​អំណានព្រះគម្ពីរពេលព្រឹក៖ កុំ​ឲ្យ​ខ្វល់ខ្វាយ​អ្វី​ឡើយ ចូរ​ទូល​ដល់​ព្រះ ឲ្យ​ជ្រាប​ពី​សេចក្តី​សំណូម​របស់​អ្នក​រាល់​គ្នា​ក្នុង​គ្រប់​ការ​ទាំង​អស់ ដោយ​សេចក្តី​អធិស្ឋាន និង​ពាក្យ​ទូល​អង្វរ ទាំង​ពោល​ពាក្យ​អរ​ព្រះគុណ​ផង យ៉ាង​នោះ សេចក្តី​សុខ​សាន្ត​របស់​ព្រះ ដែល​ហួស​លើស​ពី​អស់​ទាំង​គំនិត និង​ជួយ​ការពារ​ចិត្ត ហើយ​និង​គំនិត​របស់​អ្នក​រាល់​គ្នា ក្នុង​ព្រះគ្រីស្ទយេស៊ូវ។ភីលីព ៤:៦-៧

អំណានប្រចាំថ្ងៃ

សាសន៍កាណានគឺជាមនុស្សដែលគោរពរូបព្រះ ហើយព្រះជាម្ចាស់បានមានបន្ទូលបង្គាប់ថារាស្ត្ររបស់ទ្រង់មិនត្រូវរៀបការជាមួយនឹងពួកគេទ្បើយ ក្រែងពូកគេដឹកនាំរាស្ត្ររបស់ទ្រង់ឱ្យគោរពរូបព្រះដែរ។ លោកអ័ប្រាហាំមានវ័យចាស់ណាស់ទៅហើយ ហើយគាត់ដឹងថាគាត់នឹងត្រូវស្លាប់ក្នុងពេលឆាប់ៗនេះហើយ។ អ៊ីសាកមិនទាន់បានរៀបការនៅទ្បើយទេ។ លោកអ័ប្រាហាំព្រួយបារម្ភនឹងឥទ្ធិពលនៃអំពើអាក្រក់ដែលនៅជុំវិញអ៊ីសាក ហើយមានចិត្តអន្ទះសាចង់ជ្រើសរើសប្រពន្ធឱ្យកូនដែលនឹងមិនដឹកនាំគាត់ឱ្យងាកចេញពីព្រះ។ គាត់បានប្រគល់ការ នេះទៅឱ្យអ្នកបំរើដ៏ស្មោះត្រង់និងមានបទពិសោធន៍ម្នាក់ដែលត្រួតត្រាលើទ្រព្យសម្បត្តិរបស់គាត់ទាំងអស់។

លោកអ័ប្រាហាំតម្រូវឱ្យអ្នកបំរើរបស់គាត់ស្បថយ៉ាងឧឡារិកនៅចំពោះព្រះថាគាត់នឹងមិនយកប្រពន្ធឱ្យអ៊ីសាកពីស្រីសាសន៍កាណានទ្បើយ ប៉ុន្តែ គាត់នឹងទៅស្រុកនៃញាតិសន្តានរបស់លោកអ័ប្រាហាំ ដែលជឿលើព្រះពិត ហើយរើសប្រពន្ធឱ្យអ៊ីសាកវិញ។ គាត់បានផ្តែផ្តាំ ឱ្យអ្នកបំរើនោះប្រយ័ត្នកុំនាំអ៊ីសាកត្រឡប់ទៅស្រុកកំណើតរបស់គាត់វិញឡើយ ដ្បិតពួកអ្នកស្រុកនោះសឹងតែទាំងអស់សុទ្ធតែបានទទួលឥទ្ធិពលពីការថ្វាយបង្គំរូបព្រះ។ បើគាត់មិនអាចរកប្រពន្ធឱ្យអ៊ីសាកពីស្ត្រីដែលយល់ព្រមចាកចេញពីញាតិសន្តាន ហើយមកកាន់ស្រុកដែលអ៊ីសាកកំពុងរស់នៅនោះទេ នោះគាត់នឹងបានរួចពីសម្បថដែលគាត់បានស្បថនេះ។

រឿងដ៏សំខាន់នេះមិនបានទុកឱ្យអ៊ីសាកជ្រើសរើសប្រពន្ធដោយ ខ្លួនឯងផ្ទាល់ ដោយមិននៅក្រោមការគ្រប់គ្រងរបស់ឪពុកនោះទេ។ អ័ប្រាហាំក៏បានប្រាប់ដល់អ្នកបំរើរបស់គាត់ថា ព្រះនឹងចាត់ ទេវតារបស់ទ្រង់ទៅមុនគាត់ដើម្បីដឹកនាំគាត់ក្នុងការជ្រើសរើសនេះ។ អ្នកបំរើដែល លោកអ័ប្រាហាំបានប្រគល់បេសកកម្មនេះឱ្យបានចាប់ផ្តើមធ្វើដំណើរដ៏វែងឆ្ងាយមួយ។ ពេលដែលគាត់បានចូលទៅដល់ទីក្រុងដែលញាតិសន្តានរបស់លោកអ័ប្រាហាំរស់នៅគាត់បានអធិស្ឋានអស់ពីចិត្តឱ្យព្រះដឹកនាំគាត់ក្នុងការជ្រើសរើសប្រពន្ធឱ្យអ៊ីសាក។

​អំណានព្រះគម្ពីរពេលល្ងាច៖លោកុប្បត្តិ ២៤:១-២១