ថ្ងៃពុធ ទី០៥ ខែមករា ឆ្នាំ២០២២
អំណានព្រះគម្ពីរពេលព្រឹក៖ចូរឲ្យគោរពប្រតិបត្តិដល់ឪពុកម្តាយឯង ដូចជាព្រះយេហូវ៉ា ជាព្រះនៃឯង ទ្រង់បានបង្គាប់មក ដើម្បីឲ្យឯងបានអាយុវែង ហើយឲ្យបានសប្បាយនៅក្នុងស្រុក ដែលព្រះយេហូវ៉ា ជាព្រះនៃឯង បានប្រទានមក។។ ចោទិយកថា ៥:១៦
អំណានប្រចាំថ្ងៃ៖ នាងរេបិកាយល់ព្រម
គាត់បានសុំឱ្យព្រះប្រទានភស្តុតាងដល់គាត់ ដើម្បីកុំឱ្យគាត់មានកំហុសក្នុងការជ្រើសរើសនេះ។ គាត់បានសម្រាកនៅក្បែរអណ្តូងទឹក មួយជាកន្លែងដែលមនុស្សជាច្រើនតែងតែមកជួបជុំគ្នា។ ទីនេះហើយដែលគាត់បានកត់សំគាល់ឃើញយ៉ាងច្បាស់នូវអាកប្បកិរិយាដ៏គួរឱ្យស្រឡាញ់ និងកិរិយាមាយាទដ៏គួរសមរបស់នាងរេបិកា ហើយភស្តុតាងទាំងឡាយដែលគាត់បានទូលសុំពីព្រះ គាត់ទទួលទាំងអស់ដែលបព្ជាាក់ ថា នាងរេបិកាគឺជាស្ត្រីដែលព្រះសព្វព្រះហឫទ័យឱ្យជ្រើសរើសយកទៅធ្វើជាប្រពន្ធរបស់អ៊ីសាក។ នាងបានអញ្ជើញអ្នកបំរើនោះទៅផ្ទះឪពុករបស់នាង។ បន្ទាប់មក គាត់បានរៀបរាប់ប្រាប់ឪពុកនាងរេបិកា និងបងប្រុសរបស់នាងអំពីដំណើរនិងភស្តុតាងទាំងឡាយដែលគាត់បានទទួលពីព្រះជាម្ចាស់ដែលបញ្ជាក់ថា នាងរេបិកានឹងក្លាយទៅជាប្រពន្ធរបស់អ៊ីសាក ជាកូនប្រុសនៃចៅហ្វាយរបស់គាត់។
ពេលនោះអ្នកបំរើរបស់លោកអ័ប្រាហាំបាននិយាយទៅកាន់ពួកគាត់ថា «ឥឡូវនេះ បើអ្នករាល់គ្នាគិតប្រព្រឹត្តនឹងចៅហ្វាយខ្ញុំដោយសប្បុរសស្មោះត្រង់ នោះសូមតបមកខ្ញុំចុះ ពុំនោះទេ សូមប្រាប់ខ្ញុំឱ្យដឹងផង ដើម្បីឱ្យខ្ញុំងាកបែរទៅខាងស្តាំ ឬខាងឆ្វេង» ឪពុកនិងបងប្រុសរបស់នាងរេបិកាបានឆ្លើយថា «ការនេះសម្រេចតែពីព្រះយេហូវ៉ាទេ ទោះបីយើងឆ្លើយនឹងអ្នកជាអាក្រក់ឬល្អក្តីក៏ពុំបានដែរ។ មើលរេបិកានៅមុខអ្នកស្រាប់ហើយ ចូរយកនាងទៅឱ្យធ្វើជាប្រពន្ធ កូនចៅហ្វាយអ្នកចុះ ដូចដែលឮព្រះអម្ចាស់បានមានបន្ទូលមក។ កាលបាវអ័ប្រាហាំបានឮដូច្នេះ នោះគាត់ក៏ឱនក្រាបដល់ដីថ្វាយបង្គំដល់ព្រះយេហូវ៉ា»។
បន្ទាប់ពីអ្វីៗទាំងអស់ត្រូវបានរៀបចំសព្វគ្រប់ហើយ ដោយបានទទួលការយល់ព្រមពីឪពុកនិងបងៗហើយនោះ គេបានផ្តល់យោបល់ឱ្យនាងរេបិកាត្រូវធ្វើដំណើរតាមផ្លូវយ៉ាងឆ្ងាយ ទៅជាមួយនឹងអ្នកបំរើរបស់អ័ប្រាហាំចេញពីគ្រួសារនៃឪពុករបស់នាងទៅធ្វើជាប្រពន្ធរបស់អ៊ីសាក។ នាងបានជឿថាព្រះហស្តរបស់ព្រះបានជ្រើសរើសនាងឱ្យធ្វើជាប្រពន្ធរបស់អ៊ីសាកតាំងពីនាងបានឃើញព្រឹត្តិការណ៍ទាំងឡាយកើតឡើងដំបូងមកម៉្លេះហើយនាងបាននិយាយថា «នឹងទៅជាមួយគាត់»។
ជាទូទៅ នៅសម័យនាះកិច្ចសន្យានៃអាពាហ៍ពិពាហ៍ត្រូវបានរៀបចំទ្បើងដោយឪពុកម្តាយ ប៉ុន្តែ ក៏គ្មានការបង្ខិតបង្ខំឱ្យរៀបការជាមួយមនុស្សដែលពួកគេមិនស្រឡាញ់នោះដែរ។ ហើយកូនៗមានទំនុកចិត្តលើការវិនិច្ឆ័យរបស់ឪពុកម្តាយ ហើយបានគោរពតាមដំបូន្មានរបស់ពួកគាត់ និងយល់ព្រមប្រគល់សេចក្តីស្រឡាញ់របស់ពួកគេ ឱ្យដល់អ្នកដែលឪពុកម្តាយដែលកោតខ្លាចដល់ព្រះរបស់គេបានជ្រើសរើសឱ្យពួកគេ។ ការប្រព្រឹត្តិទាំងឡាយដែលផ្ទុយពីនេះ ត្រូវបានគេចាត់ទុកថាជាបទឧក្រិដ្ឋ។
អំណានព្រះគម្ពីរពេលល្ងាច៖ លោកុប្បត្តិ ២៤:២២-៤៩
ខចងចាំ៖ តែបើឥតមានសេចក្តីជំនឿទេ នោះមិនអាចនឹងគាប់ដល់ព្រះហឫទ័យព្រះបានឡើយ ដ្បិតអ្នកណាដែលចូលទៅឯព្រះ នោះត្រូវតែជឿថា មានព្រះមែន ហើយថា ទ្រង់ប្រទានរង្វាន់ ដល់អស់អ្នកដែលស្វែងរកទ្រង់។ ហេព្រើរ ១១:៦
