ថ្ងៃអង្គារ ទី០៤ ខែមករា ឆ្នាំ២០២១
អំណានព្រះគម្ពីរពេលព្រឹក៖ ដ្បិតគឺទ្រង់ដែលបានបង្កើតចិត្តថ្លើមនៃទូលបង្គំ ហើយបានផ្សំគ្រឿងនៃទូលបង្គំនៅក្នុងផ្ទៃម្តាយ ទូលបង្គំនឹងអរព្រះគុណដល់ទ្រង់ ដ្បិតទ្រង់បានបង្កើតទូលបង្គំមកយ៉ាងគួរកោតគួរអស្ចារ្យឯស្នាដៃនៃទ្រង់ ក៏សុទ្ធតែអស្ចារ្យទាំងអស់ ព្រលឹងទូលបង្គំក៏ដឹងច្បាស់ហើយ កាលទូលបង្គំកើតមាននៅទីកំបាំង ហើយបានសូន្យធ្វើបែបចំឡែកៗនៅទីទាបនៃផែនដី នោះគ្រោងកាយរបស់ទូលបង្គំមិនកំបាំងនឹងទ្រង់ទេព្រះនេត្រទ្រង់បានឃើញធាតុនៃទូលបង្គំក្នុងកាលដែលមិនទាន់មានរូបរាងនៅឡើយទាំងអស់បានកត់ទុកក្នុងបញ្ជីរបស់ទ្រង់គឺអស់ទាំងថ្ងៃអាយុ ដែលបានតម្រូវឲ្យទូលបង្គំរស់នៅក្នុងកាលដែលមិនទាន់មានថ្ងៃណាមួយនោះនៅឡើយ។ ទំនុកតម្កើង ១៣៩:១៣-១៦
អំណានប្រចាំថ្ងៃ
ព្រះយេហូវ៉ាទ្រង់ជ្រាបពីទីបញ្ចប់តាំងពីដើមដំបូងមក។ ទ្រង់បានជ្រាបតាំងពីមុនកំណើតរបស់យ៉ាកុប និងអេសាវមកម៉្លេះ នូវអត្តចរិតដែលពួកគេទាំងពីរនឹងរីកចម្រើនឡើង នៅថ្ងៃមុខ។ ព្រះទ្រង់បានជ្រាបថា អេសាវនឹងមិនស្តាប់បង្គាប់ទ្រង់ឡើយ។ ព្រះអង្គបានឆ្លើយតបទៅនឹងការអធិស្ឋានដ៏ក្រៀមក្រំរបស់រេបិកា ហើយទ្រង់បានប្រាប់នាងថា នាងនឹងមានកូនពីរនាក់ ហើយកូនច្បងនឹងត្រូវបំរើកូនប្អូន។ ទ្រង់បានបង្ហាញឱ្យនាងដឹងពីដំណើរជីវិតនៃកូនប្រុសទាំងពីររបស់នាងថាពួកគេនឹងបានក្លាយទៅជាសាសន៍ពីរ ហើយសាសន៍មួយនឹងបានខ្លាំងជាងសាសន៍មួយ ហើយកូនច្បងនឹងត្រូវបំរើកូនប្អូន។ កូនច្បងត្រូវទទួលអត្ថប្រយោជន៍និងកិត្តិយសពិសេសដែលគ្មានសមាជិកគ្រួសារណាមួយអាចប្រៀបប្រដូចបាន។
លោកអ៊ីសាកស្រឡាញ់អេសាវខ្លាំងជាងយ៉ាកុប ព្រោះអេសាវធ្លាប់បានផ្តល់សាច់ក្តាន់ជូនគាត់ពិសា។ គាត់ពេញចិត្តនឹងជំនាញបរបាញ់សត្វព្រៃដែលអេសាវបានបង្ហាញ។ ឯយ៉ាកុបជាកូនសំណព្វចិត្តរបស់ម្តាយគាត់ ដោយសារតែភាពរម្យទម ស្លូតបូត ហើយពូកែធ្វើឱ្យម្តាយរបស់គាត់សប្បាយចិត្ត។ យ៉ាកុបបានរៀនពីម្តាយរបស់គាត់នូវអ្វីៗដែលព្រះបានបង្រៀនដល់នាង ថាកូនច្បងនឹងត្រូវបំរើកូនប្អូន ហើយការពិចារណានៅក្នុងវ័យយុវជនរបស់គាត់បានដឹកនាំគាត់ឱ្យសន្និដ្ឋានថា សេចក្តីសន្យានេះនឹងមិនបានសម្រេចទេ ដរាបណាដែលអេសាវនៅតែមានសិទ្ធិជាកូនច្បងនោះ។ ហើយនៅពេលអេសាវមកពីទីវាលទាំងស្រេកឃ្លាន យ៉ាកុបបានយកការស្រេកឃ្លានរបស់អេសាវមកធ្វើជាឱកាសដើម្បីផលប្រយោជន៍របស់ខ្លួន ដោយសុំផ្តល់សម្លក្រហមឱ្យបងបរិភោគ ជាថ្នូរនឹងសិទ្ធិកូនច្បង ហើយអេសាវបានលក់សិទ្ធិកូនច្បងនេះឱ្យដល់យ៉ាកុបទៅ។
អំណានព្រះគម្ពីរពេលល្ងាច៖ លោកុប្បត្តិ ២៥:១៩-៣៤
ខចងចាំ៖ តែបើឥតមានសេចក្តីជំនឿទេ នោះមិនអាចនឹងគាប់ដល់ព្រះហឫទ័យព្រះបានឡើយ ដ្បិតអ្នកណាដែលចូលទៅឯព្រះ នោះត្រូវតែជឿថា មានព្រះមែន ហើយថា ទ្រង់ប្រទានរង្វាន់ ដល់អស់អ្នកដែលស្វែងរកទ្រង់។ ហេព្រើរ ១១:៦
