ថ្ងៃសៅរ៍ ទី២៩ ខែមករា ឆ្នាំ២០២២
អំណានព្រះគម្ពីរពេលព្រឹក៖ ព្រះយេហូវ៉ាទ្រង់ជាថ្មដា ជាបន្ទាយហើយជាអ្នកជួយសង្គ្រោះរបស់ទូលបង្គំគឺជាព្រះនៃទូលបង្គំ ជាថ្មដាដែលទូលបង្គំយកជាទីពឹងក៏ជាខែល ជាស្នែងនៃសេចក្តីសង្គ្រោះរបស់ទូលបង្គំហើយជាប៉មយ៉ាងខ្ពស់ផង ទូលបង្គំនឹងអំពាវនាវដល់ព្រះយេហូវ៉ាដែលទ្រង់គួរសរសើរយ៉ាងនោះទូលបង្គំនឹងបានសង្គ្រោះរួចពីពួកសត្រូវរបស់ទូលបង្គំ។ ទំនុកតម្កើង ១៨:២-៣
អំណានប្រចាំថ្ងៃ៖ សេចក្តីវេទនា
នៅក្នុងការរំដោះសាសន៍អ៊ីស្រាអែលចេញពីប្រទេសអេស៊ីព្ទ ព្រះជាម្ចាស់បានបង្ហាញនូវសេចក្តីមេត្តាករុណារបស់ទ្រង់ដែលខុសពីព្រះដទៃដល់រាស្ត្ររបស់ទ្រង់នៅមុខសាសន៍អេស៊ីព្ទ។ ព្រះជាម្ចាស់ទ្រង់បានទតឃើញថា គួរនឹងជំនុំជម្រះដល់ស្តេចផារ៉ោន ឱ្យទ្រង់ជ្រាបពីបទពិសោធន៍ដ៏ក្រៀមក្រំ ដោយទ្រង់មិនទទួលស្គាល់ថា អំណាចរបស់ព្រះ អស្ចារ្យលើសអំណាចណាៗទាំងអស់។ ដែលព្រះនាម របស់ទ្រង់នឹងត្រូវបានប្រកាសពាសពេញផែនដី ទ្រង់នឹងប្រទានភស្តុតាងទុកជាគំរូ និងបង្ហាញដល់គ្រប់ទាំងសាសន៍ អំពីអំណាចនិងសេចក្តីយុត្តិធម៌របស់ទ្រង់។ វាគឺជាការរៀបចំរបស់ព្រះដែលការបង្ហាញអំណាចនេះ អាចនឹងពង្រឹងនូវសេចក្តីជំនឿនៃរាស្ត្ររបស់ទ្រង់ ហើយថាកូនចៅជំនាន់ក្រោយរបស់គេនឹងនៅតែថ្វាយបង្គំទ្រង់តែមួយអង្គគត់ដែលបានធ្វើការអស្ចារ្យ ដោយសេចក្តីមេត្តាករុណាជាច្រើនដល់ពួកគេ។
បន្ទាប់ពីទ្រង់បានតម្រូវឱ្យរាស្ត្រអ៊ីស្រាអែលធ្វើឥដ្ឋដោយឥដ្ឋចំបើង លោកប្រកាសប្រាប់ដល់ស្តេចផារ៉ោនថា ព្រះដែលទ្រង់ (ស្តេច) បានធ្វើជាមិនស្គាល់បានបង្គាប់ឱ្យទ្រង់ទទួលស្គាល់អំណាចរបស់ព្រះអង្គ និងទទួលស្គាល់អំណាចគ្រប់គ្រងរបស់ព្រះអង្គជាអ្នកដឹកនាំដ៏ខ្ពស់បំផុត។សេចក្តីវេទនា ការអស្ចារ្យដែលដំបងបានក្លាយទៅជាពស់ហើយទឹកទន្លេបានត្រឡប់ទៅជាឈាម មិនអាចកំចាត់ចិត្តរឹងទទឹងរបស់ស្តេចផារ៉ោនបានឡើយ តែរឹងរឹតតែបង្កើននូវសម្អប់របស់ទ្រង់ទៅលើសាសន៍អ៊ីស្រាអែលទៅវិញ។
ការងាររបស់ពួកគ្រូមន្តអាគមបានធ្វើឱ្យទ្រង់ជឿថាការអស្ចារ្យដែលព្រះបានធ្វើនោះសុទ្ធតែកើតឡើងដោយមន្តអាគមទាំងអស់ ប៉ុន្តែ ទ្រង់មានភស្តុតាងយ៉ាងច្បាស់ថា នេះគឺមិនមែនជាមន្តអាគមទេនៅពេលដែលការវេទនាពីកង្កែបត្រូវបានដកចេញនោះ។ ព្រះទ្រង់អាចធ្វើឱ្យពួកវារលាយទៅជាធូលីដីភ្លាមមួយរំពេច ប៉ុន្តែ ទ្រង់មិនបានធ្វើដូច្នេះទេ ក្រែងបន្ទាប់ពីកង្កែបត្រូវបានដកចេញអស់ទៅ ស្តេចនិងប្រជាជនអេស៊ីព្ទទាំងឡាយនឹងនិយាយថា វាគឺជាលទ្ធផលនៃមន្តអាគម ដូចជាការដែលពួកគ្រូមន្តអាគមបានធ្វើដែរ។ កង្កែបទាំងនោះបានងាប់ ហើយបន្ទាប់មក គេបានប្រមូលវាគរជាគំនរ។ ពួកបណ្តាជនគេអាចឃើញខ្មោចកង្កែបទាំងនោះនៅចំពោះមុខគេ ហើយគំនរកង្កែបងាប់នោះបានបំផ្លាញបរិយាកាសដោយក្លិនស្អុយ។ ត្រង់នេះទាំងស្តេច និងបណ្តាជននៃសាសន៍អេស៊ីព្ទទាំងអស់បានឃើញយ៉ាងច្បាស់ឥតប្រកែកបានថា នេះមិនមែនជាមន្តអាគមទេ ប៉ុន្តែ គឺជាការជំនុំជម្រះរបស់ព្រះនៃស្ថានសួគ៌។
អំណានព្រះគម្ពីរពេលល្ងាច៖ និក្ខមនំ ជំពូក៧
ខចងចាំ៖ ចូរស្ងៀមនៅចំពោះព្រះយេហូវ៉ា ហើយរង់ចាំទ្រង់ចុះកុំឲ្យក្តៅចិត្ត ដោយព្រោះអ្នកដែលចំរើនក្នុងផ្លូវគេឬមនុស្សដែលបង្កើតការអាក្រក់សំរេចបាននោះឡើយ។ ទំនុកតម្កើង ៣៧:៧
