ថ្ងៃអាទិត្យ ទី០៩ ខែមករា ឆ្នាំ២០២២
អំណានព្រះគម្ពីរពេលព្រឹក៖ កុំឲ្យច្រឡំឡើយ និងបញ្ឆោតព្រះមិនបានទេ ដ្បិតពូជណាដែលមនុស្សព្រោះចុះ នោះនឹងច្រូតបានពូជនោះឯងវិញ។ កាឡាទី ៦:៧
អំណានប្រចាំថ្ងៃ៖ ឆ្នាំនៃការគេចខ្លួនរបស់យ៉ាកុប
នាងរេបិកាបានកែប្រែចិត្តដោយជូរចត់ចំពោះយោបល់ខុសឆ្គងដែលនាងបានផ្តល់ដល់យ៉ាកុប ព្រោះនេះហើយជាដើមហេតុដែលបំបែកគាត់ឱ្យបែកពីយ៉ាកុបជារៀងរហូត។ គាត់បានបង្ខំចិត្តរត់គេចឱ្យរួចជីវិតពីកំហឹងដ៏ខ្លាំងក្លារបស់អេសាវ ហើយម្តាយរបស់គាត់លែងបានឃើញមុខគាត់ទៀតហើយ។ អ៊ីសាកបានរស់នៅជាច្រើនឆ្នាំតទៅទៀត បន្ទាប់ពីគាត់បានឱ្យពរដល់យ៉ាកុបមក ហើយដោយសាររឿងរបស់អេសាវនិងយ៉ាកុប គាត់បានដឹងថាពរទាំងឡាយ បានធ្លាក់ទៅលើយ៉ាកុប។ យ៉ាកុបពុំបានសប្បាយចិត្តជាមួយនឹងចំណងអាពាហ៍ពិពាហ៍របស់គាត់ឡើយ ទោះបីជាប្រពន្ធរបស់គាត់ជាប្អូន (ជីដូនមួយ) របស់គាត់ក៏ដោយ។ គាត់បានធ្វើកិច្ចសន្យាអាពាហ៍ពិពាហ៍ជាមួយលោកឡាបាន់ ដើម្បីបាននាងរ៉ាជែលជាកូនស្រីរបស់គាត់ ដែលគាត់ស្រឡាញ់។ បន្ទាប់ពីគាត់បានបំរើឡាបាន់អស់រយៈពេល៧ឆ្នាំ ដើម្បីឱ្យបាននាងរ៉ាជែលរួចមកឡាបាន់ក៏បានបោកប្រាស់គាត់ ហើយបានឱ្យនាងលេអាទៅគាត់ជំនួសវិញ។ នៅពេលដែលយ៉ាកុបដឹងថាគេបានប្រើល្បិចបោកបញ្ឆោតគាត់ និងបានដឹងថានាងលេអាបានរួមចំណែកក្នុងការបោកប្រាស់នេះ គាត់មិនអាចស្រឡាញ់នាងបាននោះទេ។ ឡាបាន់ប្រាថ្នាចង់បានការបំរើដ៏ស្មោះត្រង់របស់យ៉ាកុបឱ្យបានកាន់តែយូរថែមទៀត ហេតុដូច្នេះហើយបានជាគាត់បោកបញ្ឆោតយ៉ាកុប ដោយឱ្យនាងលេអាទៅធ្វើជាប្រពន្ធជំនួសរ៉ាជែលវិញ។ យ៉ាកុបបានស្តីបន្ទោសដល់ឡាបាន់ ចំពោះការលេងសើចជាមួយនឹងសេចក្តីស្រឡាញ់របស់គាត់ដោយឱ្យនាងលេអាជាមនុស្សដែលគាត់មិនបានស្រឡាញ់ មកគាត់វិញយ៉ាងដូច្នេះ។ ឡាបាន់បានអង្វរយ៉ាកុបកុំឱ្យបោះបង់ចោលនាងលេអាឡើយ ដ្បិតនេះមិនត្រឹមតែជាការអាម៉ាស់ដល់នាងដែលជាប្រពន្ធប៉ុណ្ណោះទេ តែថែមទាំងអាម៉ាស់ដល់ក្រុមគ្រួសារទាំងមូលថែមទៀតផង។ យ៉ាកុបបានធ្លាក់ទៅក្នុងស្ថានភាពយ៉ាប់យ៉ឺនមែនទែន ប៉ុន្តែគាត់បានសម្រេចចិត្តថា គាត់នឹងរក្សាទុកនាងលេអា ហើយក៏នឹងរៀបការជាមួយប្អូនរបស់នាងផងដែរ។ យ៉ាកុបមិនសូវស្រឡាញ់នាងលេអាខ្លាំងដូចនាងរ៉ាជែលទេ។
អំណានព្រះគម្ពីរពេលល្ងាច៖ លោកុប្បត្តិ ២៩:១-៣០
ខចងចាំ៖ កុំឲ្យច្រឡំឡើយ និងបញ្ឆោតព្រះមិនបានទេ ដ្បិតពូជណាដែលមនុស្សព្រោះចុះ នោះនឹងច្រូតបានពូជនោះឯងវិញ។ កាឡាទី ៦:៧
