ថ្ងៃអង្គារ ទី២៥ ខែមករា ឆ្នាំ២០២២
អំណានព្រះគម្ពីរពេលព្រឹក៖ មានពេលសំរាប់គ្រប់ទាំងអស់ គឺមានពេលសំរាប់គ្រប់ការ ដែលចង់ធ្វើនៅក្រោមមេឃ។ សាស្តា ៣:១
អំណានប្រចាំថ្ងៃ៖ ការដើរតាមពេលកំណត់របស់ព្រះ
លោកម៉ូសេមិនគួរចាកចេញពីព្រះរាជវាំងរបស់ស្តេច ហើយនិងសិទ្ធិស្របច្បាប់ជាចៅប្រុសរបស់ស្តេច ដើម្បីបំពេញកិច្ចការថ្វាយព្រះភ្លាមៗដូច្នេះទេ។ គាត់ត្រូវតែមានពេលវេលា ដើម្បីទទួលយកបទពិសោធន៍ និងទទួលការអប់រំនៅក្នុងសាលាពីភាពលំបាកតោកយ៉ាក។ នៅពេលដែលគាត់កំពុងតែឃ្វាលចៀម ព្រះអម្ចាស់បានបញ្ជូនទេវតារបស់ទ្រង់ឱ្យមកប្រាប់ម៉ូសេអំពីពេលអនាគត។ នៅទីនេះគាត់បានរៀនបន្ថែមកាន់តែច្បាស់នូវមេរៀនដ៏សំខាន់មួយ គឺការដឹងខ្នាតនិងការបន្ទាបខ្លួន។
គាត់បានគ្រប់គ្រងថែរក្សាហ្វូងចៀមរបស់លោកយេត្រូ ហើយនៅពេលដែលគាត់កំពុងបំពេញភារកិច្ចជាអ្នកគង្វាលចៀមយ៉ាងទន់ទាបនោះ ព្រះទ្រង់បានរៀបចំគាត់ឱ្យធ្វើជាអ្នកគង្វាលខាងព្រលឹងវិញ្ញាណដល់កូនចៀមរបស់ទ្រង់ព្រមទាំងរាស្ត្រអ៊ីស្រាអែលរបស់ទ្រង់ផង។
កាលម៉ូសេកំពុងនាំហ្វូងសត្វទៅខាងនាយទីរហោស្ថាន រហូតដល់ភ្នំព្រះ គឺជាភ្នំហូរ៉ែប «នៅទីនោះ មានទេវតានៃព្រះយេហូវ៉ាលេចមកឯគាត់ក្នុងអណ្តាតភ្លើងនៅកណ្តាលគុម្ពបន្លា»។ «រួចព្រះយេហូវ៉ាទ្រង់បានមានព្រះបន្ទូលថា អញបានឃើញសេចក្តីវេទនារបស់រាស្ត្រអញដែលនៅស្រុកអេស៊ីព្ទ ហើយក៏បានឮពាក្យគេអំពាវនាវដោយព្រោះពួកអ្នកដែលសង្កត់សង្កិន ដែលពីព្រោះអញ ស្គាល់សេចក្តីទុក្ខព្រួយរបស់គេ ដូច្នេះ អញបានចុះមកដើម្បីនឹងជួយដោះគេ ឱ្យរួចចេញពីកណ្តាប់ដៃនៃពួកសាសន៍អេស៊ីព្ទ អញនឹងនាំគេទ្បើងចេញពីស្រុកនោះទៅឯស្រុកដ៏ធំទូលាយ ជាស្រុកដែលមានទឹកដោះនិងទឹកឃ្មុំហូរហៀរ ដូច្នេះ មើលឥឡូវនេះពាក្យរបស់ពួកកូនចៅអ៊ីស្រាអែលដែលគេអំពាវនាវដល់អញ នោះអញឮ ហើយមួយទៀតអញបានឃើញការលំបាកដែលសាសន៍អេស៊ីព្ទ សង្កត់សង្កិនដល់គេដែរ ដូច្នេះ ចូរមកឥឡូវអញនឹងចាត់ឯងឱ្យទៅឯផារ៉ោន ដើម្បីឱ្យឯងបាននាំរាស្ត្រអញគឺជាពួកកូនចៅអ៊ីស្រាអែលចេញពីស្រុកអេស៊ីព្ទ»។
ពេលវេលាបានមកដល់យ៉ាងពិតប្រាកដដែលម៉ូសេត្រូវផ្លាស់ប្តូរឈើច្រត់សម្រាប់ឃ្វាលចៀមរបស់គាត់ ទៅជាដំបងរបស់ព្រះ ដែលទ្រង់អាចនឹងធ្វើការអស្ចារ្យ ដោយបង្ហាញទីសំគាល់និងការអស្ចារ្យទាំងឡាយ ក្នុងការនាំរាស្ត្ររបស់ទ្រង់ចេញពីការជិះជាន់ ហើយនិងការពារពួកគេនៅពេលដែលខ្មាំងសត្រូវរបស់គេដេញតាមពីក្រោយ។
លោកម៉ូសេបានសុខចិត្តបំពេញបេសកកម្មនេះ។ ជាដំបូង គាត់បានទៅសួរសុខទុក្ខឪពុកក្មេករបស់គាត់ ហើយបានសុំការអនុញ្ញាតឱ្យគាត់នឹងគ្រួសាររបស់គាត់បានត្រឡប់ទៅប្រទេសអេស៊ីព្ទវិញ។ គាត់មិនហ៊ានប្រាប់លោកយេត្រូ អំពីដំណឹងដែលគាត់ត្រូវទូលដល់ស្តេចផារ៉ោននោះទេ ខ្លាចក្រែងគាត់នឹងមិនព្រមអនុញ្ញាតឱ្យប្រពន្ធ និងកូនៗរបស់គាត់ ធ្វើដំណើរប្រថុយនឹងគ្រោះថ្នាក់ទៅជាមួយគាត់។ ព្រះជាម្ចាស់ទ្រង់បានចម្រើនកម្លាំងដល់គាត់ដោយមានបន្ទូលថា «ចូរឯងត្រឡប់ទៅឯស្រុកអេស៊ីព្ទវិញ ដ្បិតពួកអ្នកដែលចង់សម្លាប់ឯង គេស្លាប់អស់ហើយ»។
អំណានព្រះគម្ពីរពេលល្ងាច៖ កិច្ចការ ៧:១៧-៣៦
ខចងចាំ៖ ចូរស្ងៀមនៅចំពោះព្រះយេហូវ៉ា ហើយរង់ចាំទ្រង់ចុះកុំឲ្យក្តៅចិត្ត ដោយព្រោះអ្នកដែលចំរើនក្នុងផ្លូវគេឬមនុស្សដែលបង្កើតការអាក្រក់សំរេចបាននោះឡើយ។ ទំនុកតម្កើង ៣៧:៧
