ថ្ងៃសៅរ៍ ទី០៨ ខែមករា ឆ្នាំ២០២២
អំណានព្រះគម្ពីរពេលព្រឹក៖ មានពរហើយ មនុស្សណាដែលការរំលងច្បាប់របស់ខ្លួនបានអត់ទោសឲ្យគឺដែលបាបរបស់ខ្លួនបានគ្របបាំងហើយមានពរហើយ មនុស្សណាដែលព្រះយេហូវ៉ាមិនរាប់ថា ជាអ្នកមានទោសជាអ្នកដែលគ្មានកលឧបាយនៅក្នុងចិត្តសោះ។ ទំនុកតម្កើង ៣២:១-២
អំណានប្រចាំថ្ងៃ៖ ការខ្វះសេចក្តីទុកចិត្ត
អេសាវបានយកប្រពន្ធពីរដែលជានារីមិនជឿព្រះធ្វើឱ្យអ៊ីសាកនិងនាងរេបិកាមានទុក្ខព្រួយជាខ្លាំង។ ទោះជាយ៉ាងនេះក៏ដោយអ៊ីសាកនៅតែស្រឡាញ់អេសាវខ្លាំងជាងយ៉ាកុបដដែល ហើយនៅពេលដែលគាត់បានគិតថាគាត់ជិតស្លាប់នោះគាត់បានស្នើសុំឱ្យអេសាវរៀបចំសាច់ឱ្យគាត់បានបរិភោគ ហើយគាត់នឹងបានឱ្យពរដល់កូនមុននឹងគាត់ស្លាប់។ អេសាវពុំបាន ប្រាប់ឪពុករបស់គេថាគេបានលក់សិទ្ធិកូនច្បងទៅឱ្យយ៉ាកុបព្រមទាំងបានបញ្ជាក់ដោយពាក្យសម្បថផងនោះទេ។ រេបិកាបានឮពាក្យដែលអ៊ីសាកនិយាយ ហើយនាងបាននឹកឃើញព្រះបន្ទូលរបស់ព្រះជាម្ចាស់ថា «កូនច្បងនឹងត្រូវបំរើប្អូន» ហើយនាងបានដឹងថាអេសាវបានផ្ទេរសិទ្ធិកូនបងច្បងរបស់ខ្លួនដោយបានលក់សិទ្ធិនោះទៅឱ្យយ៉ាកុបហើយ។ នាងបានបញ្ចុះបញ្ចូលយ៉ាកុបឱ្យបោកបញ្ឆោតឪពុករបស់ខ្លួន ដោយក្លែងបន្លំទទួលពរពីឪពុក នាងបានគិតថាគ្មានមធ្យោបាយណាក្រៅពីនេះទ្បើយ។ ដំបូងទ្បើយយ៉ាកុបមិនព្រមធ្វើតាមការបោកប្រាស់នោះទេ តែចុងបញ្ចប់គាត់បានយល់ព្រមទៅនឹងគម្រោងការរបស់ម្តាយគាត់។
រេបិកាបានដឹងពីសេចក្តីស្រឡាញ់របស់អ៊ីសាកទៅលើអេសាវជាកូន ហើយនាងបានដឹងច្បាស់ថា គ្មានហេតុផលណាដែលអាចផ្លាស់ប្តូរគោលបំណងរបស់គាត់បានឡើយ។ ជំនួសឱ្យការទុកចិត្តទៅលើព្រះ ដែលជាអ្នករៀបចំផ្លូវគ្រប់យ៉ាងនោះ នាងបានបង្ហាញនូវការខ្វះសេចក្តីជំនឿដោយបញ្ចុះបញ្ចូលយ៉ាកុបឱ្យបោកប្រាស់ឪពុករបស់ខ្លួនទៅវិញ។ ការប្រព្រឹត្តិរបស់យ៉ាកុបនេះ ព្រះមិនសព្វព្រះហឫទ័យទេ។ រេបិកានិងយ៉ាកុបគួរតែរង់ចាំឱ្យព្រះប្រទាននូវគោលបំណងរបស់ទ្រង់តាមផ្លូវរបស់ទ្រង់ និងតាមពេលវេលារបស់ទ្រង់ផ្ទាល់ មិនគួរនាំយកមកនូវព្រឹត្តិការណ៍ដែលព្រះបានប្រាប់ឱ្យដឹងជាមុនមកហើយនោះដោយបន្ថែមនូវការបោកបញ្ឆោតបែបនេះទេ។ ប្រសិនបើអេសាវបានទទួលពរពីឪពុករបស់គាត់ដែលបានបំរុងទុកសម្រាប់កូនច្បង នោះវិបុលភាព (ភាពចម្រើនរុងរឿង) របស់គាត់នឹងត្រូវបានប្រទានមកដោយសារតែព្រះមួយអង្គគត់ ហើយទ្រង់នឹងប្រទានពរដល់គាត់នូវភាពចម្រុងចម្រើន ឬប្រទានឱ្យគាត់នូវភាពខ្វះខាត អាស្រ័យទៅលើការប្រព្រឹត្តិរបស់គាត់។ ប្រសិនបើគាត់ស្រឡាញ់និងគោរពដល់ព្រះ ដូចជាអេបិលដែលជាមនុស្សសុចរិត នោះគាត់នឹងត្រូវបានទទួលព្រះពរមកពីព្រះជាមិនខាន។ តែប្រសិនបើជាមនុស្សអាក្រក់ដូចកាអ៊ីនដែលមិនបានគោរពដល់ព្រះ និងបញ្ញត្តិរបស់ទ្រង់ តែបានដើរតាមផ្លូវអាក្រក់របស់ខ្លួនវិញនោះគាត់នឹងមិនបានទទួលព្រះពរពីទ្រង់ឡើយ ហើយត្រូវបានបោះបង់ចោលដូចជាកាអ៊ីនដូច្នោះដែរ។
ប្រសិនបើផ្លូវប្រព្រឹត្តរបស់យ៉ាកុបបានសុចរិត ប្រសិនគាត់ស្រឡាញ់និងកោតខ្លាចដល់ព្រះ គាត់នឹងបានទទួលព្រះពរពីព្រះ ហើយព្រះហស្តនៃសេចក្តីចម្រុងចម្រើនរបស់ទ្រង់ នឹងប្រទានពរមកដល់គាត់ ទោះបីជាគាត់មិនបានទទួល ព្រះពរនិងសិទ្ធិកូនច្បងក៏ដោយ។
អំណានព្រះគម្ពីរពេលល្ងាច៖ លោកុប្បត្តិ ២៧:១-៤១
ខចងចាំ៖ តែបើឥតមានសេចក្តីជំនឿទេ នោះមិនអាចនឹងគាប់ដល់ព្រះហឫទ័យព្រះបានឡើយ ដ្បិតអ្នកណាដែលចូលទៅឯព្រះ នោះត្រូវតែជឿថា មានព្រះមែន ហើយថា ទ្រង់ប្រទានរង្វាន់ ដល់អស់អ្នកដែលស្វែងរកទ្រង់។ ហេព្រើរ ១១:៦
