឡូវនេះ នៅពេលដែលផារ៉ោនទ្រង់បានឮការនោះ ទ្រង់ក៏រកសម្លាប់ម៉ូសេ។ តែលោករត់ចេញពីចំពោះព្រះភ័ក្ត្រទ្រង់ ហើយបានស្នាក់នៅក្នុងទឹកដីស្រុកម៉ាឌាន»។ ព្រះទ្រង់បានដឹកនាំផ្លូវរបស់គាត់ ហើយគាត់បានស្នាក់នៅផ្ទះជាមួយយេត្រូ បុរសម្នាក់ដែលបានថ្វាយបង្គំដល់ព្រះ។ គាត់ជាអ្នកគង្វាលចៀម ហើយក៏ជាសម្តេចសង្ឃនៃស្រុកម៉ាឌាន។
កូនស្រីៗរបស់គាត់បានមើលថែទាំហ្វូងចៀមរបស់គាត់។ ប៉ុន្តែ មិនយូរប៉ុន្មានហ្វូងចៀមទាំងអស់របស់យេត្រូ ត្រូវបានប្រគល់ឱ្យម៉ូសេ ជាអ្នកមើលថែទាំ ហើយម៉ូសេបានរៀបការ ជាមួយកូនស្រីរបស់គាត់ហើយបានរស់នៅឯស្រុកម៉ាឌានអស់រយៈពេល៤០ឆ្នាំ។លោកម៉ូសេបានសម្លាប់សាសន៍អេស៊ីព្ទលឿនពេក។ គាត់គិតស្មានថាបណ្តាជនអ៊ីស្រាអែលបានយល់ជ្រួតជ្រាបពីបុព្វហេតុពិសេសរបស់ព្រះដែលបានតាំងគាត់ឱ្យរំដោះពួកគេ។ ប៉ុន្តែ ព្រះជាម្ចាស់ ទ្រង់មិនបានរៀបចំ ដើម្បីរំដោះរាស្ត្រអ៊ីស្រាអែលចេញដោយការធ្វើសង្គ្រាម ដូចជាលោកម៉ូសេបានគិតនោះទេ ប៉ុន្តែ ទ្រង់រំដោះដោយព្រះចេស្តាដ៏ខ្លាំងអស្ចារ្យរបស់ព្រះអង្គផ្ទាល់ដែលនឹងថ្វាយសិរីល្អដល់ព្រះអង្គតែមួយប៉ុណ្ណោះ។ ព្រះបាននាំឱ្យម៉ូសេសម្លាប់ជនជាតិអេស៊ីព្ទនោះ ដើម្បីឱ្យបានសម្រេចបំណងព្រះហប្ញទ័យរបស់ទ្រង់។ បុព្វហេតុរបស់ទ្រង់ក្នុងការនាំយកលោកម៉ូសេចូលទៅក្នុងរាជវង្សនៃប្រទេសអេស៊ីព្ទ ជាកន្លែងដែលគាត់បានទទួលការអប់រំយ៉ាងហ្មត់ចត់ តែគាត់នៅតែពុំបានរៀបចំខ្លួន ដើម្បីឱ្យព្រះអាចប្រគល់ការងារដ៏ធំដែលទ្រង់ចង់ឱ្យគាត់បំពេញនោះទេ។
អំណានព្រះគម្ពីរពេលល្ងាច៖ និក្ខមនំ ២:១១-២៥
ខចងចាំ៖ ចូរស្ងៀមនៅចំពោះព្រះយេហូវ៉ា ហើយរង់ចាំទ្រង់ចុះកុំឲ្យក្តៅចិត្ត ដោយព្រោះអ្នកដែលចំរើនក្នុងផ្លូវគេឬមនុស្សដែលបង្កើតការអាក្រក់សំរេចបាននោះឡើយ។ ទំនុកតម្កើង ៣៧:៧
